Tata Sieera EV: சியாரா விலையில் மின்சார கார்..! 535KM ரேஞ்ச், 5 ஸ்டார் ரேட்டிங் - ரூ.8,400 EMI - முழு விவரங்கள்
Tata Sierra EV EMI Scheme: டாடா சியாராவின் இன்ஜின் எடிஷன் விலையில் 535 கிலோ மீட்டர் ரேஞ்ச் வழங்கக் கூடிய சியாராவின் மின்சார எடிஷனை வாங்குவதற்கான மாதந்திர தவணை விவரம் கீழே விளக்கப்பட்டுள்ளது.
Tata Sierra EV EMI Scheme: டாடா சியாரா மின்சார எடிஷனின் விலை, ரேஞ்ச் தொடர்பான விவரங்கள் கீழே பட்டியலிடப்பட்டுள்ளன.
டாடா சியாரா மின்சார எடிஷன்:
டாடா நிறுவனத்தின் லெஜண்டரி கார் மாடல்களில் ஒன்றான சியாராவின், மேம்படுத்தப்பட்ட இன்ஜின் எடிஷன் அண்மையில் வெளியாகி வாடிக்கையாளர்களிடையே நல்ல கவனத்தை ஈர்த்துள்ளது. அதன் தொடர்ச்சியாக தற்போது சியாராவின் மின்சார எடிஷனும் சந்தைப்படுத்தப்பட்டுள்ளது. எரிபொருள் விலையை கருத்தில் கொண்டு நல்ல தரமான, வசதியான மற்றும் பாதுகாப்பு அம்சங்கள் நிறைந்த வலுவான ரேஞ்ச் வழங்கக் கூடிய மின்சார காரை வாங்க விரும்புகிறீர்களா? ஆனால் பட்ஜெட் தான் உங்களுக்கு பிரச்னையா? கவலை வேண்டாம். சியாராவின் இன்ஜின் எடிஷன் விலையிலேயே, 535 கிலோ மீட்டர் ரேஞ்ச் அளிக்கக் கூடிய அதன் மின்சார எடிஷனை சொந்தமாக்குவதற்கான நிதி திட்ட விவரங்களை இந்த தொகுப்பில் அறியலாம்.
சியாரா EV விலை விவரங்கள்:
சியாராவின் மின்சார எடிஷனானது இரண்டு பேட்டரி பேக் ஆப்ஷன்களில் மொத்தம் 8 ட்ரிம்களில் விற்பனை செய்யப்படுகிறது. ரூ.18.79 லட்சத்தில் தொடங்கி ரூ.25.99 லட்சம் வரையிலான விலை வரம்பை கொண்டுள்ளது. இதன் 63KWh பேட்டரி பேக் கொண்ட என்ட்ரி லெவல் காரின் ஆன் - ரோட் விலையானது, சென்னையில் 19 லட்சத்து 93 ஆயிரம் ரூபாயை கடக்கிறது. இதில் எக்ஸ் - ஷோரூம் விலை 18 லட்சத்து 79 ஆயிரம் ரூபாயும், பதிவுதொகை 13 ஆயிரம் ரூபாயும், கப்பீட்டு தொகை 81 ஆயிரமும் மற்றும் இதர செலவுகள் 19 ஆயிரம் ரூபாயும் அடங்கும்.
சியாரா இன்ஜின் எடிஷன் விலையில் மின்சார கார்:
சியாரா இன்ஜின் எடிஷனின் விலையானது ரூ.11.49 லட்சத்தில் தொடங்கி ரூ.25.99 லட்சம் வரை நீள்கிறது. ஒருவேளை உங்களிடம் ரூ.14.45 லட்சம் ஆன் ரோட் விலையிலான இதன் என்ட்ரி லெவல் ஸ்மார்ட் ப்ளஸ் காரை வாங்குவதற்கான தொகை கையிலிருந்து, ஒரு நல்ல தரமான லெஜண்டரி காரின் மின்சார எடிஷனை சொந்தமாக்க விரும்புகிறீர்களா? அதற்கான வலுவான நிதி திட்டங்களை ஆன் - ரோட் விலை அடிப்படையில் வங்கிகள் வழங்குகின்றன. அதன்படி, நீங்கள் ரூ.14.45 லட்சம் ரூபாயை டவுன் - பேமண்டாக செலுத்திவிட்டு, மீதமுள்ள சுமார் ரூ.5.5 லட்சத்திற்கு கடனாக பெற்று வங்கியின் மாதந்திர தவணை திட்டத்தை பயன்படுத்தலாம்.
சியாரா EV - மாதாந்திர தவணை திட்டங்கள்
சியாரா மின்சார காரின் மொத்த விலையான ரூ.19.93 லட்சத்தில் ரூ.14.45 லட்சத்தை டவுன் -பேமண்டாக செலுத்தி, மீதமுள்ள ரூ.5.5 லட்சத்தை கடனாக வாங்குவதாக கருதுவோம். யூனியன் பேங்க் ஆஃப் இந்தியாவில் மின்சார கார்களுக்கு குறைந்தபட்சமாக 7.5 சதவிகித வட்டியிலேயே கடன் கிடைக்கிறது. 7 ஆண்டுகளுக்கு 7.5 சதவிகித வட்டியுடன் மாதாந்திர தவணை முறையில் திருப்பி செலுத்தும் வாய்ப்பு கிடைத்தால், ஒட்டுமொத்தமாக 7 லட்சத்து 8 ஆயிரம் ரூபாயை நீங்கள் செலுத்த வேண்டி இருக்கும். மாதாந்திர தவணை சுமார் ரூ.8,400 மட்டுமே ஆகும். 7 ஆண்டுகள் முடிவில் அந்த காருக்காக ஒட்டுமொத்தமாக நீங்கள் 21 லட்சத்து 53 ஆயிரம் ரூபாயை செலுத்தி இருப்பீர்கள். எரிபொருள் செலவு சேமிப்பு மற்றும் உங்களுக்கு கிடைக்கும் சொகுசான பயண அனுபவத்தை கருத்தில் கொண்டால, நீங்கள் கூடுதலாக வட்டிக்கு மட்டுமே செலுத்தும் ஒரு லட்சத்து 58 ஆயிரம் ரூபாயை என்பது உங்களது சேமிப்பாகவே அமையும்.
சியாரா EV - 535KM ரேஞ்ச்
63kWh பேட்டரி பேக்கானது 238PS மற்றும் 315Nm ஆற்றலை உற்பத்தி செய்து 535 கிலோ மீட்டர் வரையிலான ரேஞ்சை வழங்கும் என தெரிவிக்கப்பட்டுள்ளது. நிஜ உலக பயன்பாட்டில் 440 முதல் 460 கிலோ மீட்டர் தூரம் வரை இடைநிற்றலின்றி பயணிக்க முடியும் என கூறப்படுகிறது. டிசி ஃபாஸ்ட் சார்ஜிங்கை பயன்படுத்தினால் 15 நிமிடங்களில் 263 கிலோ மீட்டர் தூரத்திற்கு பயணிக்கும் அளவிலான சார்ஜிங் நிலையை கார் எட்டும் என டாடா தரப்பு உறுதியளித்துள்ளது. இந்த பேட்டரிக்கு வாழ்நாள் (15 ஆண்டுகள்) வாரண்டியையும் உள்ளூர் வாகன உற்பத்தி நிறுவனம் வழங்கியுள்ளது.
சியாரா EV - 5 ஸ்டார் ரேட்டிங்
சியாராவின் மின்சார எடிஷனும் பாதுகாப்பு பரிசோதனையில் 5 ஸ்டார் ரேட்டிங்கை பெற்றுள்ளது. இதற்காக அனைத்து வேரியண்ட்களிலும் 6 ஏர் பேக்குகளை வழங்கியுள்ளது. இதுபோக ஆல் வீல் டிஸ்க் ப்ரேக்குகள், எலெக்ட்ரானிக் ஸ்டெபிலிட்டி கன்ட்ரோல், குழந்தைகளுக்கான ஐசோஃபிக்ஸ் இருக்கைகள், டயர் ப்ரஷர் மானிட்டரிங் சிஸ்டம், டாப் வேரியண்ட்களில் லெவல் 2 ADAS அம்சங்கள், முன் மற்றும் பின்புற சென்சார்களுடன் கூடிய 540 டிகிரி கேமரா, SOS அழைப்பு வசதி ஆகிய அம்சங்களும் இணைக்கப்பட்டுள்ளன. மேலும் வெளிப்புற பாதுகாப்பிற்காக அதிக வலுவான ஸ்டீல் பயன்படுத்தப்பட்டுள்ளது.
சியாரா EV - அம்சங்கள், வசதிகள்
12.3 இன்ச் செண்ட்ரல் இன்ஃபோடெயின்மெண்ட், 12.3 இன்ச் கோ பேசஞ்சர் டிஸ்பிளே மற்றும் 10.25இன்ச் டிஜிட்டல் ட்ரவர் டிஸ்பிளே என 3 டச்ஸ்க்ரீன்கள் உள்ளன. 30-க்கும் மேற்பட்ட செயலிகளை உள்ளடக்கிய பில்ட் - இன் ஆர்கேட் சூட், கேமிங் வசதி, 12 ஸ்பீக்கர் ஜேபிஎல் டால்பி அட்மாஸ் சிஸ்டத்துடன் கூடிய சானிக்ஷாஃப்ட் சவுண்ட் பார், மெமரி ஃபங்க்சனுடன் கூடிய வெண்டிலேடட் மற்றும் 6 வழிகளில் அட்ஜெஸ்ட் செய்யக்கூடிய முன்புற இருக்கைகள், சக முன்புற பயணிக்கு பாஸ் மோட் இருக்கை, டூயல் ஜோன் க்ளைமேட் கன்ட்ரோல், பனோரமிக் சன்ரூஃப் என ஏராளமான அம்சங்களும் இதில் இணைக்கப்பட்டுள்ளன.
தலைப்பு செய்திகள்
ட்ரெண்டிங் செய்திகள்
