மயிலாடுதுறை மாவட்டம் சீர்காழியில் தமிழ்நாடு காவிரி விவசாயிகள் சங்க கூட்டம் நடைபெற்றது. இந்த கூட்டத்தில் சங்க பொதுச் செயலாளர் பி.ஆர். பாண்டியன் கலந்து கொண்டு ராசிமணல் அணை கட்டுமானப்பணியை துவங்க மத்திய மாநில அரசுகளை வலியுறுத்தி ஜூன் 10ஆம் தேதி பூம்புகார் பேரணி துவங்குவது தொடர்பான துண்டு பிரசுரங்களை விநியோகித்தார்.
செய்தியாளர்களை சந்தித்த பி.ஆர். பாண்டியன்
அதனைத் தொடர்ந்து செய்தியாளர்களை சந்தித்தார். அப்பொழுது அவர் கூறுகையில், "தமிழ்நாட்டில் முல்லைப் பெரியாறு, பாலாறு, காவிரி, அமராவதி, சிறுவாணி உள்ளிட்ட அனைத்து நதிநீர் உரிமைகளும் பறிபோகி வருகிறது. இதனை மீட்டு எடுக்க மத்திய, மாநில அரசுகள் நடவடிக்கை எடுக்க வேண்டும். மாறாக மத்திய மாநில அரசுகள் பொறுப்புகளை தட்டி கழித்து வருகிறது. மேகதாது அணை கட்டினால் தமிழக விவசாயிகளின் ஒட்டுமொத்த வாழ்வாதாரமும் இழந்து விடும். அணை கட்டுவதற்கு எதிர்ப்பு தெரிவிக்கும் வகையில் கடந்த ஒரு வாரமாக அனைத்து விவசாய சங்கங்களுடன் பேச்சுவார்த்தை செய்து வருகிறோம். அடுத்த அடுத்த கட்ட போராட்டத்தை தீவிரமாக்கும் வகையில் சிறுவாணி அணையில் சிலந்தி ஆற்றில் அணைகட்ட எதிர்க்கும் கேரள அரசை கண்டித்து கேரள எல்லையை முற்றுகையிட உள்ளோம்.
Mettur Dam: ஜூன் மாதம் 12-ஆம் தேதி திறக்கப்படுமா மேட்டூர் அணை? டெல்டா விவசாயிகள் கூறுவது என்ன
துணை போகும் தமிழக அரசு
காவிரி மேலாண்மை ஆணையம் மேகதாது அணைகட்ட தீர்மானம் நிறைவேற்றியது உச்ச நீதிமன்றத்திற்கு எதிரானது. இதற்கு தமிழக அரசும் துணை போகிறது. வருகிற ஜூன் 12-ம் தேதி மேட்டூர் அணையில் பாசனத்திற்கு தண்ணீர் திறந்து விட வேண்டும். மேலும் கடந்த ஆண்டு கர்நாடக அரசு நமக்கு வழங்க வேண்டிய 98 டிஎம்சி நிலுவை தண்ணீரையும் தமிழக அரசு பெற்றுத் தர வேண்டும். மேகதாது அணைக்கட்டும் பணியை தடுத்து நிறுத்தி வேண்டும். ராசி மணலில் அணைக்கட்ட மத்திய அரசு தமிழக அரசு அனுமதி வழங்க வேண்டும். மேற்கண்ட கோரிக்கைகளை வலியுறுத்தி காவேரி கடைமடை பகுதியான பூம்புகார் முகத்துவாரத்தில் இருந்து விவசாயிகள் நீதி கேட்கும் பேரணி தொடங்க உள்ளது.
மேட்டூர் அணையை சென்றடையும் பேரணி
இந்த பேரணியானது மயிலாடுதுறை தஞ்சாவூர், திருச்சி, கரூர், நாமக்கல், தர்மபுரி வழியாக 12-ம் தேதி மேட்டூர் அணையை சென்றடையுள்ளது. இதில் ஆயிரத்திற்கும் மேற்பட்ட விவசாயிகள் கலந்து கொள்ள உள்ளனர். மயிலாடுதுறை மாவட்டத்தில் ஆதனூர்- குமாரமங்கலம் இடையே கொள்ளிடம் ஆற்றில் கடந்த இரண்டு ஆண்டுகளாக கட்டப்பட்டு வரும் தடுப்பணை பணியை விரைந்து முடித்து தண்ணீரை தேக்கி தெற்கு ராஜன் வாய்க்காலில் பாசனத்திற்கு தண்ணீர் திறந்து விட வேண்டும். தற்பொழுது பருத்தி, நெல், நிலக்கடலை உள்ளிட்ட பயிர்கள் கோடை மழையால் பாதிக்கப்பட்டுள்ளது. எனவே தமிழக அரசு கணக்கெடுத்து பாதிக்கப்பட்ட விவசாயிகளுக்கு உரிய நிவாரணம் கிடைக்க நடவடிக்கை எடுக்க வேண்டும்" என்றார்.
கூட்டத்தில் தமிழ்நாடு அனைத்து விவசாயிகள் சங்கங்களின் ஒருங்கிணைப்பு குழு மயிலாடுதுறை மாவட்ட தலைவர் வைத்தியநாதன், தமிழ்நாடு காவிரி விவசாயிகள் சங்கத்தின் மாவட்ட செயலாளர் விஸ்வநாதன், தலைவர் கணேசன், கௌரவ தலைவர் நடராஜன்,துணைச் செயலாளர் கொள்ளிடம் பன்னீர்செல்வம்,ஆச்சாள்புரம் இளங்கோவன் கடலூர் மாவட்ட செயலாளர் மணி கொள்ளை ராமச்சந்திரன்,கடலூர் மாவட்ட ஒருங்கிணைப்பாளர் சுரேஷ் உள்ளிட்ட நிர்வாகிகள் பங்கேற்றனர்.