சார்ஜ் போட்டா போதும்.. ஊர் சுத்தலாம்! டிவிஎஸ் முதல் ஓலா வரை.. கலக்கும் எலக்ட்ரிக் ஸ்கூட்டர்களின் லிஸ்ட் இதோ
நவீன தொழில்நுட்பத்தால் உருவான இந்த ஸ்கூட்டர்கள் இன்று ஒருமுறை சார்ஜ் செய்தால் 120 கிலோமீட்டர் முதல் அதிகபட்சமாக 400 கிலோமீட்டர் வரை பயணிக்கும் திறனைப் பெற்றுள்ளன.
நேற்றுவரை பெட்ரோல் வண்டிகளை மட்டுமே நம்பியிருந்த மக்கள், இன்று மின்சார வாகனங்களை நோக்கித் திரும்பத் தொடங்கிவிட்டனர். இதற்கு எரிபொருள் தட்டுப்பாடு மற்றும் விண்ணைத் தொடும் பெட்ரோல் விலை உயர்வு ஒருபுறம் என்றால், அரசு வழங்கும் ஊக்கத்தொகை மறுபுறம் முக்கிய காரணமாக அமைகிறது. தற்போதைய சூழலில் சந்தையில் சுமார் 63-க்கும் மேற்பட்ட மின்சார இருசக்கர வாகன மாடல்கள் அணிவகுத்து நிற்கின்றன.
பெட்ரோல் வாகனங்களோடு ஒப்பிடுகையில் மின்சார வாகனங்களின் பராமரிப்புச் செலவு மிகக் குறைவு என்பது ஒரு மிகப்பெரிய ப்ளஸ் பாயிண்ட். அதுமட்டுமின்றி, இவை சுற்றுச்சூழலுக்கு எந்தவித தீங்கும் விளைவிப்பதில்லை என்பதும் கவனிக்கத்தக்கது. நவீன தொழில்நுட்பத்தால் உருவான இந்த ஸ்கூட்டர்கள் இன்று ஒருமுறை சார்ஜ் செய்தால் 120 கிலோமீட்டர் முதல் அதிகபட்சமாக 400 கிலோமீட்டர் வரை பயணிக்கும் திறனைப் பெற்றுள்ளன.
டிவிஎஸ் மோட்டார்ஸ்
மின்சார வாகனப் போட்டியில் டிவிஎஸ் நிறுவனம் தனது ஐக்யூப் (iQube) சீரிஸ் மூலம் முன்னணியில் உள்ளது. இதன் ஆரம்ப விலை சுமார் 1,20,653 ரூபாய் ஆகும். இதில் 3.1kWh மற்றும் 3.5kWh என இரண்டு விதமான பேட்டரி வேரியண்ட்கள் உள்ளன. இவை 12 முதல் 145 கிலோமீட்டர் வரையிலான மைலேஜை வழங்குகின்றன. இந்த வரிசையில் அடுத்துள்ள ஐக்யூப் எஸ் மற்றும் எஸ்டி மாடல்கள் வாடிக்கையாளர்களை வெகுவாகக் கவர்ந்துள்ளன. இதில் உயர்தர மாடலான ஐக்யூப் எஸ்டி 5.3 kWh பேட்டரியுடன் வருகிறது. இது ஒருமுறை சார்ஜ் செய்தால் 212 கிலோமீட்டர் தூரம் வரை செல்லும். இதனுடைய விலை 1,77,309 ரூபாய் வரை நிர்ணயிக்கப்பட்டுள்ளது. குறைந்த விலையில் நல்ல ரேஞ்ச் எதிர்பார்க்கும் நபர்களுக்கு 158 கிலோமீட்டர் மைலேஜ் தரும் டிவிஎஸ் ஆர்பிட் ஒரு சிறந்த தேர்வாக அமையும்.
பஜாஜ் சேத்தக்
பஜாஜ் நிறுவனம் தனது அடையாளமான சேத்தக் பிராண்டை எலக்ட்ரிக் வடிவில் மீண்டும் கொண்டு வந்து வாடிக்கையாளர்களை வியப்பில் ஆழ்த்தியுள்ளது. இதில் சேத்தக் 3001 முதல் சி3501 வரை பல்வேறு மாடல்கள் கிடைக்கின்றன. இவற்றின் ரேஞ்ச் 127 கிலோமீட்டர் முதல் 153 கிலோமீட்டர் வரை அமைகிறது. இதன் விலையானது 1,11,785 ரூபாயிலிருந்து தொடங்குகிறது.
ஏத்தர் எனர்ஜி
இளைஞர்களின் ஃபேவரைட் பிராண்டான ஏத்தர், தனது ரிட்சா மற்றும் 450எக்ஸ் மாடல்கள் மூலம் சந்தையைக் கலக்கி வருகிறது. குறிப்பாக குடும்பத் தேவைகளுக்காக வடிவமைக்கப்பட்ட இந்த ஸ்கூட்டர் 20-க்கும் மேற்பட்ட வேரியண்ட்களில் கிடைக்கிறது. இதன் மைலேஜ் 123 கிமீ முதல் 159 கிமீ வரை உள்ளது. இதனுடைய அதிகபட்ச விலை 1,87,641 ரூபாய் ஆகும். ஸ்போர்ட்டி லுக் தேடுபவர்களுக்காக ஏத்தர் 450எக்ஸ் மாடலில் 6.4kW மோட்டார் பொருத்தப்பட்டுள்ளது, இது 161 கிமீ ரேஞ்ச் தருகிறது. அதேபோல் ஏத்தர் 450எஸ் மாடல் 1,31,574 ரூபாயிலிருந்து தொடங்குகிறது, இதுவும் 161 கிமீ ரேஞ்ச் கொண்ட வேரியண்ட்டை கொண்டுள்ளது.
ஹீரோ விடா
ஹீரோ மோட்டோகார்ப் நிறுவனத்தின் விடா பிராண்டும் சந்தையில் கடும் போட்டியை உருவாக்கி வருகிறது. விடா விஎக்ஸ்2 மாடல் 142 கிமீ ரேஞ்ச் வழங்குகிறது, இதன் விலை 1,06,872 ரூபாயிலிருந்து தொடங்குகிறது. அதேபோல் விடா வி2 ப்ரோ மற்றும் பிளஸ் மாடல்கள் அதிகபட்சமாக 165 கிமீ ரேஞ்ச் வழங்குகின்றன.
ஓலா எலக்ட்ரிக் மற்றும் பிற மாடல்கள்
ஓலா எஸ்இசட் மாடல் 64,343 ரூபாய் என்ற ஆரம்ப விலையில் கிடைக்கிறது, இது 46 கிமீ ரேஞ்ச் வழங்குகிறது. இதுதவிர 'எஸுவி' என்று அழைக்கப்படும் ரிவர் இண்டி ஸ்கூட்டர் 163 கிமீ ரேஞ்ச் தருகிறது, இதன் விலை 1,54,893 ரூபாயிலிருந்து தொடங்குகிறது. யமஹா இசி06 மாடல் 169 கிமீ ரேஞ்சையும், கொமாகி எஸ்இ அல்ட்ரா மாடல் சுமார் 418 கிமீ ரேஞ்சையும் தருவதாகத் தெரிவிக்கின்றன. மிகக் குறைந்த விலையில் 140 கிமீ ரேஞ்ச் தரும் செலோ ஜப் மாடலின் விலை 49,110 ரூபாயிலிருந்து தொடங்குகிறது.
உங்களது பெட்ரோல் செலவை மிச்சப்படுத்தவும், சுற்றுச்சூழலைப் பாதுகாக்கவும் விரும்பினால் தற்போது சந்தையில் உள்ள எலக்ட்ரிக் ஸ்கூட்டர்கள் மிகச்சிறந்த வாய்ப்பாகும். டிவிஎஸ் ஐக்யூப் போன்ற நம்பகமான மாடல்களோ அல்லது ஏத்தர் ரிட்சா போன்ற நவீன வசதிகள் கொண்ட ஸ்கூட்டர்களோ உங்களது பயண அனுபவத்தையே மாற்றியமைக்கும் என்பதில் சந்தேகமில்லை
தலைப்பு செய்திகள்
ட்ரெண்டிங் செய்திகள்
