செடான் கார்களில் பின்புற வைப்பர் ஏன் இல்லை? அறிவியல், வடிவமைப்பு ரகசியம்
செடான் கார் வேகமாகச் செல்லும்போது, காற்று கூரையின் மீது பட்டு, பின்புற கண்ணாடி வழியாக சீராகக் கீழே இறங்குகிறது.
எஸ்.யு.வி, ஹேட்ச்பேக் மற்றும் மினிவேன்களில் பின்புற கண்ணாடியை சுத்தம் செய்ய வைப்பர்கள் வழங்கப்படுகின்றன. ஆனால், செடான் (Sedan) கார்களில் பெரும்பாலும் பின்புற வைப்பர்கள் இருப்பதில்லை. இதற்கான அறிவியல் மற்றும் வடிவமைப்பு சார்ந்த முக்கியக் காரணங்கள் கீழே கொடுக்கப்பட்டுள்ளன.
ஏரோடைனமிக்ஸ் மற்றும் காற்றோட்டம்
செடான் கார்களின் பின்புற கண்ணாடி சரிவான ஸ்லோப்பிங் வடிவமைப்பைக் கொண்டுள்ளது. கார் வேகமாகச் செல்லும்போது, காற்று கூரையின் மீது பட்டு, பின்புற கண்ணாடி வழியாக சீராகக் கீழே இறங்குகிறது. இந்த அதிவேக காற்றோட்டமே கண்ணாடியில் படியும் மழைநீர் மற்றும் தூசிகளை இயற்கையாகவே தள்ளிவிட்டு சுத்தம் செய்துவிடுகிறது.
மாறாக, எஸ்.யு.வி மற்றும் ஹேட்ச்பேக் கார்களில் பின்புற கண்ணாடி செங்குத்தாக அல்லது ஃப்ளாட்டாக இருக்கும். இதனால் காற்று கூரையைத் தாண்டியதும், பின்புறத்தில் குறைந்த அழுத்த வெற்றிடம் உருவாகிறது. இது காற்றில் உள்ள தூசி மற்றும் தண்ணீரை பின்பக்க கண்ணாடியை நோக்கி சுழற்றி ஈர்க்கும். எனவே, அந்த வகை கார்களுக்கு வைப்பர்கள் கட்டாயம் தேவை.
டிரங்க் வடிவமைப்பு மற்றும் இடப்பற்றாக்குறை
செடான் கார்களில் டிக்கி எனப்படும் டிரங்க் கதவு மேல்நோக்கித் திறக்கும் வகையில் வடிவமைக்கப்பட்டிருக்கும். கண்ணாடியில் வைப்பர் இருந்தால், டிரங்க் கதவைத் திறக்கும்போது அது வைப்பர் மீது மோதி இடையூறை ஏற்படுத்தும். மேலும், வைப்பரை இயக்குவதற்கான மோட்டாரை (Wiper Motor) பொருத்துவதற்கு செடான் கார்களின் பின்பக்க கண்ணாடியின் கீழோ அல்லது டிரங்க் பகுதியிலோ போதுமான இடம் இருப்பதில்லை.
அதேபோல செடான் வாகன வடிவமைப்பாளர்கள், காரை மென்மையான, நேர்த்தியான பளபளப்பான தோற்றத்துடன் வடிவமைக்கின்றனர். இதில் பின்புற வைப்பரைச் சேர்ப்பது, வாகனத்தின் பின்புறத்தில் உள்ள கோடுகளை கோணலாக்கி விடும் என்பதும் இன்னொரு காரணம்.
சில விதிவிலக்குகள்
எனினும் அனைத்து செடான் கார்களிலும் பின்புற வைப்பர் இருக்காது என்று கூற முடியாது. அதிக மழை மற்றும் பனிப்பொழிவு உள்ள ஜப்பான் போன்ற நாடுகளில் விற்பனையாகும் சில ஜே.டி.எம் செடான் கார்களில் வாடிக்கையாளர்களின் தேவைக்காக பின்புற வைப்பர்கள் வழங்கப்படுகின்றன.
செடான் தோற்றத்தில் இருந்தாலும், பின்பக்க கண்ணாடி மற்றும் டிரங்க் இரண்டும் ஒன்றாக மேல்நோக்கித் திறக்கும் லிஃப்ட்பேக் வகையைச் சேர்ந்த ஸ்கோடா ஆக்டேவியா மற்றும் போர்ஷே பனமேரா போன்ற குறிப்பிட்ட மாடல்களில் பின்புற வைப்பர்கள் பொருத்தப்பட்டுள்ளன.
தலைப்பு செய்திகள்
ட்ரெண்டிங் செய்திகள்
