கர்நாடக மாநிலத்தில் 3 வயது சிறுவன் அவனது ஷார்ட்ஸில் சிறுநீர் கழித்ததால் கோவமடைந்த அங்கன்வாடி உதவி ஆசிரியர் சிறுவனின் பிறப்புறுப்பில் சூடு வைத்த சம்பவம் அதிர்ச்சியை ஏற்படுத்தியுள்ளது. 


தும்கூர் மாவட்டத்தில் உள்ள சிக்கநாயக்கனஹள்ளி தாலுகாவில் உள்ள கோடேகெரே கிராமத்தில் உள்ள அங்கன்வாடி மையத்தில் பயிலும் 3 வயது சிறுவன் அடிக்கடி தனது பேண்ட்டில் சிறுநீர் கழித்துள்ளார். ஒரு கட்டம்வரை பொறுமையாக இருந்த 28 வயதான அங்கன்வாடி உதவி ஆசிரியை ரஷ்மி, கோவத்தில் தீக்குச்சிகள் கொண்டு சிறுவனில் அந்தரங்க உறுப்பில் சூடு வைத்துள்ளார். 


கடந்த திங்கள்கிழமை சிறுவனின் பாட்டி அவரை குளிப்பாட்டிக் கொண்டிருந்தபோது, குழந்தையின் பிறப்புறுப்பு மற்றும் வலது மடியில் தீக்காயங்கள் இருப்பதை அதிர்ச்சியடைந்துள்ளார். இதுகுறித்து சம்பந்தப்பட்ட அதிகாரிகளின் கவனத்திற்கு குடும்பத்தினர் கொண்டு சென்றதால், அவர்கள் மூலம் மாவட்ட குழந்தைகள் பாதுகாப்பு அலுவலர் பவித்ராவுக்கு திங்கள்கிழமை தகவல் கிடைத்தது. இதையடுத்து, புகாரின் அடிப்படையில் சிறுவனின் வீட்டிற்கு சென்று அதிகாரிகள் பார்வையிட்டனர். தொடர்ந்து, உடனடியாக அந்த அங்கன்வாடி ஆசிரியர் நாகரத்னா மற்றும் குற்றம் சாட்டப்பட்ட உதவி ஆசிரியர் ரஷ்மி சஸ்பெண்ட் செய்யப்பட்டனர். அதிர்ஷ்டவசமாக தீக்காயங்கள் இருந்த போதிலும் குழந்தை நலமாக உள்ளது. சிக்கநாயக்கனஹள்ளி போலீசார் தொடர்ந்து விசாரணை நடத்தி வருகின்றனர். 


இதுகுறித்து அங்கன்வாடி ஆசிரியர் நாகரத்னா கூறும்போது, “ரஷ்மி குறும்புக்காரர். அவள் கடந்த காலத்தில் என் கையெழுத்தை கூட போலியாக போட்டு மன்னிப்பு கேட்டிருக்கிறாள். இப்போது, நான் இல்லாத நேரத்தில் இந்த சம்பவம் நடந்துள்ளது.


சமீபத்தில் தாயை இழந்த சிறுவன் : 


கடந்த 15 நாட்களுக்கு முன்பு கர்ப்பப்பை வாய் புற்றுநோயால் அந்த சிறுவன் தனது தாயை இழந்துள்ளான். தற்போது இந்த சிறுவனை அவரது தந்தையும் பாட்டியும் கவனித்து வருகின்றனர். பாதிக்கப்பட்ட சிறுவனுக்கு 6 ஆம் வகுப்பு படிக்கும் ஒரு அண்ணன் இருக்கிறார். சிறுவனின் பெற்றோர் சிக்மகளூரில் உள்ள ஒரு காபி எஸ்டேட்டில் பல ஆண்டுகளாக வேலை செய்து வந்துள்ளனர். அவரது தாயார் மறைவுக்கு பிறகுதான் இவர்கள் கோடேகெரேவுக்கு குடிபெயர்ந்தனர்.


ஆசிரியை மீது வழக்குப்பதிய பட்டதா..? 


குற்றம் சாட்டப்பட்ட ரஷ்மிக்கு எதிராக காவல்துறையினர் வழக்கு எதுவும் பதிவு செய்யப்படவில்லை. ரஷ்மியின் நான்கு வயது மகனும் அதே மையத்தில் படித்து வருகிறார். மேலும், பாதிக்கப்பட்ட சிறுவன் உட்பட 17 குழந்தைகளும் அங்கு படித்து வருகின்றனர். தாலுகா குழந்தைகள் வளர்ச்சித் திட்ட அலுவலரின் பரிந்துரையின் பேரில் அவரை பணியில் இருந்து இடைநீக்கம் செய்து உத்தரவு பிறப்பித்துள்ளதாக மகளிர் மற்றும் குழந்தைகள் நலத் துறை துணை இயக்குநர் ஸ்ரீதர் எம்.எஸ் தகவல் தெரிவித்துள்ளார்.