Actress Nadhiya | அவரோடு எனது முதல் படம் ; மலரும் நினைவுகளை பகிர்ந்த நடிகை நதியா..!

பிரபல மூத்த நடிகை நதியா கேப்டன் விஜயகாந்துடன் சுமார் 33 ஆண்டுகளுக்கு முன்பு எடுத்துக்கொண்ட போட்டோவை தற்போது பகிர்ந்துள்ளார்.

80-களில் தமிழ் மற்றும் மலையாள சினிமாவின் கனவு நாயகி நதியா . மும்பை செம்பூரில் 1966 ஆம் ஆண்டு பிறந்த நதியா தனது பதினெட்டாவது வயதில் மலையாள திரைப்படங்கள் மூலம் திரையுலகில் அறிமுகமானார். அவர் அறிமுகமான முதல் திரைப்படத்திலேயே சிறந்த நடிகைக்கான ஃபிலிம்பேர் விருதையும் நதியா பெற்றார். அதன் பிறகு தொடர்ச்சியாக பல மலையாளத் திரைப்படங்களில் நடித்து வந்த நதியா பிரபல இயக்குனர் பாசில் இயக்கத்தில் தமிழில் வெளியான 'பூவே பூச்சூடவா' என்ற திரைப்படத்தின் மூலம் தமிழ் திரையுலகில் கால்பதித்தார். 

'பூவே பூச்சூடவா' திரைப்படத்திற்காக அவர் ஃபிலிம்பேர் விருதுகளுக்கு நாமினேட் செய்யப்பட்டதும் குறிப்பிடத்தக்கது. அதன்பிறகு தமிழ், மலையாளம் மற்றும் தெலுங்கு உள்ளிட்ட பல மொழிகளில் முன்னணி நாயகியாக வலம் வந்தார் நதியா. தமிழில் சூப்பர் ஸ்டார் ரஜினிகாந்த், மோகன், சத்யராஜ், இளைய திலகம் பிரபு, கேப்டன் விஜயகாந்த் போன்ற பல முன்னணி நடிகர்களுடன் நடித்துள்ளார். 1988 ஆம் ஆண்டு சிரிஷ் என்பவரை திருமணம் செய்து கொண்ட நதியா, அதன்பிறகு தொடர்ச்சியாக பல திரைப்படங்களில் நடித்து வந்தார். 1994 ஆம் ஆண்டு ராஜகுமாரன் என்ற தமிழ் படத்தில் நடித்த நதியா அதன் பிறகு சுமார் 10 ஆண்டுகள் தனது நடிப்பிற்கு ஓய்வு கொடுத்தார். 

அதன் பிறகு 2004ஆம் ஆண்டு பிரபல இயக்குநர் மோகன் ராஜா இயக்கத்தில் பிரபல நடிகர் ஜெயம்ரவி நடிப்பில் வெளியான எம். குமரன் S/o மகாலட்சுமி என்ற திரைப்படத்தின் மூலம் மீண்டும் நடிப்புலகில் கால் பதித்தார். தற்போது தெலுங்கு, மலையாளம் மற்றும் தமிழ் உள்ளிட்ட மூன்று மொழிகளில் பல திரைப்படங்களில் நடித்து வருகிறார். இறுதியாக மிஸ் இந்தியா என்ற தெலுங்கு படத்தில் தோன்றிய அவர் தற்போது தெலுங்கு மற்றும் மலையாள மொழிகளில் 6 திரைப்படங்களில் நடித்து வருகிறார் என்பது குறிப்பிடத்தக்கது.

இந்நிலையில் 'பூமழை பொழியுது' என்கின்ற திரைப்படத்தில் கேப்டன் விஜயகாந்துடன் நடித்த அந்த நினைவுகளை தற்போது நதியா தனது அதிகாரபூர்வ ட்விட்டர் பதிவில் வெளியிட்டுள்ளார். 1987ஆம் ஆண்டு வெளியான 'பூமழை பொழியுது' திரைப்படத்தில் முதல் முறையாக விஜயகாந்த் அவர்களுடன் நடித்த அனுபத்தை அவர் பகிர்ந்துள்ளார். 1986 மற்றும் 1987ம் ஆண்டு மட்டும் தமிழில் சுமார் 17 படங்களில் நதியா நடித்துள்ளார் என்பது குறிப்பிடத்தக்கது.