கையிலேயே எடுத்துச்செல்லலாம்; பக்கவாத, முதுகுத்தண்டு நோயாளிகளுக்கு குறைந்த விலையில் ரோபோ- அசத்தல் அறிமுகம்!
ஐஐடி சென்னை, வேலூர் கிறிஸ்தவ மருத்துவக் கல்லூரி ஆராய்ச்சியாளர்கள் இணைந்து கை மறுவாழ்வுக்காக குறைந்த விலையில், கையில் எடுத்துச் செல்லக்கூடிய பிளக்- அண்ட்-ட்ரெய்ன் ரோபோவை உருவாக்கியுள்ளனர்.
ஐஐடி மெட்ராஸ், சிஎம்சி வேலூர் ஆகியவை இணைந்து கை மறுவாழ்வுக்காக குறைந்த விலையில் உள்நாட்டுத் தயாரிப்பு ரோபோவை உருவாக்கியுள்ளன.
த்ரைவ் ரிஹாப் சொல்யூசன்ஸ்’ நிறுவனத்தால் வணிகப்படுத்தப்பட்ட, இந்த காப்புரிமை பெறப்பட்ட தொழில்நுட்பம் துல்லியமான சிகிச்சை இயக்கம், நிகழ்நேர தரவுகள் ஆகியவற்றை வழங்குவதுடன் பக்கவாதத்தால் பாதிக்கப்பட்ட, முதுகுத்தண்டில் காயமடைந்த நோயாளிகளுக்கு பயனுள்ளதாக இருப்பதையும் உறுதி செய்கின்றன. ஐஐடி சென்னை, வேலூர் கிறிஸ்தவ மருத்துவக் கல்லூரி (சிஎம்சி வேலூர்) ஆராய்ச்சியாளர்கள் இணைந்து கை மறுவாழ்வுக்காக குறைந்த விலையில், கையில் எடுத்துச் செல்லக்கூடிய பிளக்- அண்ட்-ட்ரெய்ன் ரோபோவை உருவாக்கியுள்ளனர்.
விலைகுறைந்த சாதனம்
PLUTO’ (plug-and-train robot) என்றழைக்கப்படும் இந்த சாதனத் தொழில்நுட்பத்துக்கு தொழில்நுட்ப பரிமாற்ற அலுவலகம் (TTO ICSR) மூலம் உரிமம் வழங்கப்பட்டது. த்ரைவ் ரிஹாப் சொல்யூஷன்ஸ் மூலம் வணிகப்படுத்தப்பட்ட இத்தொழில்நுட்பம் தற்போதைய மறுவாழ்வுச் சந்தையில் குறிப்பிட்ட அளவு இடைவெளியை நிவர்த்தி செய்கிறது. மருத்துவமனைகள், வீடுகளில் பயன்படுத்துவதற்கு ஏற்ப விலைகுறைந்த மறுவாழ்வுத் தீர்வுகளுக்கான தேவையைப் பூர்த்தி செய்யும் விதமாக இந்த புதுமையான சாதனம் நன்கு வடிவமைக்கப்பட்டுள்ளது.
1,000-க்கும் மேற்பட்ட நோயாளிகள் பயன்
‘ப்ளூட்டோ’ இந்தியாவில் உள்ள வீடுகளில் சோதிக்கப்பட்ட முதலாவது ஒரே உள்நாட்டு ரோபோவாகும். தீவிர சிகிச்சையை அணுகக் கூடியதாக அளிக்க முடியும் என நிரூபிக்கப்பட்டுள்ளது. கடந்த நான்காண்டுகளில் ப்ளூட்டோவினால் ஏற்கனவே 1,000-க்கும் மேற்பட்ட நோயாளிகள் பயனடைந்துள்ளனர்.
இந்த தயாரிப்பு, கல்வி ஆராய்ச்சி வெற்றிகரமாக சாமானிய மக்களைச் சென்றடையும் தயாரிப்பாக மாற்றப்பட்டால் ஆயிரக்கணக்கான நோயாளிகளுக்கு பயனளிக்கும் என்பதற்கு சிறந்த உதாரணமாகக் கொள்ளலாம் என்று ஐஐடி சென்னை தெரிவித்துள்ளது.
ஐஐடி மெட்ராஸ் இயந்திரப் பொறியியல் துறை பேராசிரியர் சுஜாதா சீனிவாசன் (முதன்மை ஆராய்ச்சியாளர்), ஐஐடி மெட்ராஸ் இயந்திரப் பொறியியல் துறை மற்றும் வேலூர் சிஎம்சி உயிரிபொறியியல் துறை ஆகியவற்றில் பிஎச்டி பெற்ற டாக்டர் அரவிந்த் நேருஜி, சிஎம்சி வேலூர் உயிரி பொறியியல் துறை பேராசிரியர் சிவகுமார் பாலசுப்ரமணியன் ஆகியோர் இந்த சாதனத்தைக் கண்டுபிடித்துள்ளனர். தொழில்நுட்ப பரிமாற்றம், வணிகப்படுத்துதல் ஆகியவற்றுக்கு ஐஐடி மெட்ராஸ் தொழிலக ஆலோசனை மற்றும் நிதிசார் ஆராய்ச்சி அலுவலகத்தில் உள்ள தொழில்நுட்ப பரிமாற்ற அலுவலக டிடிஓ-ஐபிஎம் செல் (TTO-IPM Cell) ஏற்பாடு செய்திருந்தது.
காப்புரிமை பெறப்பட்ட இத்தொழில்நுட்பம் துல்லியமான சிகிச்சை இயக்கங்களையும், நிகழ்நேர தரவுகளையும் வழங்குகிறது. பக்கவாதம், முதுகுத்தண்டு காயம், தண்டுவட மரப்புநோய் (multiple sclerosis), பார்கின்சன் நோய், அறுவைச் சிகிச்சைக்குப் பிந்தைய நோயாளிகள் உள்ளிட்டோருக்கு சிறந்த பயனளிக்கிறது.
மறுவாழ்வு மையங்கள், புறநோயாளிகளுக்கான மருத்துவமனைகள், பெரிய மருத்துவமனைகள், நோயாளிகளின் இல்லங்கள் ஆகியவற்றில் பயன்படுத்த இந்த சாதனம் மிகவும் பொருத்தமான ஒன்றாகும். பயனுள்ள அதே நேரத்தில் குறைந்த விலையில் கை மறுவாழ்வுத் தீர்வுகள் கிடைக்கச் செய்வதில் இருந்து வந்த இடைவெளி இதனால் குறைகிறது. விலை குறைவாக இருப்பது மட்டுமின்றி கையில் எடுத்துச் செல்லும் வகையில் இருப்பதால் சுகாதாரத் துறையில் மாற்றத்தை ஏற்படுத்தும் கருவியாக அமையும் என்று எதிர்பார்க்கப்படுகிறது.
தலைப்பு செய்திகள்
ட்ரெண்டிங் செய்திகள்
