Kawasaki z h2 series: கவாசகி நிறுவனத்தின் z h2 சீரிஸ் பைக் வேரியண்ட்கள் இந்தியாவில் அறிமுகம்
கவாசகி நிறுவனத்தின் z h2 சீரிஸ் பைக் வேரியண்ட்கள் இந்தியாவில் அறிமுகப்படுத்தப்பட்டுள்ளன.
கவாசகி நிறுவனத்தின் z h2 சீரிஸ் பைக் வேரியண்ட்கள் இந்திய சந்தையில் அறிமுகப்படுத்தப்பட்டுள்ளன.
கவாசகி நிறுவன வேரியண்ட்கள் அறிமுகம்:
ஜப்பானை சேர்ந்த கவாசகி நிறுவனம் அண்மையில் எலிமினேட்டர் 400 குரூஸர் மோட்டார்சைக்கிளை, தனது நாட்டில் அறிமுகப்படுத்தியது. தொடர்ந்து, இந்தியா உள்ளிட்ட பிற நாடுகளிலும் அந்த மாடல் அறிமுகம் செய்யப்பட உள்ளது. இந்நிலையில், கவாசகி மோட்டார்ஸ் இந்தியா நிறுவனம் தனது ஃபிளாக்ஷிப் தர நேக்ட் 2023 கவாசகி Z H2 மற்றும் Z H2 SE மோட்டார்சைக்கிள் மாடல்களை இந்திய சந்தையில் அறிமுகப்படுத்தியுள்ளது. இவை இரண்டு ஸ்டிரீட் ஃபைட்டர் மாடல்களிலும் மெட்டாலிக் மேட் கிராஃபைன் ஸ்டீல் கிரே எனும் ஒரே வண்ணத்தில் மட்டுமே கிடைக்கிறது. புதிய நிறம் மட்டுமே 2023 மாடல்களில் மேற்கொள்ளப்பட்டு இருக்கும் மாற்றமாக உள்ளது. மற்றபடி, இரு மாடல்களிலும் அதன் ஒரிஜினல் அம்சங்கள் அப்படியே வழங்கப்பட்டுள்ளன.
இன்ஜின் விவரங்கள்:
2023 கவாசகி Z H2 மற்றும் Z H2 SE மாடல்களில் 998சிசி, இன்-லைன் நான்கு சிலிண்டர்கள் கொண்ட லிக்விட் கூல்டு இன்ஜின் வழங்கப்பட்டு உள்ளது. இந்த இன்ஜின் 197 ஹெச்பி பவர், 137 நியூட்டன் மீட்டர் டார்க் இழுவிசையை வெளிப்படுத்தும் திறன் கொண்டுள்ளது. புதிய கவாசகி Z H2 சீரிசின் இரண்டு வேரியண்ட்களிலும் எலெக்டிரானிக் குரூயிஸ் கண்ட்ரோல், பவர் மோட்கள், இண்டகிரேட் செய்யப்பட்ட ரைடிங் மோட்கள், முழுமையான எல்.ஈ.டி லைட்டிங், புளூடூத் டிஎப்டி டிஸ்ப்ளே, பை-டைரக்ஷனல் குயிக் ஷிஃப்டர், ஏபிஎஸ் மற்றும் டிராக்ஷன் கண்ட்ரோல் சிஸ்டம் போன்ற அம்சங்கள் வழங்கப்பட்டு உள்ளன.
இதர சிறப்பம்சங்கள்:
அதோடு, Z H2 சீரிஸ் மாடலில் M4.32 முன்புற பிரேக் கேலிப்பர்கள், Z H2 SE மாடலில் பிரெம்போ ஸ்டைல்மா முன்புற பிரேக் கேலிபர்கள் இடம்பெற்றுள்ளன. இதில் டுவின் எல்.ஈ.டி முகப்பு விளக்குகள், ஸ்டீல் டிரெலிஸ் ஃபிரேம், அலுமினியம் ஸ்விங்ஆர்ம் உள்ளிட்டவை வழங்கப்பட்டுள்ளன. Z H2 மற்றும் Z H2 SE மாடல்களில் கவாசகி நிறுவனத்தின் "ரிவர்-மார்க்" கொண்டுள்ளன. இரு மாடல்களின் தோற்றத்திலும் எவ்வித மாற்றமும் மேற்கொள்ளப்படவில்லை. சூப்பர்சார்ஜ் செய்யப்பட்ட புதிய நேக்ட் மாடல்களின் முன்பதிவு ஏற்கனவே தொடங்கி நடைபெற்று வருவது குறிப்பிடத்தக்கது.
விலை விவரங்கள்:
புதிய கவாசகி Z H2 வேரியண்டின் விலை ரூ. 23 லட்சத்து 02 ஆயிரம் என்றும், கவாசகி Z H2 SE வேரியண்டின் விலை ரூ. 27 லட்சத்து 22 ஆயிரம் என நிர்ணயம் செய்யப்பட்டு உள்ளது. அனைத்து விலைகளும் எக்ஸ்-ஷோரூம் அடிப்படையில் குறிப்பிடப்பட்டு உள்ளது. முன்பதிவு செய்த நபர்களுக்கான விநியோகம் தொடர்பான அறிவிப்பு விரைவில் வெளியாகும் என எதிர்பார்க்கப்படுகிறது.
தலைப்பு செய்திகள்
ட்ரெண்டிங் செய்திகள்
