Maruti Suzuki : காம்பாக்ட் டூ யூட்டிலிட்டி கார்ஸ்.. எகிறிய டிமாண்ட்: மாருதி சுசூகிக்கு அடித்த ஜாக்பாட்!
2026-27 நிதியாண்டின் ஏப்ரல்-மே காலகட்டத்திற்கான மாருதி சுசூகி நிறுவனத்தின் ஒட்டுமொத்த கூட்டு விற்பனை 4,82,334 யுனிட்களையும் எட்டியுள்ளது.
மாருதி சுசூகி இந்தியா நிறுவனம் 2026 மே மாதத்தில் மொத்தம் 2,42,688 வாகனங்களை விற்பனை செய்து அசத்தியுள்ளது. இது 2025 மே மாதத்தில் பதிவான 1,80,077 வாகனங்களுடன் ஒப்பிடுகையில் சிறப்பான வளர்ச்சியாகும். உள்நாட்டு விற்பனை மற்றும் ஏற்றுமதி அதிகரித்ததே இந்த வளர்ச்சிக்கு முக்கியக் காரணமாக அமைந்துள்ளது. மொத்த விற்பனையில் பயணிகள் வாகனங்கள், இலகுரக வணிக வாகனங்கள் மற்றும் பிற நிறுவனங்களுக்கான தயாரிப்புகள் (OEM) உள்ளடங்கிய உள்நாட்டு விற்பனை 2,00,774 அலகுகளாகவும், ஏற்றுமதி 41,914 அலகுகளாகவும் உள்ளன.
உள்நாட்டு பயணிகள் வாகன விற்பனை
நிறுவனத்தின் உள்நாட்டு பயணிகள் வாகன விற்பனை நடப்பு மாதத்தில் 1,90,337 ஆக உயர்ந்துள்ளது. இது கடந்தாண்டு மே மாதத்தில் 1,35,962 ஆக இருந்தது குறிப்பிடத்தக்கது. இலகுரக வணிக வாகனங்களையும் சேர்த்து, மொத்த உள்நாட்டு விற்பனை கடந்த ஆண்டின் இதே காலக்கட்டத்தில் இருந்த 1,38,690 என்ற எண்ணிக்கையிலிருந்து 1,93,535 அலகுகளாக அதிகரித்துள்ளது.
காம்பாக்ட் மற்றும் யூட்டிலிட்டி வாகனங்கள் பிரிவு
பயணிகள் கார் பிரிவில் மொத்தம் 97,830 வாகனங்கள் விற்பனையாகியுள்ளன. இதில் பலேனோ, ஸ்விஃப்ட், டிசையர் மற்றும் வேகன்ஆர் போன்ற மாடல்களை உள்ளடக்கிய காம்பாக்ட் மற்றும் நடுத்தர அளவிலான கார்கள் மட்டும் 81,555 அலகுகள் விற்பனையாகியுள்ளன, இது 2025 மே மாதத்தில் 61,960 ஆக இருந்தது. அதேபோல் பிரெஸ்ஸா, எர்டிகா, ஃபிரான்க்ஸ் மற்றும் கிராண்ட் விட்டாரா உள்ளிட்ட யூட்டிலிட்டி ரக வாகனங்கள் கடந்த ஆண்டு விற்பனையான 54,899 அலகுகளுக்கு எதிராக, இந்த ஆண்டு 79,267 அலகுகள் விற்பனையை பதிவு செய்துள்ளன.
வணிக வாகனங்கள் மற்றும் மற்ற் பிரிவுகள்
ஈகோ (Eeco) வேன் விற்பனை இந்த மாதத்தில் 13,240 அலகுகளாக இருந்த நிலையில், சூப்பர் கேரி (Super Carry) இலகுரக வணிக வாகனங்களின் விற்பனை கடந்த 2025 மே மாதத்தின் 2,728 அலகுகளிலிருந்து 3,198 அலகுகளாக உயர்ந்துள்ளது.
அதே நேரத்தில், பிற நிறுவனங்களுக்கான தயாரிப்பு (OEM) விநியோகம் கடந்த ஆண்டின் 10,168 அலகுகளிலிருந்து 7,239 அலகுகளாக சரிவைச் சந்தித்துள்ளது. எனினும், ஏற்றுமதி 2025 மே மாதத்தில் இருந்த 31,219 அலகுகளிலிருந்து 2026 மே மாதத்தில் 41,914 அலகுகளாக அதிகரித்துள்ளது.
நிதியாண்டின் ஒட்டுமொத்த விற்பனை
2026-27 நிதியாண்டின் ஏப்ரல்-மே காலகட்டத்திற்கான மாருதி சுசூகி நிறுவனத்தின் ஒட்டுமொத்த கூட்டு விற்பனை 4,82,334 யுனிட்களையும் எட்டியுள்ளது. இது 2025-26 நிதியாண்டின் இதே காலகட்டத்தில் 3,59,868 அலகுகளாக இருந்தது என்பது கவனிக்கத்தக்கது.
தலைப்பு செய்திகள்
ட்ரெண்டிங் செய்திகள்
