காதலிக்கலனா பெட்ரோல் ஊற்றி கொளுத்துவீங்களா? பொதுமக்கள் இல்லனா என்னவாயிருக்கும்.. சென்னை அருகே அதிர்ச்சி சம்பவம்

காதலிக்க மறுப்பு தெரிவித்ததால் கல்லூரி மாணவியை பெட்ரோலை ஊற்றி எரிக்க முயற்சி.. மாணவரின் வெறிச்செயல்

பெரியபாளையம் காவல் நிலையம்

Source : abp nadu

பெரியபாளையம் அருகே காதல் விவகாரத்தில் கல்லூரி மாணவி மீது பெட்ரோல் ஊற்றி எரிக்க முயன்ற கல்லூரி மாணவர் கைது செய்யப்பட்டுள்ளார். காதலிக்க மறுத்ததால் மாணவி சென்ற பேருந்தை மறித்து பெட்ரோல் ஊற்ற முயன்ற மாணவரை பொதுமக்கள் பிடித்து போலீசில் ஒப்படைத்தனர். 

பெட்ரோலை ஊற்றி எரிக்க முயற்சி

திருவள்ளூர் மாவட்டம் பெரியபாளையம் அருகே அமைந்துள்ள தனியார் பொறியியல் கல்லூரி வளாகத்தில், கலை மற்றும் அறிவியல் கல்லூரியில் இளங்கலை 3ஆம் ஆண்டு பயிலும் 20 வயதுடைய மாணவி கல்லூரி வாகனத்தில் பயணித்து வருகிறார். ஊத்துக்கோட்டையில் இருந்து கல்லூரி நோக்கி வந்து கொண்டிருந்த கல்லூரி பேருந்தை பெரியபாளையம் அருகே அரியப்பாக்கம் பகுதியில் இளைஞர் ஒருவர் இருசக்கர வாகனத்தில் வந்து வழிமறித்துள்ளார். கல்லூரி மாணவியிடம் காதல் விவகாரம் குறித்து வாக்குவாதத்தில் ஈடுபட்ட இளைஞர் தயாராக கையில் வைத்திருந்த கேனில் இருந்து பெட்ரோலை மாணவி மீது ஊற்ற முயற்சித்துள்ளார்.

கண்டுக்கொள்ளாத மாணவி

அப்போது அங்கிருந்த பொதுமக்களும், கல்லூரி பேருந்து ஓட்டுநர், உதவியாளர் உள்ளிட்டோர் சுதாரித்து கொண்டு இளைஞரை சுற்றி வளைத்து பிடித்தனர். தொடர்ந்து பெரியபாளையம் காவல் நிலையத்தில் அவரை ஒப்படைத்தனர். காவல்துறை விசாரணையில் பாலவாக்கம் கிராமத்தை சேர்ந்த ஸ்ரீகாந்த் என்கிற சாமுவேல் (21) என்பதும் அதே கல்லூரியில் 3ஆம் ஆண்டு செயற்கை நுண்ணறிவு பொறியியல் பயின்று வருவதும், மாணவியை காதலித்து வருவதாகவும், மாணவி தன்னை கண்டு கொள்ளாததால் காதல் விவகாரத்தில் மாணவியை மிரட்டுவதற்காக பெட்ரோலை ஊற்றி எரிக்க முயன்றது விசாரணையில் தெரிய வந்துள்ளது.

இதைத்தொடர்ந்து, மாணவியின் பெற்றோர் அளித்த புகாரின் பேரில் கொலை முயற்சி, பெண்கள் வன்கொடுமை உள்ளிட்ட பல்வேறு பிரிவுகளின் கீழ் வழக்கு பதிந்து பொறியியல் கல்லூரி மாணவர் ஸ்ரீகாந்தை கைது செய்த பெரியபாளையம் போலீசார் ஊத்துக்கோட்டை நீதிமன்றத்தில் ஆஜர்படுத்தி புழல் மத்திய சிறையில் அடைத்தனர். காதல் விவகாரத்தில் பேருந்தை வழிமறித்து மாணவி மீது பெட்ரோல் ஊற்றி எரிக்க முயன்ற சம்பவம் அதிர்ச்சியை ஏற்படுத்தியுள்ளது.