'’ஏன் இந்த பாரபட்சம்? ஆசிரியர் தகுதித் தேர்வில் MBC-க்கு அநீதி’’- எழும் கண்டனம்!

ஆசிரியர்களுக்கான சிறப்புத் தகுதித் தேர்வில் எம்பிசிகளுக்கான உரிமை மறுப்பா? பாமக நிறுவனர் ராமதாஸ் கண்டனம்!

சிறப்பு ஆசிரியர் தகுதித்தேர்வு

Source : சிறப்பு ஏற்பாடு

ஆசிரியர்களுக்கான சிறப்புத் தகுதித் தேர்வில் மிகவும் பிற்படுத்தப்பட்டோருக்கான உரிமை மறுக்கப்பட்டிருப்பது கண்டிக்கத்தக்கது என்று ராமதாஸ் தெரிவித்துள்ளார். 

இதுகுறித்து இன்று அவர் வெளியிட்டுள்ள எக்ஸ் பதிவில், ’’ஆசிரியர் பணியாற்றுவதற்கு தகுதித் தேர்வினை கட்டாயமாக்கி உச்சநீதிமன்றம் உத்தரவிட்டதையடுத்து பணியில் இருக்கும் ஆசிரியர்களுக்காக தமிழக ஆசிரியர் தேர்வு வாரியம் சார்பில் வரும் ஜூலை 4, 5 தேதிகளில் சிறப்புத் தகுதித் தேர்வு நடத்துவதற்கான அரசாணையை தமிழக அரசு கடந்த 14-ஆம் தேதி வெளியிடப்பட்டுள்ளது.

அதேவேளை, இதில் உள்ள தேர்ச்சி மதிப்பெண் நடைமுறை பல ஆண்டுகளாகத் தங்களை அர்ப்பணித்துப் பணியாற்றி வரும் ஆசிரியர்களிடையே பாகுபாட்டை ஏற்படுத்துவதாக உள்ளது.

2003, 2004 ஆண்டுகளில் வெளியிடப்பட்ட அரசாணைகள் மூலம் சத்துணவு அமைப்பாளர்கள் ஆசிரியர்களாகப் பணி ஈர்ப்பு செய்யப்பட்டபோது அனைவரும் 'பணியில் உள்ள ஒரே வகுப்பினர்' எனக் கருதப்பட்டனர். அவர்களுக்கு நடத்தப்பட்ட சிறப்புத் தேர்வுகளில், பொதுவான ஒரே குறைந்தபட்ச மதிப்பெண் மட்டுமே தேர்ச்சியாக நிர்ணயிக்கப்பட்டது.

சிறப்பு மதிப்பெண் சலுகை இல்லையா?

ஆனால் தற்போது ஆசிரியர்களுக்கான சிறப்புத் தகுதித் தேர்வில் தாழ்த்தப்பட்ட மற்றும் பழங்குடியினருக்கு 40 விழுக்காடு (150 க்கு 60) மதிப்பெண்களும், இதர பிற்படுத்தப்பட்டவர்கள் மற்றும் மாற்றுத்திறனாளிகளுக்கு 50 விழுக்காடு (150 க்கு 75) மதிப்பெண்களும் சிறப்புத் தளர்வாக அறிவிக்கப்பட்டுள்ளது.

அதேவேளை மாநிலத்தில் உள்ள எம்.பி.சி எனப்படும் மிகவும் பிற்படுத்தப்பட்ட பிரிவினருக்கு சிறப்பு மதிப்பெண் சலுகை அறிவிக்கப்படவில்லை. தமிழக அரசின் அனைத்து துறைகளிலும் மிகவும் பிற்படுத்தப்பட்டோருக்கான இட ஒதுக்கீடு உள்ள நிலையில் ஆசிரியர் தகுதித் தேர்வு மூலம் பணிநிலைப்பு தொடர்வதில் இப்பிரிவினர் புறக்கணிக்கப்பட்டுள்ளார்கள்.

இதனை  நினைக்கும் பொழுது வேதனையாக உள்ளது. 'சமூக நீதியின் தொட்டில்' என வாய்க்கு வாய் பேசும் திராவிட மாடல் அரசு ஏற்கனவே உள்ள ஒரு குறிப்பிட்ட இட ஒதுக்கீட்டு பிரிவினரை ஏன் புறக்கணிக்கிறது? இன்னொரு புறம் 'சமத்துவம்' பேசும் இந்த அரசு ஏற்கனவே பணியில் உள்ள ஆசிரியர்களுக்கான தேர்வில்  'சமத்துவத் தகுதி' முறையைத் பின்பற்றாமல் பாகுபாடு ஏற்படுத்துவது ஏன்?

இவ்வளவு வித்தியாசம் தேவையில்லை

மேலும் ஒரு பிரிவிற்கும் மற்றொரு பிரிவினருக்கும் 15 மதிப்பெண்கள் வித்தியாசம் உள்ளது. ஓரிரு மதிப்பெண் வேறுபாட்டிலேயே ஆயிரக் கணக்கில் இருப்பார்கள். இது நியமனத் தேர்வு அல்ல, தகுதித் தேர்வுதான். இதற்கு இவ்வளவு வித்தியாசம் தேவையில்லை.

இந்திய அரசியலமைப்புச் சட்டத்தின்படி, ஒரே நிலையில் உள்ள பணியாளர்களை தகுதிச் சோதனையின் போது மீண்டும் உட்பிரிவுகளாகப் பிரிப்பது சட்ட ரீதியான முரண்பாடுகளைத் தோற்றுவிக்கும். ஒரே பள்ளியில், ஒரே பாடத்தைப் போதிக்கும் இரு ஆசிரியர்களில், ஒருவருக்கு ஒரு தேர்ச்சி மதிப்பெண் தகுதியாகவும், மற்றொருவருக்கு வேறு மதிப்பெண் தகுதியாகவும் நிர்ணயிப்பது தேவையற்ற முரண்பாடுகளையே ஏற்படுத்தும்.

நிர்வாகச் சமச்சீர்

தமிழக அரசின் பிற துறைகளில் பணியில் உள்ளோருக்காக நடத்தப்படும் தகுதித் தேர்வுகளில், சமூகப் பிரிவினைக் கடந்து அனைவருக்கும் ஒரே மாதிரியான 45% மதிப்பெண் முறையே பல தசாப்தங்களாகப் பின்பற்றப்பட்டு வருகிறது. ஆகவே ஆசிரியர்களுக்கான சிறப்புத் தகுதித் தேர்வும் ஒரு துறை சார்ந்த தகுதித் தேர்வு என்பதால், இதிலும் ஒரே மதிப்பெண் முறையைப் பின்பற்றுவதே நிர்வாகச் சமச்சீரை உருவாக்கும்.

உச்ச நீதிமன்றம் பல்வேறு தீர்ப்புகளில் தகுதித் தேர்வு என்பது ஒரு 'வடிகட்டி' மட்டுமே என்றும், அதில் தளர்வுகள் வழங்குவது மாநில அரசின் கொள்கை முடிவு  என்றும் குறிப்பிட்டுள்ளது. எனவே, பணியில் உள்ள ஆசிரியர்களின் பணிப் பாதுகாப்பைக் கருத்தில் கொண்டு, குறைந்தபட்ச தகுதியான 40% (60 மதிப்பெண்கள்) என்பதை அனைவருக்கும் பொதுவாக்க வேண்டும்.

எனவே, பணியில் உள்ள அனைத்து ஆசிரியர்களுக்கும் 40 விழுக்காடு மதிப்பெண்களை பொதுவானதாக நிர்ணயிக்க வேண்டும் அல்லது மிகவும் பிற்படுத்தப்பட்டோருக்கு சலுகை மதிப்பெண் குறைத்து தனியாக அறிவிக்க வேண்டும்'’ என்று ராமதாஸ் கோரிக்கை விடுத்துள்ளார்.