Tanjai Auditor Murdered : மாநகராட்சி கழிவறை காண்ட்ராக்ட் முன்விரோதம்..! ஆடிட்டர் வெட்டிப்படுகொலை..! தஞ்சையில் கொடூரம்
மாநகராட்சி கழிவறையை கான்ட்ராக்ட் எடுக்கும் முன்விரோதத்தில் ஆடிட்டர் அரிவாளால் வெட்டிப் படுகொலை செய்யப்பட்ட சம்பவம் அதிர்ச்சியை ஏற்படுத்தியுள்ளது.
தஞ்சாவூரில் மாநகராட்சிக்கு சொந்தமான கட்டிடங்கள், பொது கழிவறை, குளியலறைகள் ஏலம் விடப்பட்டன. இதை ஏலம் எடுக்க பலர் மத்தியிலும் போட்டா போட்டி நடந்தது. அதிக வருமானம் கொடுக்கும் என்பதால் புதிய நபர்களும் ஏலத்தில் பங்கேற்று பல இடங்களில் ஏலம் எடுத்துள்ளனர். இதன்காரணமாக, ஏலம் எடுப்பவர்கள் மத்தியில் புகைச்சலையும், பகையையும் ஏற்பட்டுள்ளது.
தஞ்சை கரந்தையில் உள்ள சேர்வைக்காரன் தெருவை சேர்ந்தவர் மகேஸ்வரன். அவருக்கு வயது 45. இவர் ஆடிட்டராக உள்ளார். இவர் தன் வீட்டுக்கு அருகில் விவசாயப் பண்ணை ஒன்று வைத்துள்ளார். இதில் ஆடு, கோழி, தென்னை மரங்கள் உட்பட பல மரங்களை பராமரித்து வளர்த்து வருகிறார். இந்த பண்ணைக்கு எதிரில் மாநகராட்சி குளியல் மற்றும் கழிவறை கட்டிடம் உள்ளது.
இந்த கழிவறையும் பொது ஏலத்திற்கு வந்துள்ளது. இந்த ஏலத்தில் ஆடிட்டர் மகேஸ்வரனும் கலந்து கொண்டுள்ளார். ஏலத்தில் ஆடிட்டர் மகேஸ்வரனுக்கு சாதகமாக முடிந்து அந்த மாநகராட்சி கழிவறை கான்ட்ராக்ட் அவருக்கு கிடைத்துள்ளது. இதனால் ஏலத்தில் பங்கேற்ற ஒரு தரப்பினருக்கும், மகேஸ்வரனுக்கும் இடையே முன்விரோதம் ஏற்பட்டுள்ளது.
இந்த நிலையில், ஆடிட்டர் மகேஸ்வரன் நேற்று இரவு தனது பண்ணையை வலம் வந்து மரங்களை எல்லாம் பார்த்துவிட்டு பண்ணையிலே உள்ள அறையில் ஓய்வு எடுத்துக் கொண்டு இருந்தார். அப்போது அடையாளம் தெரியாத மூன்று பேர் கொண்ட கும்பல் மகேஸ்வரனின் பண்ணைக்குள் புகுந்துள்ளது. மகேஸ்வரன் ஓய்வு எடுத்துக்கொண்டிருந்த அறைக்குள் அந்த கும்பல் புகுந்தது.
மகேஸ்வரன் என்ன நடக்கிறது என்று சுதாரிப்பதற்குள் அந்த கும்பல் தாங்கள் வைத்திருந்த அரிவாளால் மகேஸ்வரனை சரமாரியாக வெட்டிக் கொன்றது. மகேஸ்வரனை வெட்டிக்கொன்ற உடனே அந்த கும்பல் அங்கிருந்து தப்பியோடியது. ஆடிட்டர் மகேஸ்வரனின் அலறல் சத்தம் கேட்டு அக்கம்பக்கத்தினர் ஓடிவந்து பார்த்தபோது மகேஸ்வரன் ரத்த வெள்ளத்தில் இறந்து கிடந்தார். இதையடுத்து, போலீசாருக்கு தகவல் அளிக்கப்பட்டது.
சம்பவ இடத்திற்கு விரைந்த தஞ்சை மேற்கு போலீஸ் இன்ஸ்பெக்டர் சந்திரா தலைமையிலான போலீசார் மகேஸ்வரன் உடலை கைப்பற்றி பிரேத பரிசோதனைக்காக தஞ்சை மருத்துவக்கல்லூரி மருத்துவமனைக்கு அனுப்பி வைத்தனர்.
மேலும் இதுகுறித்து மகேஸ்வரன் மனைவி நிஷா கொடுத்த புகாரின் பேரில் இன்ஸ்பெக்டர் சந்திரா வழக்குப்பதிவு செய்து விசாரணை மேற்கொண்டுள்ளார். இதுகுறித்து போலீசார் தரப்பில் கூறுகையில், கழிவறை கட்டிடம் ஏலம் எடுப்பதில் முன்விரோதம் ஏற்பட்டுள்ளது. இதனால் இந்த கொலை நடந்து இருக்கலாம் என்று முதல்கட்ட விசாரணையில் தெரிய வந்துள்ளது. மேலும் பல்வேறு கோணங்களிலும் விசாரணை நடந்து வருகிறது என்று தெரிவித்தனர்.
மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்
ABP நாடு செய்திகளை சமூக வலைத்தள பக்கங்களிலும் பின் தொடரலாம்
தலைப்பு செய்திகள்
ட்ரெண்டிங் செய்திகள்
