மாருதியின் மலிவு விலை எலெக்ட்ரிக் கார்: ரூ.8 லட்சத்தில் இந்திய EV சந்தையில் புது புரட்சி! எப்போ அறிமுகம்?

10 லட்சத்துக்குள்ளதான்.. மலிவு விலை இ.வி. காரை களமிறக்கும் மாருதி- என்னென்ன அம்சங்கள்? பேட்டரி, ரேஞ்ச்!

மாருதி சுசுகி

Source : சிறப்பு ஏற்பாடு

இந்தியாவில் எலெக்ட்ரிக் கார்களுக்கான தேவை தொடர்ந்து அதிகரித்து வரும் நிலையில், மலிவு விலை மாடல்கள் குறைவாகவே உள்ளன. இதனைப் போக்கும் வகையில், மாருதி சுஸுகி நிறுவனம் சுமார் ரூ.10 லட்சத்திற்குள் புதிய சிறிய மலிவு விலை எலெக்ட்ரிக் காரை உருவாக்கும் பணியில் தீவிரமாக ஈடுபட்டுள்ளது.

இதன் ஆரம்ப எக்ஸ் ஷோரூம் விலை ரூ.8.50 லட்சமாகவும், டாப் வேரியண்ட்டின் விலை ரூ.10.50 லட்சமாகவும் இருக்கலாம். பெட்ரோல் அல்லது டீசல் காரை எலக்ட்ரிக் காராக மாற்றாமல், ஆரம்பம் முதலே முற்றிலும் புதிய எலக்ட்ரிக் வாகனமாக இது வடிவமைக்கப்படுகிறது. இதனால் பேட்டரி மற்றும் மோட்டாரைச் சரியாகப் பொருத்த முடிவதோடு, சிறப்பான கேபின் இடவசதியும் கிடைக்கும்.

சிறிய பேட்டரி பேக்; 315 கி.மீ ரேஞ்ச்

விலையைக் குறைவாக வைத்திருக்க, பெரிய பேட்டரிக்கு பதிலாக சிறிய பேட்டரி பேக் இதில் பயன்படுத்தப்பட உள்ளது. மேலும், பெரும்பாலான உதிரி பாகங்களை இந்தியாவிலேயே உற்பத்தி செய்து பயன்படுத்தவும் மாருதி திட்டமிட்டுள்ளது. ஒருமுறை முழுமையாக சார்ஜ் செய்தால் 250 முதல் 315 கி.மீ வரை ரேஞ்ச் கொடுக்கும். இது தினசரி நகரப் பயன்பாட்டிற்கும், குறுகிய தூரப் பயணங்களுக்கும் போதுமானதாக இருக்கும்.

யாருக்கெல்லாம் போட்டி?

மாருதியின் ப்ரீமியம் மாடலான e-Vitara, நெக்ஸா ஷோரூம்களில் விற்கப்படும் நிலையில், இந்த புதிய கார் மாருதியின் அரினா ஷோரூம்கள் மூலம் விற்பனைக்கு வரும். இதன் மூலம் வேகன்ஆர், ஸ்விஃப்ட் போன்ற சிறிய கார்களை வாங்கும் வாடிக்கையாளர்களை எளிதாகச் சென்றடைய முடியும். இந்த கார் டாடா டியாகோ இவி மற்றும் எம்.ஜி. கோமெட் இவி ஆகிய கார்களுக்கு நேரடிப் போட்டியாக அமையும். மாருதியின் பரந்த சர்வீஸ் நெட்வொர்க் இதற்குப் பெரும் பலமாக இருக்கும்.

சமீபத்தில் சுஸுகி நிறுவனம் ஜப்பானில் e-Sky என்ற சிறிய எலெக்ட்ரிக் ஹேட்ச்பேக் காரை அறிமுகப்படுத்தியது. 26 kWh பேட்டரியுடன் 310 கி.மீ ரேஞ்ச் மற்றும் அதிக கேபின் ஸ்பேஸ் தரும் பாக்ஸி டிசைனுடன் அந்த கார் வெளியானது. ஆனால், அந்த மாடலுக்கும் இந்தியாவில் வரப்போகும் காருக்கும் நேரடி தொடர்பு உள்ளதா என்பது இன்னும் உறுதிப்படுத்தப்படவில்லை.

எப்போது அறிமுகம்?

புதிய காரின் பெயர், வெளியீட்டு தேதி, மோட்டார் திறன் மற்றும் சார்ஜிங் வேகம் போன்ற விவரங்கள் இன்னும் வெளியிடப்படவில்லை. குறைந்த பட்ஜெட்டில் முதல்முறையாக எலெக்ட்ரிக் கார் வாங்க நினைக்கும் நடுத்தர வர்க்க வாடிக்கையாளர்களுக்கு, நிறுவனத்தின் அதிகாரப்பூர்வ அறிவிப்புக்குப் பிறகு இந்த கார் ஒரு சிறந்த தேர்வாக அமையும் என்று எதிர்பார்க்கப்படுகிறது.