New Kia Seltos 5 Star: இந்த பயில்வான் கிட்ட மோதாதே; கிராஷ் டெஸ்ட்டில் 5 ஸ்டார் ரேட்டிங்கை தட்டித் தூக்கிய கியா செல்டோஸ்
புதிய கியா செல்டோஸ், பெரியவர்கள் மற்றும் குழந்தைகள் ஆகியோரின் பாதுகாப்பில் சிறந்து விளங்கி, 5-நட்சத்திர பாரத் NCAP மதிப்பீட்டை பெற்றுள்ளது. இது ரூ.10.99 லட்சம் விலையில் அறிமுகப்படுத்தப்பட்டுள்ளது.
புதிய தலைமுறை கியா செல்டோஸ், சமீபத்திய பாரத் NCAP (BNCAP) மோதல் சோதனைகளில் 5 நட்சத்திர மதிப்பீட்டை பெற்று அசத்தியுள்ளது. பெரியவர் பாதுகாப்பு மற்றும் குழந்தை பாதுகாப்பு ஆகிய இரண்டிலும் செல்டோஸ் முதலிடம் பிடித்துள்ளது.
கியா செல்டோஸ், வயது வந்தோர் பயணிப் பாதுகாப்பில் 32 மதிப்பெண்களுக்கு 31.70 மதிப்பெண்களையும், குழந்தைகள் பயணிப் பாதுகாப்பில் 49 மதிப்பெண்களுக்கு 45 மதிப்பெண்களையும் பதிவு செய்தது.
புதிய K3 பிளாட்ஃபார்ம் பாதுகாப்பு, செயல்திறனை மேம்படுத்துகிறது
இந்த மோதல் சோதனை முடிவு, செல்டோஸ், அடிப்படையாகக் கொண்ட புதிய K3 பிளாட்ஃபார்மிற்கு சாதகமாக அமைகிறது. இதே பிளாட்ஃபார்ம்தான் அடுத்த தலைமுறை ஹூண்டாய் கிரெட்டாவிற்கும் அடிப்படையாக அமையும் என எதிர்பார்க்கப்படுகிறது.
K3 பிளாட்ஃபார்ம் அதிக வலிமை கொண்ட ஸ்டீலைக்(Steel) கொண்டிருப்பதால், முந்தைய K2 பிளாட்ஃபார்முடன் ஒப்பிடும்போது, விபத்து செயல்திறனை இது மேம்படுத்துகிறது. முந்தைய செல்டோஸ் மாடலிலேயே அத்தகைய தொழில்நுட்பம் இருந்தபோதிலும், இது மேம்படுத்தப்பட்ட ADAS அம்சங்களை செயல்படுத்துவதோடு, பயண அனுபவத்தையும், கையாளுதலையும் மேம்படுத்துகிறது.
மேலும், இந்த புதிய தளம், சிறந்த முறுக்கு விறைப்புத்தன்மையையும் (Torsional Rigidity), மேம்படுத்தப்பட்ட NVH (Noise, Vibration and Harshness), அதாவது, இரைச்சல், அதிர்வு மற்றும் கடினத்தன்மை அளவுகளையும் வழங்குகிறது.
வலுவான சந்தை நிலை
10.99 லட்சம் ரூபாய் விலையில் அறிமுகப்படுத்தப்பட்ட புதிய தலைமுறை செல்டோஸ், கியாவின் அதிகம் விற்பனையாகும் மாடல்களில் ஒன்றாக விரைவாக உருவெடுத்துள்ளதுடன், தற்போது அளவில் பெரியதாகவும் உள்ளது. இது மூன்று என்ஜின் ஆப்ஷன்களுடன் வழங்கப்படுகிறது. மேலும், பிற்காலத்தில் இதன் ஹைப்ரிட் பதிப்பு அறிமுகப்படுத்தப்படும் என எதிர்பார்க்கப்படுகிறது.
போட்டியாளர்களுடன் இணைந்த செல்டோஸ்
இந்நிலையில், தற்போது கிடைத்துள்ள இந்த 5-நட்சத்திர மதிப்பீட்டின் மூலம், செல்டோஸ், டாடா சியரா போன்ற அதிக மதிப்பீடு பெற்ற மற்ற எஸ்யூவி-க்களுடனும், மாருதி சுசுகியின் விக்டோரிஸ் மற்றும் அடுத்த தலைமுறை ரெனால்ட் டஸ்டர் போன்ற புதிய மாடல்களுடனும் இணைகிறது.
ஏற்கனவே சந்தையில் ஒரு வலுவான இடத்தை பிடித்துள்ள புதிய கியா செல்டோஸ், தற்போது பெற்றுள்ள இந்த 5 நட்சத்திர பாதுகாப்பு மதிப்பீடு மூலம், ஒரு குறிப்பிடத்தக்க முன்னேற்றத்தை அடையும் என்பதில் எந்த சந்தேகமும் இல்லை.
Before You Go
Tirupati laddu to ayodhya: அயோத்தி ராமருக்கு ஏழுமலையானின் GIFT! | Ayodhya Ram Temple | ttd
தலைப்பு செய்திகள்
ட்ரெண்டிங் செய்திகள்
