MG Plug in Hybrid: 7 சீட்டர் ப்ளக்-இன் ஹைப்ரிட் கார்.. 125Km ரேஞ்ச், 1,100Km மைலேஜ் - லோ பட்ஜெட்டில் MG அதிரடி

MG Plug in Hybrid SUV: இந்திய ஆட்டோமொபைல் சந்தையில் மஹிந்த்ராவின் XUV 7XO காருக்கு போட்டியாக, புதிய ப்ளக்-இன் ஹைப்ரிட் கார் மாடலை அறிமுகப்படுத்த எம்ஜி நிறுவனம் திட்டமிட்டுள்ளது.

ஆட்டோமொபைல் செய்திகள்

Source : social media/x

MG Plug in Hybrid SUV: எம்ஜி நிறுவனத்தின் புதிய ப்ளக்-இன் ஹைப்ரிட் கார் மாடல் தொடர்பான விவரங்கள் கீழே பட்டியலிடப்பட்டுள்ளன.

எம்ஜி ப்ளக்-இன் ஹைப்ரிட் எஸ்யுவி:

இந்திய ஆட்டோமொபைல் சந்தையில் ப்ளக்-இன் ஹைப்ரிட் பிரிவில், தனது பயணத்தை தொடங்க ஜேஎஸ்டபள்யு எம்ஜி நிறுவனம் திட்டமிட்டுள்ளது. இந்த பிரிவில் இதுநாள் வரையில் பிரீமியம் கார் உற்பத்தி நிறுவனங்களான பிஎம்டபள்யு, லெக்சஸ், போர்ஷே உள்ளிட்டவையே ஆதிக்கம் செலுத்தி வந்தன. இந்நிலையில் வெளியாக உள்ள புதிய எஸ்யுவி கார் மாடல் தொடர்பான அதிகாரப்பூர்வ தகவல்கள் எதுவும் பெரிய அளவில் வெளியாகவில்லை. ஆனாலும், உள்நாட்டு சந்தையில் மஹிந்த்ராவின் XUV 7XO கார் மாடலுக்கு போட்டியாக நிலைநிறுத்தப்படும் என எதிர்பார்க்கப்படுகிறது. அதேநேரம், மஹிந்த்ராவின் XEV 9S காருடன் போட்டியிடும் விதமாக, புதிய காரானது முழுமையான மின்சார எடிஷனிலும் சந்தைப்படுத்தப்பட உள்ளது.

இந்திய சந்தைக்கான சீன மாடல்

520 என கோட்நேமை கொண்டுள்ள எம்ஜி நிறுவனத்தின் புதிய எஸ்யுவி ஆனது,  Wuling Starlight 560 என்ற பெயரில் சீனாவில் விற்பனையில் உள்ள மாடலின் அடிப்படையில் உருவாக்கப்பட்டு வருகிறது. இது வரும் அக்டோபர் மாதம் சந்தைப்படுத்தப்பட உள்ளதாக தகவல்கள் தெரிவிக்கின்றன. சீன மாடலை அடிப்படையாக கொண்டு விற்பனைக்கு வரவுள்ள புதிய ப்ளக்-இன் ஹைப்ரிட் எஸ்யுவின் என்ன எதிபார்க்கலாம் என கீழே விவரிக்கப்பட்டுள்ளது.

எம்ஜி ப்ளக்-இன் ஹைப்ரிட் எஸ்யுவி: டிசைன், அளவீடுகள்

அளவீடுகள் அடிப்படையில், Wuling Starlight 560 க்ராஸ்-ஓவர் எஸ்யுவி ஆனது, 4,745 மில்லி மீட்டர் நீளம், 1,850 மில்லி மீட்டர் அகலம் மற்றும் 1,755 - 1,770 மில்லி மீட்டர் வரையிலான உயரத்தை கொண்டுள்ளது. வீல் பேஸ் 2,810 மில்லி மீட்டர் ஆக வடிவமைக்கப்பட்டுள்ளது.  இதே அளவீடுகள் அப்படியே இந்திய சந்தைக்கான மாடலிலும் தொடரும் என எதிர்பார்க்கப்படுகிறது. இதன் மூலம் அளவீடுகள் அடிப்படையில் மஹிந்த்ராவின் XUV 7XO மாடலுக்கு இணையாக இருக்கும் என கருதப்படுகிறது. சர்வதேச சந்தையில் ஸ்டார்லைன் 560 மாடலானது 5 மற்றும்7 சீட்டர் கான்ஃபிகரேஷனில் விற்பனை செய்யப்படுகிறது. 320 லிட்டர் அளவிற்கு உள்ள பூட்-ஸ்பேஸானது இருக்கைகளை மடிப்பதன் மூலம் ஆயிரத்து 945 லிட்டராக உயர்த்த முடியும்.

எம்ஜி ப்ளக்-இன் ஹைப்ரிட் : பவர்ட்ரெயின் விவரங்கள்

சர்வதேச சந்தையில் ஸ்டார்லைன் 560 காரானது 1.5 லிட்டர் டர்போ பெட்ரோல், 1.5லிட்டர் நேட்சுரல் ஆஸ்பிரேடட் ப்ளக்-இன் ஹைப்ரிட் மற்றும் BEV ஆப்ஷன்களில் கிடைக்கிறது. இந்த அம்சங்கள் அப்படியே தொடர உள்ளதாம். இந்திய சந்தைக்கான எடிஷனில் 1.5லிட்டர் நேட்சுரலி ஆஸ்பிரேடட் பெட்ரோல் இன்ஜின் ஆனது, 194bhp திறன் கொண்ட மின்சார மோட்டார், 9.5-20.5KWh திறன் கொண்ட பேட்டரியுடன் இணைக்கப்படுகிறது. முழுமையான மின்சார எடிஷனில் 125 கிலோ மீட்டர் மற்றும் எரிபொருளுடன் சேர்த்தால், ஒட்டுமொத்தமாக ஆயிரத்து 100 கிலோ மீட்டர் ரேஞ்ச் அளிக்கிறது. ஒவ்வொரு 100 கிலோ மீட்டர் பயணத்திற்கும் இந்த காரானது 5.3 லிட்டர் எரிபொருளை செலவிடும் என கணக்கிடப்பட்டுள்ளது. சர்வதேச சந்தையில் ஸ்டார்லைன் 560 எஸ்யுவி ஆனது, மிகக் குறைந்த விலையில் அணுகக் கூடிய ப்ளக்-இன் ஹைப்ரிட் எஸ்யுவி ஆக உள்ளது. 

எம்ஜி ப்ளக்-இன் ஹைப்ரிட் : 500 கி.மீ., ரேஞ்ச்

சீன சந்தையில் இந்த எஸ்யுவி ஆனது 100KW மோட்டர் உடன்  54.5-56.7KWh கூடிய பேட்டரி ஆப்ஷன்களை கொண்டுள்ளது. இதனை முழுமையாக சார்ஜ் செய்தால் அதிகபட்சமாக 500 கிலோ மீட்டர் ரேஞ்ச் அளிக்கும் என கூறப்படுகிறது. 

எம்ஜி ப்ளக்-இன் ஹைப்ரிட் : முக்கிய அம்சங்கள்

• 12.8 இன்ச் டச்ஸ்க்ரீன்
• Ling OS இன்ஃபோடெயின்மெண்ட் சிஸ்டம்
• ஹாய்கார் & கார்லிங்க் சப்போர்ட்
• டிஜிட்டல் இன்ஸ்ட்ரூமெண்ட் க்ளஸ்டர்
• வயர்லெஸ் போன் சார்ஜிங்
• டூயல் டோன் இண்டீரியர் தீம்
• ஒன்றுக்கும்மேற்பட்ட கப் ஹோல்டர்ஸ் & சேமிப்பு இடங்கள்
• ஓவர் தி ஏர் அப்டேட்கள்
• வழிகாட்டுதலுடன் கூடிய ரிவர்ஸ் கேமரா
• பார்கிங் சென்சார்கள்
• டயர் பிரஷர் மானிட்டரிங் சிஸ்டம்
• எலெக்ட்ரானிக் ஸ்டெபிலிட்டி கன்ட்ரோல்
• EBD உடன் கூடிய ABS

எம்ஜி ப்ளக்-இன் ஹைப்ரிட் - விலை விவரங்கள்

எம்ஜி நிறுவனத்தின் புதிய 7 சீட்டர் ப்ளக்-இன் ஹைப்ரிட் எஸ்யுவி விலையானது, 20 லட்சத்தில் தொடங்கி 30 லட்சம் ரூபாய் வரையில் நிர்ணயிக்கப்படலாம். அதேநேரம், முழுமையான மின்சார எடிஷனின் விலையானது 25 லட்சத்தில் தொடங்கி 35 லட்சம் வரை நீளக்கூடும் என கருதப்படுகிறது.