Renault Duster Hybrid: டஸ்டர் ஹைப்ரிட் எப்படி இருக்கு? முன்பதிவு, விலை, அம்சங்கள்.. ரெனால்ட் மிட்-சைஸ் எஸ்யுவி
Renault Duster Hybrid SUV: இந்திய ஆட்டோமொபைல் சந்தையில் ரெனால்ட் நிறுவனம் வலுவான ஹைப்ரிட் அம்சத்துடன் டஸ்டர் எஸ்யுவியை அறிமுகப்படுத்தியுள்ளது.
Renault Duster Hybrid SUV: ரெனால்ட் டஸ்டர் ஹைப்ரிட் எடிஷனின் அம்சங்கள், வசதிகள் மற்றும் விலை தொடர்பான விவரங்களை இந்த தொகுப்பில் அறியலாம்.
ரெனால்ட் டஸ்டர் ஹைப்ரிட் இன்ஜின்
இந்திய ஆட்டோமொபைல் சந்தையில் வலுவான கம்பேக்கை கொடுக்க ரெனால்ட் நிறுவனம் முனைப்பு காட்டி வருகிறது. இதற்கான வலுவான அடித்தளத்தை அமைக்க புதிய தலைமுறை டஸ்டர் கார் மாடலை அறிமுகப்படுத்தியுள்ளது. உள்நாட்டு சந்தையில் இந்த காரானது டாடா சியாரா, ஹுண்டாய் க்ரேட்டா மற்றும் கியா செல்டோஸ் போன்ற மாடல்களுடன் போட்டியிட உள்ளது. இதுபோக வலுவான ஹைப்ரிட் அம்சங்களை கொண்ட, டொயோட்டா ஹைரைடர், மாருதி சுசூகி க்ராண்ட் விட்டாரா மற்றும் விக்டோரிஸ் கார் மாடலுடன் போட்டியை எதிர்கொள்கிறது. ஏற்கனவே எதிர்பார்க்கப்பட்டதை போன்றே இரண்டு டர்போ இன்ஜின் ஆப்ஷன்களை கொண்டிருந்தாலும், வரும் தீபாவளி முதல் டஸ்டரில் வலுவான ஹைப்ரிட் இன்ஜின் ஆப்ஷனும் வழங்கப்படும் என ரெனால்ட் தெரிவித்துள்ளது. ஃபார்முலா 1 போட்டிகளில் உள்ள அனுபவம் மற்றும் தொழில்நுட்ப திறனை பயன்படுத்தி, E-Tech எனும் புதிய ஹைப்ரிட் அம்சத்தை வடிவமைத்ததாக விளக்கமளித்துள்ளது.
டஸ்டர் மாடலுக்கான ஹைப்ரிட் இன்ஜின் விவரங்கள்:
டஸ்டர் மாடலில் இடம்பெற்றுள்ள வலுவான ஹைப்ரிட் அமைப்பானது, 2 மின்சார மோட்டார்களுடன் கூடிய நேட்சுரலி ஆஸ்பிரேடட் 1,789சிசி 4 சிலிண்டர் பெட்ரோல் இன்ஜினை கொண்டுள்ளது. இரண்டு மோட்டார்களில் 20hp யூனிட்டானது ஜெனரேட்டராக செயல்பட, 49hp மோட்டாரானது சக்கரங்களுக்கு ஆற்றலை கடத்துகிறது. இரண்டும் சேர்ந்து 1.4KWh பேட்டரி பேக்கின் ஆதரவுடன் 160hp மற்றும் 172Nm ஆற்றலை உற்பத்தி செய்கிறது. HR18 என்ற கோட்நேமை கொண்ட இந்த இன்ஜின், ரெனால்ட் மற்றும் கீலிக்கு சொந்தமான பவர்டிரெய்ன் தீர்வுகள் நிறுவனமான ஹார்ஸ் பவர்டிரெய்னால் உருவாக்கப்பட்டுள்ளது. இந்த நிறுவனம் இன்டர்னல் கம்பஸ்டன், ஹைப்ரிட் அமைப்புகள் மற்றும் ட்ரான்ஸ்மிஷனில் வடிவமைப்பில் நிபுணத்துவம் பெற்றது குறிப்பிடத்தக்கது.
ரெனால்ட் ஹைப்ரிட் இன்ஜினின் திறன், செயல்பாடு?
ஹைரைடர், க்ராண்ட் விட்டாரா மற்றும் விக்டோரிஸில் காணப்படும் டொயோட்டா நிறுவனத்தின் ஹைப்ரிட் அமைப்பைப் போல் இன்றி, ரெனால்ட்டின் E டெக் அமைப்பு வித்தியாசமாக செயல்படுகிறது. டஸ்டரின் ஹைப்ரிட் பெட்ரோல் இன்ஜினை எலெக்ட்ரிக் ட்ரைவ் மற்றும் பேட்டரியுடன் இணைக்கிறது. மேலும் இது மல்டி-மோட் ஆட்டோமேட்டிக் கியர்பாக்ஸ் மூலம் சக்கரங்களுக்கு சக்தியை அனுப்புகிறது. டொயோட்டாவின் முழு ஹைப்ரிட் பெரும்பாலும் ஸ்டெப்-ஃப்ரீ ட்ரைவிங் உணர்விற்காக e-CVT மற்றும் பவர் ஸ்பிளிட் சாதனத்தைப் பயன்படுத்துகிறது, இது டொயோட்டாவின் 0.76kWh யூனிட்டுடன் ஒப்பிடும்போது பெரிய 1.4kWh பேட்டரி பேக்கையும் பயன்படுத்துகிறது. இருப்பினும், நிஜ உலக எரிபொருள் சிக்கனம் இன்னும் போக்குவரத்து நிலைமைகள், வேகம், சுற்றுப்புற வெப்பநிலை மற்றும் ஓட்டுநர் பாணியைப் பொறுத்தது. இருப்பினும், நகர ஓட்டுதல்களில் 80 சதவிகிதத்தை EV பயன்முறையில் செய்ய இந்த இன்ஜின் உதவும் என்று ரெனால்ட் விளக்குகிறது.
டஸ்டர் ஹைப்ரிட் எடிஷன் - அம்சங்கள்
உயர்த்தப்பட்ட சென்டர் கன்சோல் எலெக்ட்ரானிக் ஷிஃப்டரை ஒருங்கிணைக்கிறது. அதே நேரத்தில் அடிக்கடி பயன்படுத்தப்படும் அம்சங்களுக்கு பிஷிகல் சுவிட்சுகள் வழங்கப்பட்டுள்ளன. இருக்கைகள் மஞ்சள் நிற ஸ்டிட்சிங் மற்றும் கேபின் மவுண்டன் ஜேட் லெதரெட், கார்பன்-டெக்ஸ்ச்சர்டு மேற்பரப்புகள் மற்றும் உலோக சிறப்பம்சங்களுடன் பினிஷிங் செய்யப்பட்டுள்ளது. காற்றோட்டமான மற்றும் பவர்ட் அட்ஜெஸ்ட் செய்யக்கூடிய முன் இருக்கைகள், PM2.5 ஃபில்டருடன் டூயல் ஜோன் க்ளைமேட் கன்ட்ரோல், எலெக்ட்ரிக் பனோரமிக் சன்ரூஃப், பவர்ட் டெயில்கேட் மற்றும் மொத்தம் 32.6 லிட்டர் போதுமான உட்புற சேமிப்பு ஆகியவை உள்ளன.
டஸ்டர் ஹைப்ரிட் எடிஷன் - வசதிகள்
புதிய டஸ்டர் அதன் முந்தைய எடிஷனிலிருந்து மிகவும் வேறுபட்ட தொழில்நுட்பத்தைக் கொண்டுள்ளது. மையத்தில் கூகுள் இன்டக்ரேட் செய்யப்பட்ட 10.1-இன்ச் ஓபன்ஆர் லிங்க் டச்ஸ்கிரீன் உள்ளது. ஸ்மார்ட்போனின் பிரதிபலிப்பு இல்லாமல் சொந்த கூகுள் மேப்ஸ், அசிஸ்டண்ட் மற்றும் ப்ளே ஸ்டோர் அணுகலை வழங்கும் இந்தியாவின் முதல் வெகுஜன சந்தை கார் என்ற பெருமையை பெறுகிறது. 10.25-இன்ச் டிஜிட்டல் ட்ரைவர் டிஸ்ப்ளே நேவிகேஷன் மட்டுமின்றி 60 க்கும் மேற்பட்ட கனெக்டட் அம்சங்கள் இடம்பெற்றுள்ளன. ADAS சூட் மூலம் 17 செயல்பாடுகள், ஹில் டிஸ்செண்ட் கன்ட்ரோல் மற்றும் மல்டி-சென்ஸ் ட்ரைவ் மோட் ஆகியவை வழங்கப்பட்டுள்ளன. 35 வகையான பாதுகாப்பு அம்சங்களுடன், ரெனால்ட் ஃபாரெவர் திட்டத்தின் கீழ் டஸ்டருக்கு ஏழு ஆண்டுகள் அல்லது 1,50,000 கிமீ வரை உத்தரவாதமும் வழங்கப்படும்.
டஸ்டர் ஹைப்ரிட் எடிஷன் - விலை விவரங்கள்:
டஸ்டர் கார் மாடலுக்கான முன்பதிவு ரெனால்டின் அதிகாரப்பூர்வ விற்பனை நிலையங்களில் தொடங்கியுள்ளது. விருப்பமுள்ளவர்கள் ரூ.21 ஆயிரம் என்ற கட்டணத்தை செலுத்தி முன்பதிவு மேற்கொள்ளலாம். டர்போ இன்ஜின் எடிஷன்களுக்கான விநியோகம் ஏப்ரல் மாதம் முதலும், ஹைப்ரிட் எடிஷன்களுக்கான விநியோகம் தீபாவளி சீசனுக்கும் தொடங்கும் என அறிவிக்கப்பட்டுள்ளது. காருக்கான விலை 9.5 லட்சத்தில் தொடங்கி 19 லட்சம் ரூபாய் வரை நீளக்கூடும் என கணிக்கப்பட்டுள்ளது. டாப் எண்டாக நிற்கக் கூடிய ஹப்ரிட் எடிஷன் விலை சுமார் 19 லட்சமாக இருக்கலாம். இதன் மூலம் ஹைப்ரிட் பிரிவில் தனக்கான போட்டியாளர்களை காட்டிலும், குறைந்த விலையில் டஸ்டர் சந்தைப்படுத்தப்படலாம்.
தலைப்பு செய்திகள்
ட்ரெண்டிங் செய்திகள்
