NEET Coaching: ஹேப்பி நியூஸ்.. தொடங்கியது அரசுப்பள்ளி மாணவர்களுக்கான நீட் பயிற்சி வகுப்புகள்.. இது தெரியுமா?

தமிழகம் முழுவதும் அரசுப் பள்ளி மற்றும் அரசு உதவி பெறும் பள்ளி மாணவர்களுக்கு நீட் பயிற்சி வகுப்புகள் இன்று (நவ.26-ம் தேதி) தொடங்கியுள்ளன.

நீட்

தமிழகம் முழுவதும் அரசுப் பள்ளி மற்றும் அரசு உதவி பெறும் பள்ளி மாணவர்களுக்கு நீட் பயிற்சி வகுப்புகள் இன்று (நவ.26-ம் தேதி) தொடங்கியுள்ளன. வட்டத்துக்கு ஒரு மையம் என்ற வீதத்தில் 412 மையங்களில் பயிற்சி அளிக்கப்பட்டு வருகிறது.  

2018 முதல் நீட் பயிற்சி

தமிழ்நாட்டில் 2018ஆம் ஆண்டு முதல் நீட் தேர்வுக்கு மாநில அரசு சார்பில் இலவசப் பயிற்சி அளிக்கப்பட்டு வருகிறது. கொரோனா தொற்று காரணமாக பொதுமுடக்க காலத்தில் இணையம் மூலம் ஆன்லைன் பயிற்சி நடத்தப்பட்டது. எனினும் அது எதிர்பார்த்த அளவுக்கு மாணவர்கள் மத்தியில் வெற்றியைப் பெறவில்லை. 

இந்த நிலையில் கொரோனா தொற்று குறைந்ததை அடுத்து நேரடி முறையிலான நீட் பயிற்சி வகுப்புகள் மீண்டும் இந்த ஆண்டு முதல் தொடங்க உள்ளன. முதல் கட்டமாக வாரத்திற்கு ஒரு நாள் சனிக்கிழமைகளில் மட்டும் வகுப்புகள் நடைபெறும் என்று தெரிவிக்கப்பட்டுள்ளது. இதன்படி, மாநிலம் முழுவதும் நவம்பர் 19ஆம் தேதி முதல் பயிற்சி வகுப்புகள் தொடங்கப்படும் என்று அறிவிக்கப்பட்ட நிலையில், இன்று நீட் வகுப்புகள் தொடங்கி உள்ளன. 

412 மையங்களில் பயிற்சி

வட்டத்துக்கு ஒரு மையம் என்ற வீதத்தில் தமிழகம் முழுவதும் அரசுப் பள்ளி மற்றும் அரசு உதவி பெறும் பள்ளி மாணவர்களுக்கு 412 மையங்களில் பயிற்சி அளிக்கப்பட்டு வருகிறது.  சென்னையில் மட்டும் 13 மையங்களில், 1500 மாணவர்கள் பங்கேற்கின்றனர்.

வகுப்புகளில் பங்கேற்க பிற்படுத்தப்பட்ட பிரிவைச் சேர்ந்த மாணவர்கள் 60 சதவீத மதிப்பெண்களைப் பெற்றிருக்க வேண்டும். ஆதிதிராவிடர், பழங்குடியினர்  மற்றும் மாற்றுத்திறனாளி மாணவர்கள் 50 சதவீதம் மதிப்பெண்கள் பெற்றிருக்க வேண்டும்.

எங்கே, எப்போது, எப்படி வகுப்புகள்?

ஒவ்வொரு மையத்திலும் அரசு, அரசு உதவி பள்ளிகளில் இருந்து 11-ம் வகுப்பில் 20 பேரும், 12-ம் வகுப்பில் 50 பேரும் பயிற்சியில் பங்கேற்கின்றனர். ஒரு மையத்துக்கு 70 பேர் வீதம் மொத்தம் 28,840 மாணவர்களுக்கு நீட் பயிற்சி அளிக்கப்படுகிறது. வாரந்தோறும் சனிக்கிழமை காலை 9 முதல் மாலை 4 மணி வரை பயிற்சி அளிக்கப்பட உள்ளது. 

சென்னையில் எங்கே?

சென்னை மாவட்டத்தைப் பொறுத்தவரையில் அசோக் நகர் பெண்கள் மேல்நிலைப் பள்ளி, லேடி வெலிங்டன் அரசு மேல்நிலைப்பள்ளி, வில்லிவாக்கம் ஜி.கே.எம். காலனி அரசுப் பள்ளி, கோடம்பாக்கம் அரசுப் பள்ளி உள்ளிட்ட அரசுப் பள்ளிகளில் பயிற்சி நடைபெற்று வருகின்றன.