TN NEET Ban: பரிசீலனையில் நீட் விலக்கு மசோதா- குழப்பும் ஆளுநர் மாளிகை - உண்மை என்ன?
நீட் தேர்வு விலக்கு மசோதா பரிசீலனையில் உள்ளதாக ஆளுநர் மாளிகை தகவல் தெரிவித்துள்ளது. ஆனால், ஆளுநர் மாளிகையிலா ? குடியரசுத் தலைவர் மாளிகையிலா? என்பதுதான் கேள்விக்குறியாக உள்ளது.
நீட் தேர்வு விலக்கு மசோதா பரிசீலனையில் உள்ளதாக ஆளுநர் மாளிகை தகவல் தெரிவித்துள்ளது. ஆனால், ஆளுநர் மாளிகையிலா ? குடியரசுத் தலைவர் மாளிகையிலா? என்பதுதான் கேள்விக்குறியாக உள்ளது.
இதுகுறித்துக் கல்வியாளர் பிரின்ஸ் கஜேந்திர பாபு ஆளுநர் மாளிகைக்கு ஆர்டிஐ அனுப்பி உள்ளார். அதில் குறிப்பிடப்பட்டுள்ளதாக அவர் தெரிவித்துள்ளதாவது:
’’தமிழ்நாடு சட்டப் பேரவை இரண்டுமுறை நிறைவேற்றி அனுப்பிய மருத்துவ இளநிலைப் பட்டப் படிப்பு மாணவர் சேர்க்கைக்கான சட்ட முன் வடிவு மீது எடுக்கப்பட்ட நடவடிக்கை என்ன? சட்ட முன் வடிவின் தற்போதைய நிலை என்ன என்று தகவல் அறியும் உரிமைச் சட்டத்தின் கீழ் 2022 மார்ச் 29 அன்று ஆளுநர் செயலகத்திற்கு மனு அனுப்பப்பட்டது.
மிகவும் கால தாமதமாக (98 நாட்கள் கழித்து) ஜூலை 7, 2022 தேதியிட்ட கடிதம் ஜூலை 11, 2022 அன்று கிடைக்கப் பெற்றோம்.
பதில் கடிதத்தில் தெரிவிக்கப்பட்ட செய்தி அதிர்ச்சி தருவதாக உள்ளது.
"சம்மந்தப்பட்ட அதிகாரியின் பரிசீலனையில் உள்ளதாகவும், அதனால் கோரியத் தகவலைத் தெரிவிக்க இயலாது" என்றும் பதிலில் கூறப்பட்டுள்ளது.
"சம்மந்தப்பட்ட அதிகாரி"யின் பரிசீலனை என்றால் எவ்வாறு புரிந்து கொள்வது. ஆளுநர் செயலகத்திலா? அல்லது குடியரசுத் தலைவர் செயலகத்திலா?
ஆளுநர் மாளிகையில் இருந்து குடியரசுத் தலைவரின் ஒப்புதலுக்காக சட்ட முன் வடிவு அனுப்பப்பட்டுள்ளது என்று முதல் அமைச்சர் மு.க.ஸ்டாலின் சட்டப் பேரவையில் அறிவித்தார்.
முதல் அமைச்சர் அறிவித்து இரண்டு மாதங்கள் கழித்து, "சம்மந்தப்பட்ட அதிகாரியின் பரிசீலனை"யில் உள்ளது என்று தெளிவற்ற, நேரடி பதில் தருவதிலிருந்து தப்பிக்கும் சொல்லாடலை ஆளுநர் மாளிகை பயன்படுத்தி உள்ளதால், ஆளுநர் மாளிகையில் இருந்து சட்ட முன் வடிவு குடியரசுத் தலைவர் ஒப்புதலுக்குச் சென்றுள்ளதா? இல்லையா? என்ற கேள்வி எழுகிறது.
பதில் திருப்தியாக இல்லை, நேரடி பதில் வேண்டும் என்று கோரி ஆளுநர் செயலகத்தின் தகவல் தரும் அடுத்த நிலை அதிகாரிக்கு மேல் முறையீடு மனுவை அனுப்பி உள்ளோம்.
தமிழ்நாடு அரசு, சட்ட முன் வடிவின் தற்போதைய நிலை என்ன என்பதை அறிந்து, தெளிவான தகவலை மக்களுக்கு தெரிவிக்க வேண்டும் என்று கோரி முதல் அமைச்சருக்குக் கடிதம் அனுப்பி உள்ளோம்.
தமிழ்நாடு மக்களுக்கு சட்ட முன் வடிவு குறித்த உண்மை நிலையும் தெளிவான விடையும் தேவை’’.
இவ்வாறு கல்வியாளர் பிரின்ஸ் கஜேந்திர பாபு தெரிவித்துள்ளார்.
மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்
ABP நாடு செய்திகளை சமூக வலைத்தள பக்கங்களிலும் பின் தொடரலாம்
Before You Go
Pregnant Woman Attack On Train | ரயிலில் கர்ப்பிணிக்கு கொடூரம்”அந்த சைக்கோவை விடாதீங்க” ஹேமராஜின் பகீர் பின்னணி!
தலைப்பு செய்திகள்
ட்ரெண்டிங் செய்திகள்
