Nissan Tekton Analysis: நிசான் டெக்டன வாங்கலாமா.? வேண்டாமா.? வாங்குவதற்கு 3 காரணங்கள், தவிர்ப்பதற்கு 3 காரணங்கள் இதோ
இந்திய சந்தையில் நுழைந்துள்ள நடுத்தர அளவு எஸ்யூவியான நிசான் டெக்டனை வாங்குவதற்கான முதல் 3 காரணங்கள் மற்றும் அதை வாங்காமல் இருப்பதற்கான 3 காரணங்கள் இதோ. செயல்திறன், அம்சங்கள், மைலேஜ், பூட் ஸ்பேஸ் குறித்த ஒரு முழுமையான பகுப்பாய்வு.
இந்திய நடுத்தர எஸ்யூவி சந்தையில் போட்டியை மேலும் விறுவிறுப்பாக்கும் வகையில், நிசான் நிறுவனம் தனது புதிய முதன்மை எஸ்யூவியான டெக்டனை இந்த மாதம் சந்தையில் அறிமுகப்படுத்தியுள்ளது. ரூ.10.49 லட்சம் முதல் ரூ.18.59 லட்சம் (எக்ஸ்-ஷோரூம்) வரையிலான விலையில் கிடைக்கும் இந்த எஸ்யூவி, ரெனால்ட் டஸ்டரின் ஒரு பிளாட்ஃபார்ம் பார்ட்னராகும். ஆனால், விலையில் டஸ்டரை விட சற்றே அதிகமாக உள்ள டெக்டன், உண்மையிலேயே கூடுதல் மதிப்பை வழங்குகிறதா.? வாங்குவதற்கான பலங்கள் என்ன.? வாங்காமல் இருப்பதற்கான குறைபாடுகள் என்ன.? முழு விவரங்களையும் இங்கே தெரிந்துகொள்வோம்.
வாங்குவதற்கான காரணங்கள்
டெக்டனை வாங்குவதற்கான முதல் முக்கிய காரணம், அது வழங்கும் சிறந்த ஓட்டுதல் மற்றும் கையாளும் சமநிலை ஆகும். மோசமான சாலைகளில் உள்ள பெரிய பள்ளங்களை எதிர்கொள்ளும்போதும் இந்த எஸ்யூவி தனது நிலைத்தன்மையை இழப்பதில்லை. பயணிகளுக்கு வசதியான பயணத்தை வழங்குவதோடு மட்டுமல்லாமல், நகரச் சாலைகளில்கூட இதன் சஸ்பென்ஷன் எங்கும் கடினமாக உணரப்படுவதில்லை. நெடுஞ்சாலையில் கூர்மையான திருப்பங்களை எடுக்கும்போதுகூட, பாடி ரோல் நன்கு கட்டுப்படுத்தப்படுகிறது. ஸ்டீயரிங்கில் கொடுக்கப்பட்டுள்ள லைட் மற்றும் ஹெவி மோடுகள் தேவைக்கேற்ப செயல்படுகின்றன. பிரேக்கிங் செயல்திறனும் நம்பிக்கையைத் ஏற்படுததும் அளவில் உள்ளது. இது ஓட்டுதலை விரும்புபவர்களுக்கு டெக்டனை ஒரு சிறந்த தேர்வாக ஆக்குகிறது.
இரண்டாவது பலம், ப்ரீமியம் கேபின் மற்றும் நவீன அம்சங்கள் ஆகும். லெதரெட் டாஷ்போர்டு, டோர் பேட்கள், பர்கண்டி, கோல்டு மற்றும் லைட் க்ரீம் வண்ணத் திட்டம் ஆகியவை கேபினுக்கு ஒரு கவர்ச்சிகரமான தோற்றத்தை அளிக்கின்றன. ஓட்டுநர் இருக்கை நிலை மிகச் சிறப்பாக உள்ளது மற்றும் அனைத்து பக்கங்களிலும் நல்ல பார்வைத் தெளிவு இருக்கிறது. முன் மற்றும் பின் இருக்கைகள் நீண்ட பயணங்களின்போதும் வசதியாக உள்ளன. பின் இருக்கைப் பயணிகளுக்கு USB சார்ஜிங் போர்ட்கள், ஏசி வென்ட்கள், சென்டர் ஆர்ம்ரெஸ்ட் மற்றும் கப் ஹோல்டர்கள் கிடைக்கின்றன. உயர் ரக மாடல்களில் பனோரமிக் சன்ரூஃபும் கிடைக்கிறது.
மூன்றாவது முக்கிய காரணம் விசாலமான பூட் ஸ்பேஸ் ஆகும். 518 லிட்டர் கொள்ளளவுடன், டெக்டன் அதன் பிரிவில் மிகப்பெரிய பூட் ஸ்பேஸை வழங்குகிறது. நீங்கள் குடும்பத்துடன் நீண்ட பயணங்கள் மேற்கொண்டாலும் சரி, அல்லது விமான நிலையத்திலிருந்து அதிக சாமான்களை கொண்டு வர வேண்டியிருந்தாலும் சரி, இடத்திற்கு எந்தக் குறைவும் இல்லை. மேலும், இந்த பூட்டில் ஒரு முழு அளவு ஸ்பேர் சக்கரமும் உள்ளது.
வாங்காததற்கான காரணங்கள்
இருப்பினும், டெக்டனில் சில பலவீனங்கள் உள்ளன. முதல் குறைபாடு என்ஜின் செயல்திறன். 100 hp திறன் கொண்ட 1.0-லிட்டர் டர்போ பெட்ரோல் என்ஜின், நகரப் பயன்பாட்டிற்கு போதுமானதாக இருந்தாலும், வேகமான செயல்திறனை விரும்புபவர்களை இது ஏமாற்றமடையச் செய்யும். 3,000 RPM வரை டர்போ லேக் தெளிவாகத் தெரிகிறது. அடிக்கடி கியர்களை மாற்ற வேண்டியிருப்பது, ஓட்டுதலை சற்று அசௌகரியமாக்குகிறது.
163 hp திறன் கொண்ட 1.3-லிட்டர் டர்போ பெட்ரோல் என்ஜின் ஓரளவு சிறப்பாக இருந்தாலும், அது எல்லா பிரச்னைகளையும் தீர்ப்பதில்லை. குறைந்த RPM-ல் ஏற்படும் டர்போ லேக் காரணமாக, செங்குத்தான சாலைகளில் தொடக்க வேகம் எதிர்பார்த்தபடி இருப்பதில்லை. 6-ஸ்பீடு DCT கியர்பாக்ஸ் கியர்களை மென்மையாக மாற்றினாலும், பதிலளிப்பதில் சற்று மெதுவாக உள்ளது. ஸ்போர்ட் மோட் இல்லாததும், செயல்திறனை விரும்பும் ஓட்டுநர்களுக்கு ஒரு குறைபாடாகும்.
இரண்டாவது குறைபாடு, மைலேஜ். இது டஸ்டருடன் அதே பவர்டிரெய்னைப் பகிர்ந்துகொள்வதால், நிஜ உலகப் பயன்பாட்டில் டெக்டன் சிறப்பான எரிபொருள் சிக்கனத்தை வழங்கும் என்று எதிர்பார்க்கப்படவில்லை. 1.0-லிட்டர் MT வேரியன்ட் ஒரு லிட்டருக்கு சுமார் 10.98 கி.மீ மைலேஜையும், 1.3-லிட்டர் DCT வேரியன்ட் ஒரு லிட்டருக்கு சுமார் 10.47 கி.மீ மைலேஜையும், மற்றும் 1.3-லிட்டர் MT வேரியன்ட் ஒரு லிட்டருக்கு சுமார் 10.64 கி.மீ மைலேஜையும் வழங்குகிறது. இந்த புள்ளிவிவரங்கள் இந்த பிரிவில் சிறந்தவை அல்ல.
மூன்றாவது குறைபாடு, சில அம்சங்களின் செயலாக்கத்தில் உள்ளது. 360-டிகிரி கேமராவின் தெளிவுத்திறன் எதிர்பார்த்த அளவுக்குத் தெளிவாக இல்லை. இதனால், சில சூழ்நிலைகளில் அதை பயன்படுத்துவது கடினமாக உள்ளது. லெவல் 2 ADAS இருந்தபோதிலும், லேன் கீப் அசிஸ்ட்டால் வாகனத்தை சாலையின் நடுவில் திறம்பட வைத்திருக்க முடியவில்லை. மேலும், முன்னால் போக்குவரத்து நகரத் தொடங்கியவுடன், வாகனத்தை நிர்ணயிக்கப்பட்ட வேகத்திற்கு விரைவாக திரும்பக் கொண்டு வருவதில் அடாப்டிவ் க்ரூஸ் கண்ட்ரோல் அவ்வளவு திறம்பட செயல்படுவதில்லை.
சிறப்பம்சங்கள்
சிறப்பம்சங்களைப் பொறுத்தவரை டெக்டன் பின்தங்கிவிடவில்லை. டிஜிட்டல் இன்ஸ்ட்ரூமென்ட் கிளஸ்டர், காற்றோட்ட வசதியுடன் கூடிய பவர் முன் இருக்கைகள், வயர்லெஸ் ஆப்பிள் கார்ப்ளே மற்றும் ஆண்ட்ராய்டு ஆட்டோ, உள்ளமைக்கப்பட்ட கூகுள் ஆப்ஸ், வாய்ஸ் அசிஸ்டன்ட், டூயல்-ஜோன் கிளைமேட் கண்ட்ரோல், லெவல் 2 ADAS போன்ற சிறப்பம்சங்கள் இந்த எஸ்யூவியை மேலும் கவர்ச்சிகரமானதாக ஆக்குகின்றன. பொருட்களை வைப்பதற்கான இடமும் தாராளமாக உள்ளது. இது, குடும்பப் பயன்பாட்டிற்கு பயனுள்ளதாக இருக்கும்.
ஒட்டுமொத்தமாக, சிறந்த பயண அனுபவம், ப்ரீமியம் கேபின், நவீன அம்சங்கள் மற்றும் விசாலமான பூட் ஸ்பேஸ் ஆகியவற்றை விரும்புபவர்களுக்கு நிசான் டெக்டன் ஒரு நல்ல தேர்வாகும். இருப்பினும், வலுவான என்ஜின் செயல்பாடு, அதிக மைலேஜ் மற்றும் மேம்பட்ட அம்சச் செயலாக்கத்தை விரும்புபவர்கள், இது தங்கள் தேவைகளுக்கு பொருந்துமா என்பதை பார்க்க, வாங்குவதற்கு முன் இதை டெஸ்ட் டிரைவ் செய்து பார்க்க வேண்டும்.
தலைப்பு செய்திகள்
ட்ரெண்டிங் செய்திகள்
