மயிலாடுதுறையில் நடைபெற்ற நிகழ்ச்சி ஒன்றில் பேசிய மாவட்ட ஆட்சியர் மகாபாரதி விபத்தில் சிக்கிய தனக்கு குருதி கொடையாளா்கள் அளித்த ரத்ததால் தான் உயிர் பிழைத்தேன் என தான் ரத்ததானம் பெற்றதை நெகிழ்ச்சியுடன் நினைவுகூர்ந்துள்ளார்.
உலக குருதி கொடையாளா்கள் தினம்
ஆண்டுதோறும் உலக குருதி கொடையாளா்கள் தினம் ஜூன் 14-ம் தேதி கடைப்பிடிக்கப்படுகிறது. இதையொட்டி, மயிலாடுதுறையில் விழிப்புணா்வு பேரணி நடைபெற்றது. மயிலாடுதுறை அரசினா் பெரியார் மாவட்ட தலைமை மருத்துவமனை நிா்வாகம் மற்றும் குருதி வங்கி சாா்பில் மருத்துவமனையில் இருந்து பேரணி புறப்பட்டது. இப்பேரணியை மயிலாடுதுறை மாவட்ட ஆட்சியா் ஏ.பி.மகாபாரதி கொடியசைத்து தொடங்கிவைத்தார்.
ஆட்சியர் நெகிழ்ச்சி
அப்போது அவர் நிகழ்ச்சியில் பேசியபோது கூறியதாவது, ஒவ்வொருவர் மனிதர்களின் உடலிலும் சுமாா் 5 லிட்டா் ரத்தம் இருக்கிறது. இதில் ரத்த தானத்தின்போது 350 மில்லி ரத்தம் மட்டுமே எடுக்கப்படுகிறது. அந்த ரத்தம் 24 மணி நேரத்திற்குள் நமது உடலில் மீண்டும் உற்பத்தி ஆகிவிடும். 3 மாதங்களுக்கு ஒருமுறை ரத்த தானம் செய்யலாம். ரத்த தானம் செய்ய விருப்புவோா் அதற்கான இணையதளத்தில் தன்னாா்வர்களாக ரத்த கொடையாளா்களாக பதிவு செய்து கொள்ளலாம். ரத்த தானத்தால் பல நன்மைகள் உள்ளது. மாரடைப்பை குறைக்கிறது. புதிய ரத்த அணுக்கள் உருவாக காரணமாகிறது. ரத்த தானம் வழங்குவதால் ஒருவா் உடலில் 500 கலோரிகளுக்கு மேலாக எரிக்கப்படுகிறது.
Hey Govind : சென்னை மியூசிக் அகாதமியில் நடைபெற்ற "ஹே கோவிந்த்" இசைக்கச்சேரி.. குவிந்த பக்தர்கள்..
குருதி கொடையாளா்களால் உயிர் வாழ்கிறேன்
நான் கடந்த 2000 -ம் ஆண்டு அரசு அதிகாரியாக பணியாற்றியபோது, புதுக்கோட்டையில் ஏற்பட்ட விபத்தில் எனது வலது கை முற்றிலும் சிதைந்து அதனால் உடலில் உள்ள ரத்தம் பெருமளவு வெளியேறியது. அப்போது, அரசு மருத்துவமனையில் குருதி கொடையாளா்கள் அளித்த ரத்தம் தனக்கு செலுத்தப்பட்டதால் இன்று உயிரோடு வாழ்கிறேன் என நெகிழ்ச்சியுடன் நினைவு கூர்ந்தார். நாம் அளிக்கும் ரத்ததானம் விபத்தில் பாதிக்கப்படுவோரின் உயிரை காப்பாற்றும் என்பதால் அனைவரும் ரத்ததானம் செய்ய வேண்டும் என்றாா்.
பேரணியில் கலந்துகொண்டவர்கள்
மயிலாடுதுறை நகரின் முக்கிய வீதிகளில் வழியே நடைபெற்ற இந்த ரத்த தானம் குறித்து விழிப்புணர்வு பேரணியில் செவிலியா் கல்லூரி பயிற்சி மாணவிகள் பங்கேற்று, ரத்ததானம் செய்வதன் அவசியம் குறித்து விழிப்புணா்வு பதாகைகள் ஏந்தி வந்தனர். தொடர்ந்து வரதாச்சாரியாா் பூங்கா வரை சென்று பேரணியானது நிறைவு பெற்றது. இந்நிகழ்வில், சுகாதாரப் பணிகள் இணை இயக்குநா் வி.பி. பானுமதி, கோட்டாட்சியா் விஷ்ணுபிரியா, குடிமுறை மருத்துவ அலுவலா் செந்தில்குமாா், ரத்த வங்கி மருத்துவா் அருண் உள்ளிட்ட பலர் கலந்து கொண்டனர்.