இத்தாலிய உணவு வகைகளில் மிகவும் பிரபலமான ஒன்று என்றால் அது பீட்சா தான். இந்த உணவு உலகத்தில் பெரும்பாலானவர்கள் மத்தியில் மிகவும் பிரபலமான ஒன்று. இந்தியாவில் பீட்சா ஹட் தொடங்கி, டாமினோஸ் உள்ளிட்ட பல கடைகள் பீட்சாவை வழங்கும் முக்கியமான இடங்கள். அந்தவகையில் அங்கும் கிடைக்காத ஒரு அரியவகை பீட்சா ஒன்று தற்போது சமூக வலைதளத்தில் மிகவும் வைரலாகி வருகிறது. அப்படி வைரலாக அந்த பீட்சாவின் சிறப்பு என்ன?
கடந்த மாதம் 30ஆம் தேதி ஒருவர் தன்னுடைய ட்விட்டர் பக்கத்தில் பீட்சா செய்யும் வீடியோ ஒன்றை பதிவிட்டுள்ளார். அதில் ஐஸ்கிரீமிற்கு பயன்படுத்தப்படும் கோன் வடிவத்தில் ஒருவர் பீட்சா செய்வது போல் காட்சிகள் இடம்பெற்றுள்ளன. அந்த வீடியோவில் எவ்வளவு அழகாக அவர் கோன் வடிவத்தில் பீட்சாவை தயாரிக்கிறார் என்பதை விவரிக்கும் வகையில் காட்சிகளும் இடம்பெற்றுள்ளன. இந்த வீடியோ கடந்த சில நாட்களாக ட்விட்டர் வைரலாகி வருகிறது. இந்த வீடியோவை தற்போது வரை 2 லட்சத்திற்கும் மேற்பட்டவர்கள் பார்த்து ரசித்துள்ளனர். அத்துடன் பலரும் இந்த வீடியோ தொடர்பாக தங்களது கருத்துகளை பதிவிட்டு வருகின்றனர்.
குறிப்பாக ஒருவர் பீட்சாவே கோன் வடிவத்தில் மடித்து சாப்பிட முடியும் போது எதற்காக கோன் பீட்சா என்ற கேள்வியை எழுப்பியுள்ளார். அதேபோல் மற்றோருவர், "கோன் வடிவில் பீட்சா செய்தால் அதில் ஒழுங்காக சூடு செய்து சாஸ் உள்ளிட்டவற்றை சரியாக சேர்க்க முடியாது. அதற்காக தான் பீட்சா அந்த வடிவத்தில் இல்லை" எனக் கூறியுள்ளார். மேலும் ஒருவர், "இதை பார்த்து ஒருவர் நான் பீட்சா கோனை முதலில் சாப்பிடுவேன்" என்றும் பதிவிட்டுள்ளார்.
முன்னதாக கடந்த சில நாட்களுக்கு முன்பாக விண்கலத்தில் தாமஸ் பெஸ்கெட் மற்றும் பிற வீரர்கள் பீட்சாவை சாப்பிடுவதுபோல் வீடியோ ஒன்றை பதிவிட்டிருந்தார். அந்தப் பதிவில், “ஆகாயத்தில் மிதந்தபடியே நண்பர்களுடன் பீட்சா பார்ட்டியை கொண்டாடுகிறோம். பூமியில் சனிக்கிழமை இரவு பார்ட்டி செய்வதுபோல் உள்ளது. நல்ல சமையல் கலைஞர்கள் தங்களுடைய உணவின் செய்முறையை எப்போதும் வெளியே சொல்ல மாட்டார்கள். அதனால் நான் இந்த வீடியோவை பதிவிட்டுள்ளேன். இதை நீங்கள் பார்த்து முடிவு செய்து கொள்ளுங்கள்” எனப் பதிவிட்டுள்ளார். இந்த வீடியோவை தற்போது வரை 7.5 லட்சம் பேருக்கு மேல் பார்த்து ரசித்து இருந்தனர். தற்போது அதற்குபின்பு சமூக வலைதளத்தில் மீண்டும் ஒரு பீட்சா வீடியோ வைரலாகி உள்ளது குறிப்பிடத்தக்கது.
மேலும் படிக்க:என்னது தங்கத்துல வடபாவ் ..எங்கய்யா செய்றாங்க ..!- வைரல் வீடியோ !