எடப்பாடி பழனிச்சாமியின் உதவியாளர் மணி கைது-அரசு வேலை வாங்கி தருவதாக கூறி 17 லட்சம் மோசடி என புகார்
’’எடப்பாடி பழனிச்சாமி உதவியாளர் மணி மீது 120/B, 420 ஆகிய பிரிவுகளின் கீழ் வழக்குகள் பதிவு’’
அரசு வேலை வாங்கித் தருவதாக கூறி 17 லட்ச ரூபாய் மோசடி செய்த முன்னாள் முதல்வர் எடப்பாடி பழனிச்சாமியின் உதவியாளர் மீது இரண்டு பிரிவின் கீழ் வழக்குப்பதிவு செய்து தலைமறைவாக இருந்த உதவியாளரை காவல்துறையினர் கைது செய்யப்பட்டுள்ளார்.
சேலம் மாவட்டம் ஓமலூர் தின்னப்பட்டி அருகே உள்ள பூசாரிப்பட்டி பகுதியை சேர்ந்தவர் மணி இவர் கடந்த ஆட்சிக்காலத்தில் முன்னாள் முதல்வரும் தற்போதைய எதிர்க்கட்சித் தலைவருமான எடப்பாடி பழனிச்சாமியின் உதவியாளராக கடந்த 10 ஆண்டு காலமாக இருந்து வருகிறார். முன்னாள் முதல்வர் எடப்பாடி பழனிச்சாமிக்கு உதவியாளராக இருந்தபோது ஓமலூர் உள்ளிட்ட பல்வேறு பகுதிகளில் பல நபர்களிடம் அரசு வேலை வாங்கித் தருவதாக பணம் பெற்றதாக பல்வேறு புகார்கள் இவர் மீது இருந்து வந்தது.
இந்த நிலையில் கடலூர் மாவட்டம் நெய்வேலி பகுதியை சேர்ந்த தமிழ்ச்செல்வன் என்பவருக்கு அரசு போக்குவரத்து கழகத்தின் உதவி பொறியாளராக வேலை வாங்கி தருவதாக கூறி 17 லட்ச ரூபாய் தமிழ்ச்செல்வன் நண்பர் செல்வகுமார் மூலமாக பணத்தைப் பெற்று ஏமாற்றியுள்ளார் இது தொடர்பாக தமிழ்ச்செல்வன் கடந்த மாதம் 26 ஆம் தேதி சேலம் மாவட்ட காவல் கண்காணிப்பாளர் அலுவலகத்தில் புகார் அளித்திருந்தார். சேலம் மாவட்ட காவல் கண்காணிப்பாளர் ஸ்ரீ அபிநவ புகாரை பெற்று விசாரணை நடத்தியதில் வங்கி கணக்கில் 17 லட்ச ரூபாய் பரிமாற்றம் செய்யப்பட்டது கண்டுபிடிக்கப்பட்டது. இதனைத் தொடர்ந்து முன்னாள் முதல்வர் எடப்பாடி பழனிச்சாமி உதவியாளர் மணி மீது 120/B, 420 ஆகிய இரண்டு பிரிவின் கீழ் வழக்கு பதிவு செய்துள்ளனர்.
இந்த நிலையில் முன்னாள் முதல்வர் எடப்பாடி பழனிச்சாமியின் உதவியாளர் மணி தலைமறைவாக இருப்பதாக காவல்துறையினருக்கு தகவல் கிடைத்ததை அடுத்து மாவட்ட குற்றப்பிரிவு டி.எஸ்.பி இளமுருகன் தலைமையில் காவல்துறையினர் உதவியாளர் மணியை தீவிரமாக தேடி வந்த நிலையில். இன்று காலை ஓமலூரில் மணி கைது செய்யப்பட்டதாக தகவல்கள் வெளியாகி உள்ளது. அரசு வேலை வாங்கித் தருவதாக கூறி 17 லட்சம் ரூபாய் மோசடி செய்த முன்னாள் முதல்வர் எடப்பாடி பழனிச்சாமியின் உதவியாளர் மணியின் மீது வழக்குப்பதிவு செய்த காவல்துறையினர் கைது செய்த சம்பவம் பரபரப்பை ஏற்படுத்தியுள்ளது. ஏற்கனவே இது போன்று முன்னாள் முதல்வர் எடப்பாடி பழனிச்சாமி பெயரை பயன்படுத்தி நடமாடும் மருத்துவமனை ஆம்புலன்ஸ் ஓட்டுநர்களை நிரந்தரமாக பணி அமர்த்துவதாக கூறி பல கோடி மோசடி செய்யப்பட்டது குறித்து விசாரணை நடந்து வருவது குறிப்பிடத்தக்கது.
தலைப்பு செய்திகள்
ட்ரெண்டிங் செய்திகள்
