இந்தியர்களின் மாலை ஸ்னாக்ஸ் உணவு எப்போதும் சற்று வித்தியாசமானது. தென்னிந்தியர்களுக்கு வடை காபி என்றால் அதுவே வட இந்தியர்களுக்கு பாணிபூரி, பேல் பூரி, தாஹி பூரி, வடபாவ் போன்ற சாட் உணவுகள் சிறந்த ஸ்னாக்ஸ் உணவாக அமைந்துள்ளது. அப்படி இருக்கும் பட்சத்தில் எப்போதும் செய்யப்படும் முறையில் இருந்து சற்று மாறுபட்டு இந்த உணவு செய்யப்படும் பட்சத்தில் அது அனைவரின் கவனத்தையும் ஈர்க்கும். அந்தவகையில் தற்போது புது விதமான வடபாவ் உணவு ஒன்று செய்து விற்கப்பட்டு வருகிறது.
இந்தப் புதிய வகை வடபாவ் தொடர்பாக ஒருவர் தற்போது வீடியோ ஒன்றை தன்னுடைய ட்விட்டர் பக்கத்தில் பதிவிட்டுள்ளார். அதில் உலகத்தின் முதல் 22 கேரட் வடபாவ் துபாயில் விற்கப்படுகிறது என்று கூறப்பட்டுள்ளது. மேலும் அந்த வீடியோவில் எப்படி இந்த வடபாவ் செய்யப்படுகிறது என்பது தொடர்பான காட்சிகளும் இடம்பெற்றுள்ளன. அதன்படி வழக்கமாக செய்யப்படும் வடபாவிற்கு பதிலாக இதில் அந்த வடையை 22 கேரட் தங்க தாளில் சுற்றி வைக்கப்படுகிறது. அதன்பின்னர் சிறிது நேரத்திற்கு பிறகு அது பன்னுடன் சேர்த்து வடபாவ் ஆக தரப்படுகிறது.
இந்த வீடியோவை தற்போது வரை பலரும் ஆச்சரியத்துடன் பார்த்து வியந்து வருகின்றனர். அத்துடன் பலரும் இந்த வீடியோவிற்கு தங்களுடைய கருத்துகளை பதிவிட்டு வருகின்றனர். இந்த வீடியோவில் வரும் தங்க வடபாவ் துபாயில் உள்ள கராமா பகுதியில் அமைந்துள்ள ஓபாவோ என்ற ஓட்டலில் விற்கப்படுகிறது. இந்த உணவின் விலை இந்திய மதிப்பில் 2000 ரூபாய் என்று கூறப்படுகிறது. துபாய் திராம் மதிப்பில் இது 99 திராம் என்று விற்கப்பட்டு வருகிறது. இந்த வடபாவ் வாங்குபவர்களுக்கு ஒரு புதினா ஜூஸூம் இலவசமாக தரப்படுகிறது.
ஏற்கெனவே துபாயில் ஒரு சில ஓட்டல்களில் தங்க பிரியாணி, தங்க பர்கர் உள்ளிட்ட உணவுகள் மிகவும் பிரபலமானது. தற்போது அந்த வரிசையில் 22 கேரட் வடபாவ் உணவும் வைரலாக தொடங்கியுள்ளது குறிப்பிடத்தக்கது. மேலும் இந்த வீடியோ தொடர்பாக பலரும் தங்களுடைய கருத்துகளை ட்விட்டர் பக்கத்தில் பதிவிட்டு வருகின்றனர். அத்துடன் இந்த வீடியோ பலரும் பகிர்ந்து வருகின்றனர். இது குறிப்பாக இந்தியர்களிடையே பெரும் வரவேற்பை பெற்றுள்ளது.
மேலும் படிக்க: வெளியேறிய அமெரிக்கா, பிரிட்டன், நேட்டோ படைகள்.. டான்ஸ் ஆடி இறுதி ஊர்வலம் நடத்திய தலிபான்கள்