SUV-ல் கடுமையாகும் போட்டி; ரெனால்ட் டஸ்டர் vs மாருதி விக்டாரிஸ்- எது பவர்ஃபுல்? ஓர் ஒப்பீடு!
2 கார்களுமே சிறப்பான வடிவமைப்பு, நவீன தொழில்நுட்ப வசதிகள் மற்றும் இன்ஜின் தேர்வுகளைக் கொண்டுள்ளன. இதில் விலை, பாதுகாப்பு மற்றும் சிறப்பம்சங்கள் அடிப்படையில் எது சிறந்தது எனப் பார்ப்போம்.
நடுத்தர அளவிலான எஸ்யூவி கார் சந்தையில் நிறுவனங்களுக்கு இடையிலான போட்டி தற்போது மிகவும் கடுமையாகி வருகிறது. சந்தைக்கு மீண்டும் வந்துள்ள புதிய ரெனால்ட் டஸ்டர், மாருதி சுஸுகி விக்டாரிஸ் போன்ற கார்களுடன் நேரடியாகப் போட்டியிடும் என எதிர்பார்க்கப்படுகிறது. இந்த இரண்டு கார்களுமே சிறப்பான வடிவமைப்பு, நவீன தொழில்நுட்ப வசதிகள் மற்றும் பல்வேறு இன்ஜின் தேர்வுகளைக் கொண்டுள்ளன.
விலை விவரம்
இதில் விலை, பாதுகாப்பு மற்றும் சிறப்பம்சங்கள் அடிப்படையில் எது சிறந்தது எனப் பார்ப்போம். புதிய ரெனால்ட் டஸ்டரின் எக்ஸ் ஷோரூம் ஆரம்ப விலை ₹10.49 லட்சமாக உள்ளது. இதன் மற்ற வேரியண்ட்கள் ₹18.49 லட்சம் வரையிலும், டூயல் டோன் டாப் வேரியண்ட் ₹18.69 லட்சம் வரையிலும் விற்கப்படுகிறது.
மறுபுறம், மாருதி சுஸுகி விக்டாரிஸ் காரின் எக்ஸ் ஷோரூம் ஆரம்ப விலை ₹10.50 லட்சமாகத் தொடங்கி, டாப் ஸ்பெக் ஸ்ட்ராங் ஹைப்ரிட் வேரியண்ட் ₹19.99 லட்சம் வரை விற்பனையாகிறது. ஆரம்ப விலையைப் பொறுத்தவரை இரண்டுமே ஒன்றுபோலவே உள்ளன.
இன்ஜின் எப்படி?
டஸ்டர் காரில் 1.0 லிட்டர் TCe 100 டர்போ பெட்ரோல் மற்றும் 1.3 லிட்டர் TCe 160 டர்போ பெட்ரோல் ஆகிய இரண்டு இன்ஜின் தேர்வுகள் உள்ளன. இதன் அதிக சக்திவாய்ந்த இன்ஜின் 163 PS பவர், 280 Nm டார்க் திறனைத் தரும். இதில் 6 ஸ்பீடு மேனுவல் மற்றும் 6 ஸ்பீடு DCT வசதிகள் உள்ளன.
விக்டோரிஸ் காரில் 1.5 லிட்டர் பெட்ரோல், சிஎன்ஜி மற்றும் ஸ்ட்ராங் ஹைப்ரிட் இன்ஜின் தேர்வுகள் தரப்பட்டுள்ளன. இதன் ஸ்ட்ராங் ஹைப்ரிட் மாடல் 28.65 kmpl ARAI மைலேஜ் எனப்படும் ரேஞ்ச் திறனைத் தருகிறது. செயல்திறனில் டஸ்டர் ஸ்போர்ட்டியாகவும், சிறந்த மைலேஜ் மற்றும் இன்ஜின் தேர்வுகளில் விக்டாரிஸ் சிறந்ததாகவும் உள்ளது.
டஸ்டரில் 10.1 இன்ச் ஓபன்ஆர் லிங்க் மல்டிமீடியா சிஸ்டம், டிஜிட்டல் டிரைவர் டிஸ்ப்ளே, வயர்லெஸ் சார்ஜிங், டூயல்-ஜோன் ஆட்டோமேட்டிக் ஏசி, பனோரமிக் சன்ரூஃப் மற்றும் 360-டிகிரி 3டி கேமரா ஆகிய பிரீமியம் வசதிகள் உள்ளன. இதன் டாப் வேரியண்டில் வென்டிலேட்டட் முன் இருக்கைகள் மற்றும் எலக்ட்ரிக் சீட் அட்ஜஸ்ட்மென்ட் வசதியும் இடம்பெற்றுள்ளது. சிறப்பம்சங்கள் அடிப்படையில் விக்டாரிஸ் காரும் சிறந்து விளங்குகிறது. இதில் 10.1 இன்ச் ஸ்மார்ட்பிளே ப்ரோ எக்ஸ் சிஸ்டம், 8 ஸ்பீக்கர் இன்ஃபினிட்டி ஆடியோ, பனோரமிக் சன்ரூஃப், ஸ்மார்ட் பவர்டு டெயில்கேட், 64-கலர் ஆம்பியன்ட் லைட்டிங் மற்றும் டிஜிட்டல் கீ போன்ற வசதிகள் வாடிக்கையாளர்களுக்கு வழங்கப்பட்டுள்ளன.
யார் எதை தேர்வு செய்யலாம்?
வலிமையான டர்போ பெட்ரோல் இன்ஜின், சிறந்த ஓட்டுநர் அனுபவம் மற்றும் ஒரு கரடுமுரடான எஸ்யூவி வடிவமைப்பு ஆகியவற்றை மட்டுமே பிரதானமாக விரும்புவோருக்கு புதிய ரெனால்ட் டஸ்டர் ஒரு மிகச் சிறந்த தேர்வாக அமையும்.
ஆனால் உங்களுக்கு அதிக மைலேஜ், சிஎன்ஜி, ஹைப்ரிட் வசதிகள் மற்றும் பல விதமான பவர்ட்ரெய்ன் தேர்வுகள் கட்டாயம் தேவைப்பட்டால், அதற்காக மாருதி சுஸுகி விக்டாரிஸ் காரை வாங்குவதே உங்களுக்கு அனைத்து வகையிலும் மிகவும் சரியான முடிவாக இருக்கும்.
தலைப்பு செய்திகள்
ட்ரெண்டிங் செய்திகள்
