இயக்குனர் அட்லீ பிரம்மாண்ட இயக்குநர் ஷங்கரிடம் உதவி இயக்குநராக தனது கரியரைத் தொடங்கினார். சூப்பர் ஸ்டார் ரஜினிகாந்தின் எந்திரன் மற்றும் தளபதி விஜய்யின் நண்பன் போன்ற திரைப்படங்களில் இணை இயக்குநராக 5 ஆண்டுகள் பணியாற்றினார்.
இயக்குநர் அட்லியின் உண்மையான பெயர் அருண்குமார். அட்லீ என்பது அவருடைய செல்லப்பெயர் என சொல்லப்படுகின்றது. வீட்டில் குடும்பத்தினர் மற்றும் உறவினர்கள் அவரை அட்லீ என்று தான் அழைப்பார்களாம். சினிமாவிற்குள் நுழைந்ததும், அருண்குமார் என்ற பெயரை விட அட்லீ நன்றாக இருந்ததால் அதையே வைத்துக்கொண்டதாக ஒரு பேட்டியில் தெரிவித்துள்ளார்.
தமிழ், இந்தி என இருமொழிகளில் இயக்குனராக தடம் பதித்துள்ள அட்லீ நேற்று தனது 37-வது பிறந்தநாளை கொண்டாடினார். இந்நிலையில் அவரின் சொத்து மதிப்பு குறித்த தகவல் வெளியாகி உள்ளது. ஷாருக்கானை வைத்து இயக்கிய ஜவான் திரைப்படத்திற்கு அட்லீ, 25-ல் இருந்து 30 கோடி வரை சம்பளமாக பெற்றதாக கூறப்படுகிறது. மேலும் அவரின் சொத்து மதிப்பு சுமார் 45 கோடி ரூபாய் வரை இருக்கலாம் என சொல்லப்படுகிறது.
அட்லீ மதுரையில் பிறந்தவர். குழந்தை பருவத்திலேயே குடும்பத்துடன் சென்னைக்கு குடியேறியதால், அட்லீ சென்னையில் பள்ளி படிப்பை முடித்துள்ளார். பின் சென்னை சத்யபாமா பல்கலைக்கழகத்தில் விஷுவல் கம்யூனிகேஷன்ஸ் படித்து முடித்துள்ளார்.
அட்லீ சூப்பர் ஸ்டார் ரஜினிகாந்தின் தீவிர ரசிகராம். விஷுவல் கம்யூனிகேஷன் முடித்தவுடன் அட்லீ தனது நண்பர்களுடன் இணைந்து பல்வேறு குறும்படங்களை இயக்கியுள்ளார். அட்லீயின் 'முகப்புத்தகம்' குறும்படம் யூடியூப்பில் மிகவும் பிரபலமானது.
நடிகை கிருஷ்ண பிரியாவை 2014-ஆம் ஆண்டு அட்லீ திருமணம் செய்து கொண்டார். பிரியா தமிழ் தொலைக்காட்சி நிகழ்ச்சிகள் மற்றும் தொடர்களிலும், நான் மகான் அல்ல , சிங்கம் ஆகிய படங்களிலும் நடித்துள்ளார். ப்ரியா ஒரு சில குறும்படங்களிலும் நடித்துள்ளார். எந்த வெளிநாட்டு படப்பிடிப்புக்கு சென்றாலும் அட்லீ பிரியாவை அழைத்து செல்வதை வழக்கமாக வைத்திருப்பதாக கூறப்படுகிறது.
ராஜா ராணி, தெறி, மெர்சல், உள்ளிட்ட மெகா ஹிட் திரைப்படங்களை கொடுத்த அட்லீ, ஷாருக்கானின் 'ஜவான்' மூலம் பாலிவுட்டில் அடியெடுத்து வைத்து இருக்கிறார். அதிரடி ஆக்க்ஷன் காட்சிகள் நிறைந்ததாக இப்படம் உருவாக்கப்படுள்ளது. இப்படத்தில் நயன்தாரா, தீபிகா படுகோனே உள்ளிட்டோர் நடித்துள்ளனர்.
அட்லீ திரைப்படங்களின் மீது சிலர் விமர்சனங்களை முன்வைத்தாலும், அவர் மேக்கிங்கில் அசத்தி விடுவதில் வல்லவர். அட்லீ தனது முதல் படமான ராஜா ராணி திரைப்படத்தை மிகவும் சிறப்பாக உருவாக்கி இருந்தார். ஆர்யா, நயன்தாரா, நஸ்ரியா உள்ளிட்டோரின் நடிப்பில் உருவான இப்படம் மெகா ஹிட் ஆனாது.
முதல் படமான ராஜா ராணி திரைப்படம், ஒரு சில படங்களின் சாயலை உள்ளடக்கியதாக உள்ளது என ரசிகர்கள் மத்தியில் விமர்சனங்கள் எழுந்தன. ஆனாலும் அவர் விமர்சனங்களை எல்லாம் கடந்து தற்போது பாலிவுட்டிலும் தடம் பதித்துள்ளார். அட்லீ இயக்கத்தில் உருவாகியுள்ள ஜவான் திரைப்படம் தற்போது திரையரங்குகளில் வெற்றிகரமாக ஓடிக்கொண்டிருக்கிறது.
மேலும் படிக்க