Scorpio Classic Vs Scorpio N: ஸ்கார்ப்பியோ க்ளாசிக் Vs ஸ்கார்ப்பியோ என் - எது பெஸ்ட்? வித்தியாசம் என்ன? விலை, மைலேஜ்
Scorpio Classic Vs Scorpio N: மஹிந்த்ராவின் ஸ்கார்ப்பியோ க்ளாசிக் மற்றும் ஸ்கார்ப்பியோ என் கார் மாடல்களில் எது சிறந்தது? எப்படி? என்பதை இந்த தொகுப்பில் அறியலாம்.
Scorpio Classic Vs Scorpio N: மஹிந்த்ராவின் ஸ்கார்ப்பியோ க்ளாசிக் மற்றும் ஸ்கார்ப்பியோ என் கார் மாடல்கள் இடையேயான ஒற்றுமை மற்றும் வேற்றுமைகள் கீழே பட்டியலிடப்பட்டுள்ளன.
மஹிந்த்ரா ஸ்கார்ப்பியோ க்ளாசிக் Vs ஸ்கார்ப்பியோ N
உள்நாட்டு சந்தையில் எஸ்யுவி கார் பிரிவில் மிகுந்த கவனம் செலுத்தி, ஆண்டு விற்பனையில் ஹுண்டாயை பின்னுக்கு தள்ளி இந்திய நிறுவனமான மஹிந்த்ரா இரண்டாவது இடத்தை பிடித்துள்ளது. குறிப்பாக ப்ராண்டின் சிறந்த விற்பனை மாடலாக இருக்கும் ஸ்கார்ப்பியோ (க்ளாசிக்/என்), கடந்த ஆண்டின் ஜனவரி மாதம் தொடங்கி நவம்பர் மாதம் வரையில் மட்டுமே ஒரு லட்சத்து 61 ஆயிரத்திற்கும் அதிகமான யூனிட் அளவில் விற்பனையாகியுள்ளது. அதவாது மஹிந்த்ராவின் வளர்ச்சிக்கு ஸ்கார்ப்பியோ மிக முக்கிய பங்காற்றி வருகிறது. இந்நிலையில் ஸ்கார்ப்பியோவின் க்ளாசிக் மற்றும் என் எடிஷன்களில் எது சிறந்தது? எந்த பயனாளருக்கு எந்த எடிஷன் பொருந்தும்? என கீழே விவரிக்கப்பட்டுள்ளது.
ஸ்கார்ப்பியோ க்ளாசிக் Vs ஸ்கார்ப்பியோ N - விலை
சென்னையில் மஹிந்த்ராவின் ஸ்கார்ப்பியோ க்ளாசிக் கார் மாடலின் விலை, 13 லட்சத்தில் தொடங்கி 16.90 லட்சம் (எக்ஸ்-ஷோரூம்) வரை நீள்கிறது. மொத்தம் 4 வேரியண்ட்களில் கிடைக்கிறது. பேஸ் வேரியண்டில் 9 சீட்டர் கான்ஃபிகரேஷனில் கிடைப்பது குறிப்பிடத்தக்கது. அதேநேரம், ஸ்கார்ப்பியோ என் எடிஷனின் விலை 13.49 லட்சத்தில் தொடங்கி 24.95 லட்சம் (எக்ஸ்-ஷோரூம்) வரை நீள்கிறது. சுமார் 40-க்கும் அதிகமான வேரியண்ட்களில் இந்த கார் விற்பனை செய்யப்படுகிறது. அதிகபட்சமாக 7 பேர் வரை அமரும் வகையிலான கான்ஃபிகரேஷனில் மட்டுமே இந்த எஸ்யுவி கிடைக்கப்பெறுகிறது.
ஸ்கார்ப்பியோ க்ளாசிக் Vs ஸ்கார்ப்பியோ N - எது பெஸ்ட்?
| அம்சங்கள் | ஸ்கார்ப்பியோ க்ளாசிக் | ஸ்கார்ப்பியோ N |
| இன்ஜின் | 2.2 லிட்டர் டீசல் இன்ஜின் மட்டுமே | 2.0 லிட்டர் டீசல் & 2.0 லிட்டர் பெட்ரோல் |
| ஆற்றல் | 132PS | 175PS (டீசல்)/203PS(பெட்ரோல்) |
| ட்ரான்ஸ்மிஷன் | 6 ஸ்பீட் மேனுவல் | 6 ஸ்பீட் மேனுவல்/ஆட்டோமேடிக் |
| 4WD ஆப்ஷன் | இல்லை (ரியர் வீல் ட்ரைவ் மட்டுமே) | ஆம் (டீசல் இன்ஜினில் மட்டுமே) |
| க்ரவுண்ட் க்ளியரன்ஸ் | 209மிமீ | 187மிமீ |
| சீட்டிங் | 7/9 சீட்டர் | 6/7 சீட்டர் |
| பாதுகாப்பு ரேட்டிங் | பரிசோதனைக்கு உட்படுத்தப்படவில்லை | சர்வதேச பரிசோதனையில் 5 ஸ்டார் ரேட்டிங் |
| மைலேஜ் | 14.44 கிமீ/லி (நிறுவனம் அறிவித்தது) | 15.94 கிமீ/லி (நிறுவனம் அறிவித்தது) |
ஸ்கார்ப்பியோ க்ளாசிக் Vs ஸ்கார்ப்பியோ N - வித்தியாசம்
டிசைன் & தோற்றம்: ஸ்கார்ப்பியோ க்ளாசிக்கானது உயரமான மற்றும் பாக்ஸி தோற்றத்தை கொண்டு, தனக்கே உரிய அடையாளமான பானெட் ஸ்கூப், பக்கவாட்டில் எதிரெதிரே அமரும் வகையிலான மூன்றாவது வரிசை இருக்கை ஆகியவற்றின் மூலம் கிராமப்புற பயன்பாட்டிற்கும், அரசியல் கான்வாய்களுக்கும் உகந்ததாக உள்ளது. ஆனால், ஸ்கார்ப்பியோ என் எடிஷனானது அகலம் மற்றும் குறைவாக இருந்தாலும், எல்இடி லைட்டிங் மற்றும் 18 இன்ச் அலாய் வீல்கள் மூலம் ப்ரீமியம் தோற்றத்தை கொண்டுள்ளது.
செயல்திறன்: மேம்படுத்தப்பட்ட ஸ்கார்ப்பியோ என் ஆனது கூடுதல் ஆற்றல் கொண்டதாக உள்ளது. இதில் நவீன சஸ்பென்ஷன் வழங்கப்பட்டுள்ளதால், குலுங்கினாலும் உடலுக்கு அசதி தெரியாது. க்ளாசிக்குடன் ஒப்பீடு செய்தால் முந்தைய எடிஷன் சொகுசான பயண அனுபவத்தை வழங்குகிறது.
உட்புறம் & அம்சங்கள்: தரத்தை ஒப்பிடுகையில் ஸ்கார்ப்பியோ என் எடிஷன் மிகப்பெரிய அளவில் முன்னிலை பெறுகிறது. சன்ரூஃப், டூயல் ஜோன் க்ளைமேட் கன்ட்ரோல், 12 ஸ்பீக்கர் சோனி சிஸ்டம் போன்ற மாடர்ன் அம்சங்கள் பட்டியலிடப்பட்டுள்ளன. ஸ்கார்ப்பியோ க்ளாசிக்கானது அடிப்படையான எடிஷன், நிலைத்தன்மை மற்றும் எளிய பராபரிப்பு ஆகியவற்றில் கவனம் செலுத்துகிறது.
பாதுகாப்பு: ஸ்காப்பியோ என் ஆனது மிகவும் பாதுகாப்பான ப்ளாட்ஃபார்மில் கட்டமைக்கப்பட்டுள்ளது. அதனால் 6 ஏர் பேக்குகள், எலெக்ட்ரானிக் ஸ்டெபிலிட்டி கன்ட்ரோல் உள்ளிட்டவற்றை கொண்டு, சர்வதேச பாதுகாப்பு பரிசோதனையில் 5 ஸ்டார் ரேட்டிங்கை பெற்றுள்ளது. ஆனால், க்ளாசிக் எடிஷனில் இரட்டை ஏர்பேக்குகள் மற்றும் ஆண்டி லாக்கிங் ப்ரேக்கிங் சிஸ்டம் போன்ற அடிப்படை வசதிகளை மட்டுமே கொண்டுள்ளது.
ஸ்கார்ப்பியோ க்ளாசிக் Vs ஸ்கார்ப்பியோ N - யாருக்கு எது?
ஸ்கார்ப்பியோ க்ளாசிக் - விண்டேஜ் லுக், மோசமான கிராமப்புற சாலைகளிலும் வலுவாக செயல்படக்கூடிய கரடுமுரடான வாகனம் அல்லது குடும்பமாக பயணிக்க பெரிய நம்பிக்கைக்குரிய வாகனம் வேண்டுமானால் ஸ்கார்ப்பியோ க்ளாசிக்கை தேர்வு செய்யலாம்.
ஸ்கார்ப்பியோ N - பாதுகாப்பான 4 வீல் ட்ரைவ் ஆப்ஷனை கொண்டு சிட்டி மற்றும் நெடுஞ்சாலை பகுதி பயன்பாட்டிற்கு உகந்த நவீன குடும்பங்களுக்கான காரை விரும்பினால் ஸ்கார்ப்பியோ என் எடிஷனை தேர்வு செய்யலாம்
தலைப்பு செய்திகள்
ட்ரெண்டிங் செய்திகள்
