ஒரே சார்ஜில் 180 கிமீ ரேஞ்ச்; வெறும் ரூ.5 ஆயிரம் போதும்- Keeway Hypevolt R ஸ்கூட்டர் விலை, அம்சங்கள்!

இந்தியாவில் களமிறங்கிய கீவே ஹைப்வோல்ட் ஆர் (Keeway Hypevolt R) எலெக்ட்ரிக் ஸ்கூட்டர்: ரேஞ்ச் மற்றும் சிறப்பம்சங்கள்

ஹைப்வோல்ட் ஆர்

Source : சிறப்பு ஏற்பாடு

இந்திய இருசக்கர எலெக்ட்ரிக் வாகனச் சந்தையில் வாடிக்கையாளர்களின் தேவையை உணர்ந்து, முன்னணி நிறுவனமான கீவே தனது புதிய ஹைப்வோல்ட் ஆர் (Hypevolt R) என்ற பிரீமியம் எலெக்ட்ரிக் ஸ்கூட்டரை விற்பனைக்கு அறிமுகப்படுத்தியுள்ளது.

அதிநவீன தொழில்நுட்பங்கள் மற்றும் சிறந்த செயல்திறனுடன் வெளிவந்துள்ள இந்த ஸ்கூட்டரின் ஆரம்ப எக்ஸ் ஷோரூம் விலை ரூ. 1.99 லட்சமாக நிர்ணயிக்கப்பட்டுள்ளது.

பேட்டரி, ரேஞ்ச் விவரங்கள்

எலெக்ட்ரிக் ஸ்கூட்டர் வாங்குபவர்கள் அதிகம் எதிர்பார்க்கும் ரேஞ்ச் விஷயத்தில் இந்த மாடல் சிறப்பான இடத்தை பிடித்துள்ளது. இதில் அதிக திறன் கொண்ட பேட்டரி பேக் பொருத்தப்பட்டுள்ளது.

இந்த பேட்டரியை ஒருமுறை முழுமையாக (100%) சார்ஜ் செய்தால், அதிகபட்சமாக 180 கிலோமீட்டர் தூரம் வரை தடையின்றி பயணிக்க முடியும் என நிறுவனம் தெரிவித்துள்ளது. ஸ்கூட்டருக்கு வெளிப்புறம் மற்றும் உள்புறம் என இரு வகையாகவும் சார்ஜ் செய்யலாம்.

இதற்கான புக்கிங் தொடங்கியுள்ள நிலையில், வெறும் 5 ஆயிரம் டோக்கன் அட்வான்ஸ் கொடுத்து வண்டியை நமக்கானதாக உறுதிப்படுத்திக் கொள்ளலாம்.

வெறும் 2.3 நொடிகளில் 40 கி.மீ. வேகத்தை அடைய முடியும் எனவும் அதிகபட்சமாக ஒரு மணி நேரத்துக்கு 115 கி.மீ. வேகத்தில் செல்லும் எனவும் தெரிவிக்கப்பட்டுள்ளது.

தினசரி பயன்பாட்டிற்கு மட்டுமின்றி, நீண்ட தூர பயணங்களுக்கும் ஏற்ற வகையில் இதன் ரேஞ்ச் மற்றும் எலெக்ட்ரிக் மோட்டார் செயல்திறன் வடிவமைக்கப்பட்டுள்ளது.

கட்டமைப்பு மற்றும் ஸ்போர்ட்டி டிசைன்

ஹைப்வோல்ட் ஆர் ஸ்கூட்டரின் வடிவமைப்பு மிகவும் ஸ்போர்ட்டியாகவும், எதிர்கால வாகனங்களின் தோற்றத்தை பிரதிபலிக்கும் வகையிலும் நேர்த்தியாக உருவாக்கப்பட்டுள்ளது.

• இதன் முன்பக்கத்தில் கூர்மையான மற்றும் கோண வடிவிலான (Sharp panels) ஏரோடைனமிக் டிசைன் கொடுக்கப்பட்டுள்ளது.
• பகல்நேர ரன்னிங் விளக்குகளுடன் கூடிய எல்.இ.டி ஹெட்லேம்ப்கள் உள்ளன.
• அகலமான டயர்களுடன் கூடிய சிறப்பான அலாய் வீல்கள், கவர்ச்சியான பாடி பேனல்கள் மற்றும் ஸ்பிளிட்-சீட் அமைப்பு அசத்தலாக அம்சங்களை வழங்குகின்றன.

பாதுகாப்பு, தொழில்நுட்ப வசதிகள்

பயணிகளின் பாதுகாப்பை உறுதி செய்யும் விதமாக, ஸ்கூட்டரின் முன் மற்றும் பின் என இரண்டு சக்கரங்களிலும் டிஸ்க் பிரேக்குகள் வழங்கப்பட்டுள்ளன. மேலும், கரடுமுரடான சாலைகளிலும் அதிர்வுகளற்ற சீரான பயணத்தை வழங்க மேம்பட்ட சஸ்பென்ஷன் செட்டப் பயன்படுத்தப்பட்டுள்ளது.

நவீன காலத்திற்கு ஏற்ப, ஸ்மார்ட்போன் கனெக்டிவிட்டி வசதியுடன் கூடிய முழுமையான டிஜிட்டல் இன்ஸ்ட்ரூமென்ட் கிளஸ்டர், பல்வேறு ரைடிங் மோடுகள் உள்ளிட்ட தொழில்நுட்ப அம்சங்களும் இந்த ஹைப்வோல்ட் ஆர் ஸ்கூட்டரில் இடம்பெற்றுள்ளன.

இந்த ஸ்கூட்டர், ஏதர் 450 அபெக்ஸ், டிவிஎஸ் எக்ஸ் மற்றும் பிற பிரீமியம் எலக்ட்ரிக் ஸ்கூட்டர்களுக்கு போட்டியாக இருக்கும் என்று எதிர்பார்க்கப்படுகிறது.