மயிலாடுதுறை மாவட்டத்தில் காவல்துறையினர் அதிரடி : 70 பேர் குண்டாஸில் சிறையில் அடைப்பு..

மயிலாடுதுறை மாவட்டத்தில் நடப்பாண்டில் பல்வேறு குற்றச்செயல்களில் ஈடுபட்ட 70 சமூக விரோதிகளை குண்டர் தடுப்பு காவல் சட்டத்தில் சிறையில் அடைத்து எஸ்.பி கடும் நடவடிக்கை மேற்கொண்டுள்ளார்.

எஸ்பி மற்றும் குண்டாஸில் கைதான நபர்

Source : Abp

மயிலாடுதுறை: மயிலாடுதுறை மாவட்டம், சீர்காழி காவல் சரகத்தில் சட்டவிரோதமாக கஞ்சா மற்றும் போதைப் பொருட்கள் விற்கப்படுவதாகக் கிடைத்த இரகசியத் தகவலின் அடிப்படையில், கடந்த 19.09.2026-ம் தேதி அன்று சீர்காழி காவல்துறையினர் ராதாநல்லூர், படித்துறை குளம் பகுதியில் தீவிரமாகச் கஞ்சா சோதனையில் ஈடுபட்டனர். 

மேற்படி சோதனையின் போது, குறிப்பிட்ட பகுதியில் கஞ்சா விற்பனையில் மும்முரமாக ஈடுபட்டுக்கொண்டிருந்த கருணாமூர்த்தி (வயது 29), தந்தை பெயர் ராமமூர்த்தி, பெரிய தெரு, ராதாநல்லூர், சீர்காழி என்பவரை காவல்துறையினர் கையும் களவுமாகப் பிடித்துக் கைது செய்தனர். மேலும், அவர் பொதுமக்களுக்கு விற்பனை செய்வதற்காகத் தன்வசம் பதுக்கி வைத்திருந்த தடை செய்யப்பட்ட கஞ்சா பொருட்கள் யாவும் காவல்துறையினரால் முழுமையாகப் பறிமுதல் செய்யப்பட்டன. அதனைத் தொடர்ந்து, கஞ்சா விற்பனையில் ஈடுபட்ட அந்த நபர் மீது சட்டப்பூர்வமான நடவடிக்கைகள் எடுக்கப்பட்டு நீதிமன்றக் காவலுக்கு அனுப்பி வைக்கப்பட்டார்.

தடுப்பு காவல் சட்டத்தின் கீழ் சிறையில் அடைப்பு

மேற்படி நபர் தொடர்ந்து பல நாட்களாகச் சட்ட விரோதக் குற்றச் செயல்களில் ஈடுபட்டு வந்ததைக் கருத்தில் கொண்டும், பொது அமைதிக்குப் பங்கம் விளைவித்து வருவதைக் கவனத்தில் எடுத்து, குற்றவாளி கருணாமூர்த்தி மீது சாதாரணச் சட்ட நடவடிக்கைகளுக்குப் பதிலாக கடுமையான 'தடுப்பு காவல் சட்டத்தின்' கீழ் நடவடிக்கை எடுக்க வேண்டும் என மயிலாடுதுறை மாவட்ட காவல் கண்காணிப்பாளர் Dr.B.சினேஹா ப்ரியா, மயிலாடுதுறை மாவட்ட ஆட்சியருக்கு அதிகாரப்பூர்வமாகப் பரிந்துரை செய்தார்கள்.

காவல் கண்காணிப்பாளரின் இந்தப் பரிந்துரையின் அடிப்படையில், மயிலாடுதுறை மாவட்ட ஆட்சியர் நேற்று மேற்படி நபர் கருணாமூர்த்தி என்பவரைத் தடுப்பு காவல் சட்டத்தின்படி சிறையில் அடைப்பதற்கு உறுதியான உத்தரவைப் பிறப்பித்தார். மாவட்ட ஆட்சியரின் அந்த உத்தரவின்படி, கருணாமூர்த்தியை பலத்த பாதுகாப்போடு கடலூர் மத்திய சிறையில் முறைப்படி சிறையில் அடைக்கப்பட்டார்.

நடப்பாண்டில் மயிலாடுதுறை மாவட்டத்தில் தடுப்பு காவல் சட்டத்தின் கீழ் சிறையில் அடைக்கப்பட்டவர்கள்

மயிலாடுதுறை மாவட்டத்தில் சட்டம் மற்றும் ஒழுங்கைப் பேணிப் பாதுகாக்கும் பொருட்டு மாவட்டக் காவல் துறையினர் தொடர்ந்து பல்வேறு அதிரடி நடவடிக்கைகளை எடுத்து வருகின்றனர். இதன் ஒரு பகுதியாக, நடப்பாண்டில் மட்டும் மயிலாடுதுறை மாவட்டத்தில் பல்வேறு தீவிரக் குற்றச் செயல்களில் ஈடுபட்ட நபர்கள் மீது தடுப்பு காவல் சட்டம் பாய்ந்துள்ளது. அதன்படி, கொலை குற்ற சம்பவங்களில் ஈடுபட்டு பொதுமக்களிடையே அச்சத்தை ஏற்படுத்திய 05 நபர்கள் தடுப்பு காவல் சட்டத்தின் கீழ் சிறையில் அடைக்கப்பட்டுள்ளனர். மேலும், பொது அமைதிக்குத் தொடர்ந்து பங்கம் விளைவித்த 28 நபர்களும், சட்டவிரோத மதுவிலக்கு குற்றங்களில் ஈடுபட்டு வந்த 10 நபர்களும் இந்தச் சட்டத்தின் கீழ் கைது செய்யப்பட்டுள்ளனர். அதுமட்டுமின்றி, இளைய சமுதாயத்தைச் சீரழிக்கும் கஞ்சா விற்பனை குற்றங்களில் ஈடுபட்டு வந்த 22 நபர்களும், குட்கா மற்றும் தடை செய்யப்பட்ட புகையிலை பொருட்கள் விற்பனை குற்றங்களில் ஈடுபட்ட 01 நபரும், பெண்களுக்கும் குழந்தைகளுக்கும் எதிரான பாலியல் குற்றங்களில் ஈடுபட்ட 04 நபர்களும் உட்பட மொத்தம் 70 சமூக விரோத நபர்கள் நடப்பாண்டில் மட்டும் தடுப்பு காவல் சட்டத்தின் கீழ் நடவடிக்கை எடுக்கப்பட்டுச் சிறையில் அடைக்கப்பட்டுள்ளனர்.

மாவட்ட காவல் கண்காணிப்பாளரின் கடுமையான எச்சரிக்கை

மயிலாடுதுறை மாவட்டத்தில் சமுதாயத்திற்குத் கேடு விளைவிக்கும் சமூக விரோதச் செயல்களில் ஈடுபடும் எந்தவொரு நபரின் செயல்பாடுகளும் தொடர்ச்சியாகவும் தீவிரமாகவும் கண்காணிக்கப்பட்டு வருவதாகக் காவல் துறை தரப்பில் எச்சரிக்கப்பட்டுள்ளது. மேலும், பொதுமக்களை அச்சுறுத்தும் வகையில் ரௌடிசத்தில் ஈடுபடும் நபர்கள், பெண்கள் மற்றும் குழந்தைகளுக்கு எதிரான பாலியல் குற்றங்களில் ஈடுபடும் கொடூரமான நபர்கள், கஞ்சா மற்றும் தடை செய்யப்பட்ட புகையிலை பொருட்கள் போன்ற போதைப் பொருட்களை விற்பனை செய்பவர்கள் மற்றும் மதுவிலக்கு குற்றங்களில் ஈடுபடும் சட்டவிரோதச் செயல்களில் ஈடுபடுவோர் மீது தயவுதாட்சண்யமின்றித் தடுப்பு காவல் சட்டத்தின் கீழ் கடுமையான நடவடிக்கை மேற்கொள்ளப்படும் என மாவட்ட காவல் கண்காணிப்பாளர் அவர்கள் கடுமையாக எச்சரிக்கை விடுத்துள்ளார். மாவட்டத்தில் குற்றச் செயல்களை முற்றிலும் ஒழித்து, பொதுமக்கள் அமைதியாகவும் பாதுகாப்பாகவும் வாழ்வதற்கான சூழலை உறுதி செய்ய மாவட்டக் காவல் துறை இதுபோன்ற நடவடிக்கைகளைத் தொடர்ந்து தீவிரப்படுத்தும் எனத் தெரிவிக்கப்பட்டுள்ளது.