Tata Punch EV: விபூதி அடித்த டாடா..! பஞ்ச் 590KM ஓடாதாம் - உண்மையான ரேஞ்ச் என்ன? பேட்டரி, விலை விவரங்கள்
Tata Punch Facelift EV: இந்திய ஆட்டோமொபைல் சந்தையில் டாடா பஞ்சின் ஃபேஸ்லிஃப்ட் எடிஷன், உண்மையிலேயே 590 கிலோ மீட்டர் ரேஞ்ச் அளிக்குமா? என்ற விவரங்களை இந்த தொகுப்பில் அறியலாம்.
Tata Punch Facelift EV: டாடா பஞ்சின் ஃபேஸ்லிஃப்ட் எடிஷன், 30KWh மற்றும் 40KWh என இரண்டு பேட்டரி பேக் ஆப்ஷன்களை கொண்டுள்ளது.
டாடா பஞ்ச் ஃபேஸ்லிஃப்ட் எஸ்யுவி:
டாடா நிறுவனத்தின் சார்பில் இந்திய ஆட்டோமொபைல் சந்தையில் அதிகம் விற்பனையாகும் கார் மாடலாக, மைக்ரோ எஸ்யுவி ஆன பஞ்ச் திகழ்கிறது. இதன் மேம்படுத்தப்பட்ட மின்சார எடிஷன் அண்மையில் அறிமுகப்படுத்தப்பட்டது. வழக்கமான முறையில் இதன் தொடக்க விலை ரூ.9.69 லட்சமாகவும், BaaS எனப்படும் பேட்டரியை வாடகைக்கும் எடுக்கும் முறையில் தொடக்க விலை ரூ.6.49 லட்சமாகவும் நிர்ணயிக்கப்பட்டுள்ளது. டாப் எண்ட் வேரியண்ட்களின் விலை பேட்டரியுடன் சேர்த்து அதிகபட்சமாக ரூ.12.59 லட்சம் வரை நீள்கிறது. 30KWh மற்றும் 40KWh என இரண்டு பேட்டரி பேக் ஆப்ஷன்கள் வழங்கப்பட்டுள்ளன. இந்நிலையில், இந்த இரண்டில் எந்த ஆப்ஷனை தேர்வு செய்தால், 590 கிலோ மீட்டர் தூரம் வரை ரேஞ்ச் அளிக்கும் என்பதே தற்போது வாடிக்கையாளர்களின் கேள்வியாக உள்ளது.
590 கிலோ மீட்டர் ரேஞ்ச் கொடுக்குமா பஞ்ச்?
மேம்படுத்தப்பட்ட பஞ்சை அறிமுகப்படுத்துவதற்கு முன்னதாக, காரின் செயல்திறனை காட்டுவதற்காக டாடா நிறுவனம் சோதனை வீடியோ ஒன்றை வெளியிட்டது. அதில் முழுமையாக சார்ஜ் செய்யப்பட்ட பஞ்ச் மாடலானது, ராஜஸ்தானின் ஜெய்பூரில் தொடங்கி குஜராத்தின் ஹிமத்நகர் வரை, அதாவது 593.6 கிலோ மீட்டர் தூரம் வரை பயணித்து அசத்தியது. இதனால், நெக்ஸானில் உள்ள 45KWh பேட்டரி ஆப்ஷன் புதிய பஞ்சில் வழங்கப்பட்டுள்ளதாக கருதப்பட்டது. ஆனால், அண்மையில் சந்தைப்படுத்தியபோது 30KWh மற்றும் 40KWh பேட்டரி ஆப்ஷன்கள் அப்படியே தொடர்வதாகவும், நிஜ உலகில் அதிகபட்சமாக 355 கிலோ மீட்டர் வரை ரேஞ்ச் அளிக்கும் என்றும் பஞ்ச் நிறுவனம் அறிவித்துள்ளது. எனில் சோதனை வீடியோவில் வெளியானது பொய்யா என்ற கேள்வி வலுவடைந்துள்ளது.
பஞ்சின் 590 கிலோ மீட்டர் ரேஞ்ச் எப்படி சாத்தியம்?
பஞ்சின் 590 கிலோ மீட்டர் ரேஞ்ச் என்பது சில குறிப்பிட்ட ட்ரைவிங் வழிமுறைகளை பின்பற்றியதன் மூலமே சாத்தியமாகியுள்ளது. அதில் நிலையான மற்றும் கட்டுப்படுத்தப்பட்ட வேகம், சீரான ஆக்சிலரேஷன், ரிஜெனரேடிப் ப்ரேக்கிங் சிஸ்டத்தை சரியாக பயன்படுத்துவது, போக்குவரத்து நெரிசல் இல்லாத நெடுஞ்சாலைகளில் குறிப்பிட்ட வேகத்தில் (சிமார் 80 கிலோ மீட்டர்) மாற்றமின்றி தொடர்ந்து பயணித்தது ஆகியவை அடங்கும். இதில் வழங்கப்பட்டுள்ள 3 நிலைகளுக்கான பேடல் ஷிஃப்டட்கள் ப்ரேக் அடிக்கும்போது இழக்கும் ஆற்றலை சேமித்து, மீண்டும் பேட்டரிக்கு வழங்குவதன் மூலம் ஆற்றல் இழப்பு கணிசமாக குறைக்கப்படுகிறது. அடிக்கடி வேகத்தை ஏற்றி இறக்காமலும், ப்ரேக்கை பயன்படுத்தாமலும் செலுத்தியதன் மூலமாக 590 கிலோ மீட்டர் சாத்தியமானதாக தெரிவிக்கப்பட்டுள்ளது. ஆனால், தினசரி பயன்பாட்டில் இதில் சாத்தியமில்லை என்பதே உற்பத்தியாளர்களின் கருத்தாக உள்ளது.
டாடா பஞ்ச் பேட்டரி, ரேஞ்ச் விவரங்கள்:
30KWh பேட்டரி ஆப்ஷனானது சோதனைகளின் அடிப்படையில் 365 கிலோ மீட்டர் ரேஞ்சும், நிஜ உலக பயன்பாட்டில் 270 கிலோ மீட்டர் ரேஞ்சும் வழங்கும் என தெரிவிக்கப்பட்டுள்ளது. லாங் ரேஞ்ச் வேரியண்ட்களில் இடம்பெற்றுள்ள் 40KWh பேட்டரி ஆனது, சோதனைகளின் அடிப்படையில் 468 கிலோ மீட்டர் ரேஞ்சும், நிஜ உலக பயன்பாட்டில் 350 கிலோ மீட்டர் ரேஞ்சும் அளிக்கும் என தெரிவிக்கப்பட்டுள்ளது. முந்தைய எடிஷன் பஞ்சானது பூஜ்ஜியத்திலிருந்து மணிக்கு 100 கிலோ மீட்டர் வேகத்தை 9.5 விநாடிகளில் எட்டிய நிலையில், தற்போது அது 9 விநாடிகளாக குறைக்கப்பட்டுள்ளது. பேட்டரிக்கு வாழ்நாள் வாரண்டி வழங்கப்பட்டுள்ளது. 65KW டிசி ஃபாஸ்ட் சார்ஜரை பயன்படுத்துவதன் மூலம், 26 நிமிடங்களில் 20 முதல் 80 சதவிகிதத்தை எட்ட முடியுமாம். இதில் 15 நிமிடங்கள் சார்ஜ் செய்தாலே 135 கிலோ மீட்டர் தூரம் வரை பயணிக்க முடியுமாம்.
டாடா பஞ்ச் விலை, போட்டியாளர் விவரங்கள்:
| வேரியண்ட் | விலை (பேட்டரியுடன்) | பேட்டரி பேக் |
| ஸ்மார்ட் | ரூ.9.69 லட்சம் | 30KWh |
| ஸ்மார்ட் + | ரூ.10.29 லட்சம் | 30KWh |
| ஸ்மார்ட் + | ரூ.10.89 லட்சம் | 40KWh |
| அட்வென்சர்ட் | ரூ.11.59 லட்சம் | 40KWh |
| எம்பவர்ட் | ரூ.12.29 லட்சம் | 40KWh |
| எம்பவர்ட் ப்ளஸ் S | ரூ.12.59 லட்சம் | 40KWh |
ப்ராண்டின் போர்ட்ஃபோலியோவில் டியாகோ மின்சார எடிஷனுக்கு மேலேயும், நெக்ஸான் மின்சார எடிஷனுக்கு கீழும் பஞ்ச் நிலைநிறுத்தப்பட்டுள்ளது. இந்திய சந்தையில் பஞ்ச் மின்சார கார் மாடலானது சிட்ரோயன் eC3, எம்ஜி விண்ட்சர், எம்ஜி கோமெட் ஆகியவற்றிடமிருந்து பிரதான போட்டியை எதிர்கொள்கிறது.
தலைப்பு செய்திகள்
ட்ரெண்டிங் செய்திகள்
