"கடைசியில உதட்டையே கடிச்சு துப்பிட்டானே" ..மிருகத்தனமான தாக்குதல் - நடந்தது என்ன?

திருப்பத்தூர் அருகே மது அருந்திய போது ஏற்பட்ட தகராறில் வாலிபரின் உதட்டை கடித்து துப்பிய நபரால் பரபரப்பு!

உதடு கடிக்கப்பட்ட இளைஞருக்கு மருத்துவமனையில் சிகிச்சை

Source : abp nadu

மது அருந்திய போது ஏற்பட்ட தகராறில் வாலிபரின் உதட்டை கடித்து துப்பிய சம்பவம் திருப்பத்தூரில் அதிர்ச்சியை ஏற்படுத்தியுள்ளது. இதுதொடர்பாக இருவரை கைது செய்த போலீசார் விசாரணை மேற்கொண்டு வருகின்றனர்.

திருப்பத்தூர் மாவட்டம், திருப்பத்தூர் அடுத்த அகரம் கௌரன் வட்டம் பகுதியைச் சேர்ந்த குபேந்திரன் மகன் முரளி (26) என்பவர் அதே பகுதியைச் சேர்ந்த பிரேம்குமார் (26) அன்பழகன் (41) ஆகிய மூவரும் ஆத்துமேடு பகுதியில் ஒன்றாக அமர்ந்து மது அருந்தியுள்ளனர். அப்போது திடீரென வாக்குவாதம் ஏற்பட்டுள்ளது. இதில் பிரேம்குமார் மற்றும் அன்பழகன் ஆகிய இருவரும் சேர்ந்து முரளியிடம் தகராறில் ஈடுபட்டதாக கூறப்படுகிறது.  வாக்குவாதம் முற்றிய நிலையில் ஆத்திரமடைந்த பிரேம்குமார் முரளியின் உதட்டைக் கடித்து துப்பி உள்ளார்.

இதில், காயமடைந்த முரளி சிகிச்சைக்காக திருப்பத்தூர் அரசு மருத்துவமனைக்கு அனுப்பி வைத்தனர். மருத்துவர்கள் முதலுதவி சிகிச்சை அளித்து மேல் சிகிச்சைக்காக சென்னையில் உள்ள அரசு மருத்துவ கல்லூரிக்கு அனுப்பி வைத்தனர். இந்த சம்பவம் குறித்து முரளி குரிசிலாப்பட்டு  காவல்துறையிடம் புகார் அளித்துள்ளார். இந்தப் புகாரின் பேரில் போலீசார் பிரேம்குமார், அன்பழகன் உள்ளிட்ட  இருவர் மீது வழக்குப்பதிவு செய்து திருப்பத்தூர் நீதிமன்றத்தில் ஆஜர்படுத்தி சிறையில் அடைத்தனர்.

மது அருந்தும் போது ஏற்பட்ட தகராறில் வாலிபரின் உதட்டை கடித்து துப்பி இருவர் கைதான சம்பவம் அப்பகுதியில் பெரும் பரபரப்பு ஏற்படுத்தியது.

கடந்த தீபாவளி அன்று தமிழ்நாட்டில் நடந்த 12 கொலைகளுக்கு முக்கிய காரணமே மதுப்பழக்கம் தான் என்று சொல்லப்படுகிறது. மதுவினால் போதை தலைக்கேறி தாங்கள் என்ன செய்கிறோம் என்பதையே மறந்துவிடுகிறார்கள் மதுப்பிரியர்கள். மதுவினால் தினமும் சட்டம் ஒழுங்கு பிரச்சனை ஏற்படுவது தொடர்கதையாகி வருகிறது. மதுப்பழக்கத்தால் குற்றச்செயல்கள் அதிகமாகி காவல்துறையினரையே தாக்கும் சம்பவங்களுக் அரங்கேறி வருகின்றன.