சென்னை கிண்டியில் இருக்கும் பன்னோக்கு மருத்துவமனையை திறந்து வைக்க ஜூன் 15ஆம் தேதி குடியரசு தலைவர் திரௌபதி முர்மு சென்னைக்கு வருகை தருகிறார். சென்னைக்கு ஜூன் 5 ஆம் தேதி வருவதாக இருந்த பயணம் ஒத்திவைக்கப்பட்ட நிலையில் ஜூன் 15 ஆம் தேதி வருகை தருகிறார். கலைஞர் கருணாநிதியின் பிறந்தநாள் விழாவை ஒட்டி சென்னை கிண்டியில் கட்டப்பட்டுள்ள உயர் சிறப்பு பன்னோக்கு மருத்துவமனையை திறந்து வைக்கிறார்.
சென்னை கிண்டி கிங் இன்ஸ்டிடியூட் வளாகத்தில் ரூ.230 கோடியில் பன்னோக்கு உயர் சிறப்பு மருத்துவமனை கட்டும் பணிகளுக்கு மார்ச் 21, 2022 ஆம் ஆண்டில் தமிழ்நாடு முதலமைச்சர் மு.க.ஸ்டாலின் அடிக்கல் நாட்டினார்.
தரைத்தளம் மற்றும் 6 தளங்களுடன், 51,429 சதுரமீட்டர் பரப்பில் கட்டப்பட்டுள்ள இந்த மருத்துவமனை, இதயம், நுரையீரல், நரம்பியல், சிறுநீரகவியல், புற்றுநோய், குடல் சிகிச்சை உள்ளிட்ட பல்வேறு பிரிவுகள் உள்ளது. மேலும் 1,000 படுக்கை வசதிகளும் அமைக்கப்பட்டுள்ளது.
கலைஞர் கருணாநிதியின் நூற்றாண்டு விழா இந்த ஆண்டு விமர்சையாக கொண்டாட வேண்டும் என ஏற்கனவே திமுக தரப்பில் தெரிவிக்கப்பட்ட நிலையில், இந்த பன்னோக்கு மருத்துவமனை திறப்பு விழா ஓர் முக்கிய நிகழ்வாக பார்க்கப்படுகிறது. கிண்டி பன்னோக்கு மருத்துவமனையை திறந்து வைக்க கடந்த 28ஆம் தேதி குடியரசு தலைவர் திரௌபதி முர்மூவிற்கு அழைப்பு விடுக்கப்பட்டது. தமிழ்நாடு முதலமைச்சர் முக ஸ்டாலின் நேரில் சென்று அழைப்பு விடுத்தார்.
முதலமைச்சர் மு.க ஸ்டாலினின் அழைப்பை ஏற்ற திரௌபதி முர்மு ஜூன் 5 ஆம் தேதி சென்னை வருவதாக தெரிவிக்கப்பட்டது. ஆனால் திடீரென்று ஒரு சில காரணங்களுக்காக ரத்து செய்யப்பட்டது. டெல்லியில் புதிய நாடாளுமன்ற திறப்பு விழாவை திமுக புறக்கணித்த நிலையில், திரௌபதி முர்மூவின் பயணம் ரத்து செய்யப்பட்டுள்ளதாக தகவல் வெளியாகின. ஆனால் இந்த தகவல் முற்றிலும் தவறானது என்றும், குடியரசு தலைவரின் வெளிநாட்டு பயணம் காரணமாக சென்னைக்கு வரும் திட்டம் ஒத்திவைக்கப்பட்டுள்ளதாக தமிழ்நாடு சுகாதார துறை அமைச்சர் மா. சுப்பிரமணியன் தெரிவித்தார்.
ஜூன் 5 ஆம் தேதி வர இருந்த பயணத்திட்டம் ரத்து செய்யப்பட்டுள்ள நிலையில் தற்போது ஜூன் 15 ஆம் தேதி குடியரசு தலைவர் திரௌபதி முர்மூ சென்னைக்கு வருவதாக தெரிவிக்கப்பட்டுள்ளது. சென்னை கிண்டியில் புதிதாக கட்டப்பட்டுள்ள கிண்டி உயர் சிறப்பு பன்னோக்கு மருத்துவமனையை திறந்து வைக்க வருவதாகவும் தெரிவிக்கப்பட்டுள்ளது.