VinFast: 1 கி.மீ.க்கு வெறும் 8 ரூபாதான்; நோ எக்ஸ்ட்ரா சார்ஜ்- ஓலா, உபருக்கு போட்டியாக வின்ஃபாஸ்ட் டாக்சி!

டெல்லி என்சிஆரில் நாளை (ஜூன் 5) மக்களின் பயன்பாட்டிற்கு, வின்ஃபாஸ்ட் எலக்ட்ரிக் டாக்சிகள் அதிகாரப்பூர்வமாக அறிமுகப்படுத்தப்பட உள்ளன.

வின்ஃபாஸ்ட் சேவை

Source : சிறப்பு ஏற்பாடு

ஓலா, உபெர் நிறுவனங்களுக்குப் போட்டியாக களமிறங்கும் வின்ஃபாஸ்ட்: டெல்லியில் நாளை தொடங்கும் எலக்ட்ரிக் டாக்சி சேவை.

இந்தியாவில் பல ஆண்டுகளாக ஆதிக்கம் செலுத்தி வரும் ஓலா, உபெர் ஆகிய கால் டாக்சி நிறுவனங்களுக்கு கடும் போட்டியை ஏற்படுத்தும் வகையில், வியட்நாமைச் சேர்ந்த பிரபல எலக்ட்ரிக் வாகனத் தயாரிப்பு நிறுவனமான வின்ஃபாஸ்ட் தனது புதிய டாக்சி சேவையைத் தொடங்க உள்ளது.

வின்ஃபாஸ்ட் எலக்ட்ரிக் டாக்சிகள்

இதன் முதற்கட்டமாக, டெல்லி என்சிஆரில் நாளை (ஜூன் 5) மக்களின் பயன்பாட்டிற்கு, வின்ஃபாஸ்ட் எலக்ட்ரிக் டாக்சிகள் அதிகாரப்பூர்வமாக அறிமுகப்படுத்தப்பட உள்ளன.

வின்ஃபாஸ்ட் நிறுவனத்தின் துணை நிறுவனமான ஜிஎஸ்எம் மூலமாக இந்த பிரத்யேக சேவை இந்தியாவில் இயங்கவுள்ளது. இதற்காக, வின்ஃபாஸ்ட் நிறுவனம் தனது சொந்தத் தயாரிப்பான VF MPV7 எலக்ட்ரிக் கார் மாடலைப் பயன்படுத்தத் திட்டமிட்டுள்ளது.

1000 எலக்ட்ரிக் கார்கள் அறிமுகம்

தற்போதைய சந்தையில் இயங்கி வரும் ஓலா, உபெர் நிறுவனங்கள் ஓட்டுநர்களின் சொந்தக் கார்களை இணைத்துச் செயல்படுகின்றன. ஆனால், வின்ஃபாஸ்ட் நிறுவனம் தனக்கே சொந்தமான எலக்ட்ரிக் கார்களைப் பயன்படுத்தி, மாதச் சம்பளத்திற்கு ஓட்டுநர்களை வேலைக்கு அமர்த்தி இந்தச் சேவையை வழங்கவுள்ளது.  இதற்காக 1000 எலக்ட்ரிக் கார்கள் அமலுக்கு வர உள்ளன.

இதற்காக சிறப்பு நிறம் (turquoise color ) அறிமுகம் செய்யப்பட உள்ளது. இதன்மூலம் டாக்ஸி நிறம் தனியாகத் தெரியும். இந்த நிலையில், டாக்ஸி பயனர்களுக்கு கிலோ மீட்டருக்கு 8 ரூபாய் மட்டுமே வசூல் செய்யப்படும்.

கூடுதல் கட்டணம் இல்லை

அதேபோல மழை, போக்குவரத்து நெரிசல், பண்டிகைகள் அல்லது பீக் நேரங்களில் ஓலா மற்றும் ஊபர் போன்ற சேவைகளுக்கான கட்டணங்கள் கணிசமாக அதிகரிக்கும். இருப்பினும், வின்ஃபாஸ்ட் சேவையில் பயணிகள் அத்தகைய கூடுதல் கட்டணங்களைச் செலுத்த வேண்டியதில்லை.