Honda ZR-V: இந்தியாவை கலக்க வரும் ஹோண்டா ஹைபிரிட் SUV கார்: விலை, மைலேஜ், அம்சங்கள்!
பிரீமியம் வசதிகளுடன் ஸ்ட்ராங் ஹைப்ரிட் தொழில்நுட்பத்தில் ஹோண்டா ZR-V கார் வெளியாக உள்ளது. இதன் வடிவமைப்பு, இன்ஜின் மற்றும் விலை விவரங்கள் இதோ!
இந்திய ஆட்டோமொபைல் சந்தையில் எஸ்யூவி கார்களுக்கான தேவை அதிகரித்து வரும் நிலையில், ஹோண்டா நிறுவனம் தனது புதிய ஹோண்டா ZR-V (Honda ZR-V) மாடலை விரைவில் இந்தியாவில் அறிமுகப்படுத்தத் திட்டமிட்டுள்ளது. பிரீமியம் வசதிகளுடன் ஸ்ட்ராங் ஹைப்ரிட் தொழில்நுட்பத்தில் இந்தக் கார் வெளியாக உள்ளது.
வடிவமைப்பு
ஹோண்டா நிறுவனத்தின் பிரபலமான சிவிக் காரின் பிளாட்ஃபார்ம் அடிப்படையிலேயே இந்த ZR-V உருவாக்கப்பட்டுள்ளது. ஸ்போர்ட்டியான தோற்றத்தை அளிக்கும் பெரிய எண்கோண வடிவ கிரில், நேர்த்தியான எல்.இ.டி ஹெட்லேம்ப்கள் மற்றும் L-வடிவ டி.ஆர்.எல்கள் இடம்பெற்றுள்ளன.
ஏரோடைனமிக் டிசைனில் அமைந்த அலாய் வீல்கள், பின்புறத்தில் சரிவான மேற்கூரை, எல்.இ.டி டெயில் லைட்கள் மற்றும் டூயல் எக்ஸாஸ்ட் அமைப்புடன் இது பிரீமியம் தோற்றத்தைக் கொண்டுள்ளது.
இன்ஜின் மற்றும் மைலேஜ்
இந்த காரில் 2.0 லிட்டர் 4-சிலிண்டர் அட்கின்சன் சைக்கிள் பெட்ரோல் இன்ஜின் பயன்படுத்தப்பட உள்ளது. இதனுடன் e:HEV ஸ்ட்ராங் ஹைப்ரிட் சிஸ்டம் மற்றும் இரண்டு எலக்ட்ரிக் மோட்டார்கள் இணைக்கப்பட்டுள்ளன. இதன் மூலம் அதிகபட்சமாக 184 PS பவரையும், 315 Nm டார்க் திறனையும் இந்த கார் வெளிப்படுத்தும். ஸ்ட்ராங் ஹைப்ரிட் சிஸ்டம் என்பதால் இது அதிக மைலேஜ் மற்றும் சிறப்பான டிரைவிங் ரேஞ்சை வழங்கும்.
சிறப்பம்சங்கள்
உட்புறத்தில் 9-இன்ச் ஃப்ளோட்டிங் டச்ஸ்கிரீன் இன்ஃபோடெயின்மென்ட் சிஸ்டம், 10.2-இன்ச் டிஜிட்டல் இன்ஸ்ட்ரூமென்ட் கிளஸ்டர், பனோரமிக் சன்ரூஃப், ஆட்டோமேட்டிக் கிளைமேட் கண்ட்ரோல் மற்றும் பிரீமியம் இருக்கைகள் வழங்கப்பட்டுள்ளன.
பயணிகளின் பாதுகாப்பிற்காக, ஹோண்டா சென்சிங் எனப்படும் லெவல்-2 ADAS தொழில்நுட்பம், பல ஏர்பேக்குகள், 360-டிகிரி கேமரா ஆகியவை உள்ளன.
விலை எப்படி?
இந்திய சந்தையில் இது ஹூண்டாய் டூஸான், ஜீப் காம்பஸ் போன்ற பிரீமியம் கார்களுக்கு போட்டியாக வரும் என்று எதிர்பார்க்கப்படுகிறது. இதன் அதிகாரப்பூர்வ விலை இன்னும் அறிவிக்கப்படாத நிலையில், எக்ஸ் ஷோரூம் விலை தோராயமாக ரூ. 25 லட்சம் வரை இருக்கலாம் என கூறப்படுகிறது.
தலைப்பு செய்திகள்
ட்ரெண்டிங் செய்திகள்
