வயதான நபருடன் தொடர்பு.. மனைவியை கொன்ற கணவன்.. ஃப்ரிட்ஜில் இருந்த தலை.. நடந்தது என்ன?
அசாம் மாநிலம் கவுஹாத்தியில் உள்ள அடுக்குமாடி குடியிருப்பில் உள்ள வீடு ஒன்றில் இருந்து துர்நாற்றம் வருவதாக அக்கம் பக்கத்தினர் போலீசாருக்கு தகவல் தெரிவித்தனர்.
அசாம் மாநிலத்தில் வேறொருவருடன் தொடர்பில் இருந்த மனைவியை கணவர் தலையைத் துண்டித்து கொலை செய்த சம்பவம் பெரும் அதிர்ச்சியை ஏற்படுத்தியுள்ளது.
இந்த கொடூர சம்பவமானது அசாம் மாநிலம் கவுஹாத்தியில் நடைபெற்றுள்ளது. கடந்த செப்டம்பர் 6ம் தேதி அங்குள்ள அடுக்குமாடி குடியிருப்பில் உள்ள வீடு ஒன்றில் இருந்து துர்நாற்றம் வருவதாக அக்கம் பக்கத்தினர் போலீசாருக்கு தகவல் தெரிவித்தனர். சம்பவ இடத்திற்கு வந்த போலீசார் அங்குள்ளவர்களிடம் சம்பந்தப்பட்ட வீட்டில் தங்கியிருந்தவர்கள் பற்றி விசாரித்தனர்.
அப்போது ராமானுஜ் கோஸ்வாமி - ரியா தாலுக்தார் என்ற சமீபத்தில் திருமணமான தம்பதியினர் வசித்து வந்ததாகவும், அவர்களை கடந்த இரண்டு நாட்களாக காணவில்லை என்றும், துர்நாற்றம் வந்ததால் இருவரின் செல்போனுக்கு அழைத்து பார்த்தால் சுவிட்ச் ஆஃப் என வருவதாகவும் கூறினார். இதனால் சற்றும் தாமதிக்காமல் போலீசார் கதவை உடைத்து வீட்டுக்குள் சென்று பார்த்தனர். அங்கு கண்ட காட்சிகள் போலீசார் மட்டுமல்லாமல் அக்கம் பக்கத்தினரையும் அதிர்ச்சியில் உறைய வைத்தது.
அந்த வீட்டின் ஒரு அறையில் தலையில்லாமல் ஒரு பெண்ணின் உடல் கிடந்தது. அந்த சடலத்தின் விரல்கள் பகுதியளவு துண்டிக்கப்பட்டு கிடந்தது. சடலம் அழுகத் தொடங்கியதன் விளைவே துர்நாற்றம் வீசி வெளியே விஷயம் வெளிச்சத்துக்கு வந்துள்ளது. தொடர்ந்து வீடு முழுவதும் நடைபெற்ற சோதனையில் அந்த பெண்ணின் தலை ஃப்ரிட்ஜிக்குள் இருந்தது . அதனடிப்படையில் நடைபெற்ற விசாரணையில் கொலை செய்யப்பட்டது ரியா தாலுக்தார் என்பது தெரிய வந்தது. இதனைத் தொடர்ந்து இந்த கொலை சம்பவத்தில் கணவர் ராமானுஜ் கோஸ்வாமி காணாமல் போனதால் போலீசாரின் சந்தேகப் பார்வை அவர் பக்கம் திரும்பியது.
ராமானுஜ் கோஸ்வாமி எங்கு தேடியும் கிடைக்காத நிலையில் எதனால் இந்த கொலை நடைபெற்றது என தெரியாமல் போலீசார் குழம்பினர். எனினும் வழக்குப்பதிவு செய்து ராமானுஜ் கோஸ்வாமியை தீவிரமாக தேடி வந்தனர். அவரை கடைசியாக செப்டம்பர் 4ம் தேதி இரவு தனது வீட்டின் அருகே பார்த்ததாக அக்கம் பக்கத்தினர் தெரிவித்தனர். இதனிடையே செப்டம்பர் 6ம் தேதி இரவு அவர் போலீசார் சரணடைந்தார். இதற்கிடையில் ரியா தாலுக்தார் உடலும், தலையும் பிரேத பரிசோதனைக்காக அனுப்பப்பட்டிருந்தது. போலீசார் ராமானுஜ் கோஸ்வாமியை நீதிமன்றத்தில் ஆஜர்படுத்திய நிலையில் அவரை ஏழு நாட்கள் போலீஸ் காவலில் வைக்க நீதிபதி உத்தரவிட்டார். இதனைத் தொடர்ந்து சிறைக்கு ராமானுஜ் கோஸ்வாமி அழைத்து செல்லப்பட்டார்.
அப்போது, தனது மனைவியை கொன்று விட்டேன் எனவும், சிறையிலிருந்து வெளியே வந்தவுடன் அந்த சுகர் டாடியையும் கொல்வேன் எனவும் ஆவேசமாக கத்தினார். அந்த நபரை அடையாளம் காட்டுமாறு செய்தியாளர்கள் கேட்டபோது அவர் ஆவேசமாக நடந்துக் கொண்டார். இதன்மூலம் தகாத உறவு காரணமாக இந்த கொலை நடந்துள்ளது தெரிய வந்துள்ளது. இந்த சம்பவம் அசாம் மாநிலத்தில் பெரும் பரபரப்பை ஏற்படுத்தியுள்ளது.
தலைப்பு செய்திகள்
ட்ரெண்டிங் செய்திகள்
