பாகிஸ்தானில் நடைபெற உள்ள ஆசியக்கோப்பைக்கு இந்தியா செல்லாது என்று ஜெய் ஷா கூறிய நிலையில், பாகிஸ்தான் கிரிக்கெட் போர்டின் தலைவர் ரமீஸ் ராஜா உலகக்கோப்பை போட்டிக்கு வரமாட்டோம் என்று கூறியுள்ளார்.
ஜெய் ஷா கருத்து
இந்திய கிரிக்கெட் கட்டுப்பாட்டு வாரியத்தின் (பிசிசிஐ) செயலாளர் ஜெய்ஷா கடந்த மாத தொடக்கத்தில், 2023ல் நடைபெறவிருக்கும் ஆசியக் கோப்பைக்கு இந்திய அணி பாகிஸ்தானுக்குச் செல்லாது என்று கூறியிருந்தார், மேலும் மைதானம் ஐக்கிய அரபு எமிரேட்ஸுக்கு மாற்றப்பட வேண்டும் என்றும் பரிந்துரைத்திருந்தார். ஆசிய கிரிக்கெட் கவுன்சிலின் தலைவரான ஜெய் ஷாவின் கருத்து, குறித்து பாகிஸ்தான் கிரிக்கெட் போர்டு கோபமடைந்தது. பிசிபி தலைவர் ரமீஸ் ராஜா, இந்த விவகாரத்தில் கருத்து கூறாமல் மௌனம் காத்து வந்தார். இந்த நிலையில் ஒரு உருது தொலைக்காட்சி பெட்டியில் தனது மௌனத்தை உடைத்துள்ளார்,
நடுநிலையான இடத்தில் நடக்கும்
"ஆசியா கோப்பையை நடுநிலையான இடத்தில் நடத்துவதுதான் வழக்கம், நாங்கள் பாகிஸ்தானுக்கு செல்ல மாட்டோம் என்று நாங்கள் முடிவு செய்துள்ளோம்" என்று மும்பையில் பிசிசிஐயின் 91 வது ஆண்டு பொதுக் கூட்டத்திற்குப் பிறகு கடந்த மாதம் ஜெய் ஷா கூறினார். "பாகிஸ்தானுக்குச் செல்லும் எங்கள் அணியின் அனுமதியை அரசாங்கம் தீர்மானிக்கிறது, எனவே நாங்கள் அதைப் பற்றி கருத்துத் தெரிவிக்க மாட்டோம், ஆனால் 2023 ஆசிய கோப்பை போட்டிகள் நடுநிலையான இடத்தில் நடைபெறும் என்று முடிவு செய்யப்பட்டுள்ளது",என்றார்.
உலகக்கோப்பைக்கு வரமாட்டோம்
அடுத்த ஆண்டு ஆசியக் கோப்பையை மட்டுமின்றி, பாகிஸ்தான் 2025 இல் சாம்பியன்ஸ் டிராபியையும் நடத்தத் திட்டமிட்டுள்ளது. சர்வதேச கிரிக்கெட் பாகிஸ்தான் நாட்டிற்குதிரும்பியதிலிருந்து, சாம்பியன்ஸ் டிராபி பாகிஸ்தானில் திட்டமிடப்படும் முதல் ICC நிகழ்வாகும். உருது செய்திகளிடம் பேசிய ரமிஸ், பிசிசிஐ மற்றும் இந்திய அணியை சரமாரியாக விமர்சித்தார். ஆசிய கோப்பைக்கு இந்திய அணி பாகிஸ்தானுக்கு வரவில்லை என்றால், பாகிஸ்தான் அடுத்த உலகக் கோப்பைக்கு இந்தியாவுக்கு பயணம் செய்ய மாட்டார்கள் என்று கூறினார்.
யார் பார்ப்பார்கள்?
மேலும் பேசிய அவர், "அடுத்த ஆண்டு இந்தியாவில் நடைபெற உள்ள உலகக் கோப்பையில் பாகிஸ்தான் பங்கேற்கவில்லை என்றால், அதை யார் பார்ப்பார்கள்? நாங்கள் தெளிவாக இருக்கிறோம். இந்திய அணி இங்கு வந்தால் நாங்கள் உலகக் கோப்பைக்கு செல்வோம். அவர்கள் வரவில்லை என்றால் நாங்கள் இல்லாமல் உலகக் கோப்பையை விளையாடலாம்.
எங்கள் அணி சிறப்பான ஆட்டத்தை வெளிப்படுத்தி வருகிறது. பாகிஸ்தான் கிரிக்கெட்டின் பொருளாதாரத்தை மேம்படுத்த வேண்டும் என்று நான் எப்போதும் கூறி வருகிறேன், அது நாம் சிறப்பாக செயல்பட்டால் மட்டுமே நடக்கும். 2021 டி20 உலகக் கோப்பையில் இந்தியாவை வீழ்த்தினோம். டி20 ஆசிய கோப்பையில் இந்தியாவை வீழ்த்தினோம். ஒரு வருடத்தில், பாகிஸ்தான் கிரிக்கெட் அணி ஒரு பில்லியன் டாலர் ஈட்டும். இந்திய அணியை இரண்டு முறை தோற்கடித்தது,” என்று அவர் கூறினார்.