ஒரு வழக்கில் 9 குற்றவாளிகளுக்கு ஆயுள் தண்டனை : அரசு வழக்கறிஞரை அழைத்து கௌரவித்த எஸ்.பி..

ஒரு வழக்கில் 9 குற்றவாளிகளுக்கு ஆயுள் தண்டனை பெற்றுத்தந்த அரசு வழக்கறிஞரை அழைத்து பொன்னாடை அணிவித்து, நினைவுப் பரிசு மற்றும் பாராட்டுச் சான்றிதழ் வழங்கி மயிலாடுதுறை மாவட்டம் எஸ்பி கௌரவித்துள்ளார்

எஸ்.பி நிகழ்வுகள்

Source : ABP

மயிலாடுதுறை மாவட்ட காவல் கண்காணிப்பாளர் அலுவலகத்தில், மாவட்ட காவல் கண்காணிப்பாளர் ஸ்டாலின், தலைமையில் மாதாந்திர குற்ற கலந்தாய்வு கூட்டம் நடைபெற்றது. இந்த கூட்டத்தில் மாவட்டத்தின் சட்டம் ஒழுங்கு நிலை, குற்றத் தடுப்பு நடவடிக்கைகள் மற்றும் நிலுவையில் உள்ள வழக்குகள் குறித்து விரிவாக ஆலோசிக்கப்பட்டது.

குற்றவாளிகள் கண்காணிப்பு மற்றும் வழக்கு விசாரணை

கலந்தாய்வு கூட்டத்தின் போது, மாவட்டத்தில் உள்ள சரித்திர பதிவேடு குற்றவாளிகளின் தற்போதைய நடத்தை மற்றும் அவர்களைத் தொடர்ந்து கண்காணிப்பதற்கான கட்டுப்பாட்டு நடவடிக்கைகள் குறித்து காவல் அதிகாரிகளுக்கு மாவட்ட காவல் கண்காணிப்பாளர் (SP) அறிவுறுத்தல்களை வழங்கினார்.

மேலும், கூட்டத்தில் விவாதிக்கப்பட்ட முக்கிய அம்சங்கள் பின்வருமாறு

* நிலுவை வழக்குகள்: நீண்ட நாட்களாக நிலுவையில் உள்ள குற்ற வழக்குகளில் சம்பந்தப்பட்ட எதிரிகளைக் கண்டறிந்து, திருடுபோன சொத்துக்களை விரைவாகப் பறிமுதல் செய்ய வேண்டும்.

* சட்டவிரோத செயல்கள்: கஞ்சா, தடை செய்யப்பட்ட புகையிலை பொருட்கள், சட்டவிரோத மதுபான விற்பனை, மணல் கடத்தல், சூதாட்டம் மற்றும் லாட்டரி விற்பனை போன்ற குற்றச்செயல்களில் ஈடுபடுவோர் மீது கடும் சட்டபூர்வ நடவடிக்கை எடுக்க உத்தரவிடப்பட்டது.

* தடுப்பு காவல்: தொடர் குற்றச் செயல்களில் ஈடுபடுபவர்கள் மீது குண்டர் தடுப்பு காவல் சட்டத்தின் கீழ் நடவடிக்கை எடுக்க அறிவுறுத்தப்பட்டது.

* விழிப்புணர்வு மற்றும் பாதுகாப்பு: பொதுமக்கள் அதிகம் கூடும் இடங்கள் மற்றும் குடியிருப்பு பகுதிகளில் புதிய கண்காணிப்பு கேமராக்களை (CCTV) பொருத்தவும், பொதுமக்களுக்குப் பல்வேறு தலைப்புகளில் தினசரி விழிப்புணர்வு நிகழ்ச்சிகளை நடத்தவும் அறிவுறுத்தப்பட்டது.

சிறப்பாக பணியாற்றியவர்களுக்கு கௌரவம்

இந்தக் கூட்டத்தின் முக்கிய நிகழ்வாக, நீதிமன்ற விசாரணையில் சிறப்பாக வாதாடி குற்றவாளிகளுக்குத் தண்டனை பெற்றுத் தந்த அரசு வழக்கறிஞர் மற்றும் சிறப்பாகப் பணியாற்றிய காவலர்களுக்குப் பாராட்டு தெரிவிக்கப்பட்டது.

குறிப்பாக, ஒரு முக்கிய கொலை வழக்கில் 9 குற்றவாளிகளுக்கு ஆயுள் தண்டனை பெற்றுத் தந்ததற்காக, மயிலாடுதுறை மாவட்ட அரசு வழக்கறிஞர் இராம. சேயோனுக்கு மாவட்ட காவல் கண்காணிப்பாளர் பொன்னாடை அணிவித்து, நினைவுப் பரிசு மற்றும் பாராட்டுச் சான்றிதழ் வழங்கி கௌரவித்தார்.

மேலும், சட்டம் ஒழுங்கை பராமரித்தல், கஞ்சா மற்றும் குட்கா பொருட்களைப் பறிமுதல் செய்தல், தலைமறைவு குற்றவாளிகளைக் கைது செய்தல் போன்ற பணிகளில் சிறப்பாகச் செயல்பட்ட 50 காவல் அதிகாரிகள் மற்றும் ஆளிநர்களுக்கு பாராட்டுச் சான்றிதழ்கள் வழங்கப்பட்டன.

காவல் வாகனங்கள் ஆய்வு

குற்ற கலந்தாய்வு கூட்டத்தைத் தொடர்ந்து, மாவட்ட ஆயுதப்படை மைதானத்தில் காவல்துறையில் பயன்பாட்டில் உள்ள அனைத்து வாகனங்களின் மாதாந்திர ஆய்வு மாவட்ட காவல் கண்காணிப்பாளர் தலைமையில் நடைபெற்றது.

இந்த ஆய்வின் போது:

* இருசக்கர, நான்கு சக்கர மற்றும் கனரக வாகனங்களின் தற்போதைய நிலை, அவற்றில் உள்ள தொலைத்தொடர்பு சாதனங்கள் மற்றும் ஒளிரும் மின்விளக்குகளின் (Siren lights) செயல்பாடு ஆகியவற்றை SP தணிக்கை செய்தார்.

*நெடுஞ்சாலை ரோந்து வாகனங்களில் இருக்க வேண்டிய எச்சரிக்கை சமிக்கைகள், போக்குவரத்து குறியீடு பலகைகள் மற்றும் பேரிடர் கால உபகரணங்கள் சரியான முறையில் பராமரிக்கப்படுகிறதா என்பது குறித்து நேரடி சோதனை நடத்தப்பட்டது.

* வாகனங்களைச் சுத்தமாகப் பராமரித்தல், சாலை விதிகளைக் கடைபிடித்தல், சீட் பெல்ட் மற்றும் ஹெல்மெட் அணிவதன் அவசியம் குறித்து வாகன ஓட்டுநர்களுக்கு அறிவுறுத்தப்பட்டது.

வாகனங்களைச் சிறந்த முறையில் பராமரித்து வந்த காவல் அலுவலர்களுக்கும் பாராட்டுச் சான்றிதழ்கள் வழங்கப்பட்டன. இக்கூட்டத்தில் கூடுதல் கண்காணிப்பாளர்கள், உட்கோட்ட துணை காவல் கண்காணிப்பாளர்கள் மற்றும் அனைத்து காவல் நிலைய பொறுப்பு அதிகாரிகள் கலந்து கொண்டனர்.