Honda Activa: ரூ.10 ஆயிரம் போதும்; EMI-ல் ஹோண்டா ஆக்டிவா ஸ்கூட்டரை வாங்குவது எப்படி? மைலேஜ்?

Honda Activa Down Payment Plan: ஹோண்டா ஆக்டிவா ஸ்கூட்டரை இஎம்ஐ-யில் வாங்குவது எப்படி? விலை, முன்பணம், மாதத் தவணை விவரங்கள்!

ஹோண்டா ஆக்டிவா

Source : சிறப்பு ஏற்பாடு

இந்திய இருசக்கர வாகன சந்தையில் ஸ்கூட்டர் பிரிவில் பல ஆண்டுகளாக தொடர்ந்து முதலிடத்தில் ஆதிக்கம் செலுத்தி வருவது ஹோண்டா நிறுவனத்தின் பிரபலமான ஆக்டிவா (Honda Activa) மாடல் ஆகும்.

நடுத்தர குடும்பங்கள் மற்றும் அன்றாட பயன்பாட்டிற்கு ஏற்ற முதல் தேர்வாக இருக்கும் இந்த ஆக்டிவா ஸ்கூட்டரின் சமீபத்திய மாடலை, கையில் முழுப்பணம் இல்லாமல் சுலபமான இஎம்ஐ திட்டத்தின் மூலம் எப்படி எளிதாக வாங்கலாம் என்பது குறித்த முழுமையான நிதி விவரங்களை இங்கே விரிவாகக் காணலாம்.

தற்போது சந்தையில் விற்பனையில் உள்ள ஹோண்டா ஆக்டிவா ஸ்கூட்டர் ஸ்டாண்டர்ட், டீலக்ஸ், மற்றும் நவீன தொழில்நுட்பம் கொண்ட ஹெச்-ஸ்மார்ட் ஆகிய மூன்று முக்கிய வேரியண்ட்களில் வாடிக்கையாளர்களுக்குக் கிடைக்கிறது. இதன் ஆரம்ப எக்ஸ்-ஷோரூம் விலை சுமார் ரூ. 76,234 ஆக நிர்ணயம் செய்யப்பட்டுள்ளது.

அதேசமயம், இதன் டாப் எண்ட் மாடலான ஸ்மார்ட் வேரியண்டின் எக்ஸ்-ஷோரூம் விலை ரூ. 82,234 வரை உள்ளது. ஆர்டிஓபதிவு கட்டணம், சாலை வரி மற்றும் வாகனக் காப்பீடு உள்ளிட்ட அனைத்து வரிகளையும் சேர்த்து இதற்கான இறுதி ஆன்-ரோடு விலை தோராயமாக ரூ. 90,000 முதல் ரூ. 91,000 வரை வருகிறது.

பைனான்ஸ் திட்டம்

வாடிக்கையாளர்கள் தங்களது கையில் முழுத் தொகையும் இல்லை என்றாலும், மிகக் குறைந்த முன்பணம் செலுத்தி இந்த ஸ்கூட்டரை உடனடியாகச் சொந்தமாக்கிக் கொள்ளலாம். நீங்கள் ஹோண்டா ஆக்டிவா ஸ்கூட்டரை வாங்க விரும்பினால், வெறும் ரூ. 10,000 மட்டும் முன்பணமாக செலுத்தினால் போதுமானது. மீதமுள்ள தொகைக்கு நீங்கள் வங்கி மூலம் எளிதாக வாகனக் கடன் பெற்றுக் கொள்ள முடியும்.

வழக்கமாக இருசக்கர வாகனக் கடன்களுக்கு வங்கிகள் தோராயமாக 9.7 சதவீத வட்டியை வசூலிக்கின்றன. அதன்படி கணக்கிட்டால், நீங்கள் மீதமுள்ள கடன் தொகைக்கு 3 ஆண்டுகள் (அதாவது 36 மாதங்கள்) கால அவகாசத்தைத் தேர்ந்தெடுத்தால், ஒவ்வொரு மாதமும் நீங்கள் தோராயமாக ரூ. 2,600 முதல் ரூ. 2,800 வரை இஎம்ஐ தொகையாகச் செலுத்த வேண்டி இருக்கும். நீங்கள் தேர்ந்தெடுக்கும் வங்கியின் வட்டி விகிதம் மற்றும் நீங்கள் வாங்கும் மாடலைப் பொறுத்து இந்த மாதத்தவணை தொகையில் சிறிய அளவில் மாற்றங்கள் ஏற்பட வாய்ப்புள்ளது.

மைலேஜ்

செயல்திறனைப் பொறுத்தவரை, ஹோண்டா ஆக்டிவா ஸ்கூட்டரில் 109.51 சிசி திறன் கொண்ட சிங்கிள் சிலிண்டர் எஞ்சின் பொருத்தப்பட்டுள்ளது. இது அதிகபட்சமாக 7.73 பிஎச்பி பவரையும், 8.90 என்எம் டார்க்கையும் சீராக வெளிப்படுத்தும் திறன் கொண்டது.

தினசரி பயன்பாட்டில் ஒரு லிட்டர் பெட்ரோலுக்கு சுமார் 45 முதல் 50 கி.மீ வரை இது சிறப்பான மைலேஜ் தரக்கூடியது. இதில் எல்இடி ஹெட்லேம்ப், அனலாக் இன்ஸ்ட்ருமென்ட் கிளஸ்டர், சாவி இல்லாமல் இயக்கும் ஸ்மார்ட் கீ வசதி, அலாய் வீல்கள் மற்றும் சிறப்பான டெலிஸ்கோபிக் சஸ்பென்ஷன் போன்ற பல்வேறு நவீன வசதிகள் கொடுக்கப்பட்டுள்ளன.