சென்னை மேயர் பிரியாவுடன் சென்னை காளிகாம்பாள் கோயிலில் நடிகை நயன்தாரா மற்றும் விக்னேஷ் சிவன் ஆகியோர் எடுத்துக்கொண்ட புகைப்படம் தற்போது சமூக வலைதளங்களில் வைரலாகி வருகிறது.
நடிகை நயன்தாராவும், விக்னேஷ் சிவனும் கடந்த 7 வருடங்களுக்கு மேலாக காதலித்து வருகின்றனர். பரஸ்பர மரியாதையுடன் காதலித்து வரும் இவர்கள், சினிமாவிலும் ஒன்றிணைந்து படங்களை தயாரிப்பது, படங்களை வாங்கி விநியோகம் செய்தல் உள்ளிட்டவற்றில் ஈடுபட்டு வருகின்றனர்.
இவைத்தவிர வெளிநாடுகளுக்கு டூர் சென்று ஸ்டில்களை தட்டிவிடும் இந்த ஜோடி, அவ்வப்போது கோயில்களுக்கு செல்வதும் வழக்கம். அந்த வகையில் இன்று இந்த ஜோடி சென்னை காளிகாம்பாள் கோயிலுக்கு சென்று சாமி தரிசனம் செய்ய சென்றுள்ளது. அப்போது அங்கு சென்னை மேயர் பிரியாவும் வர, அவர்களுடன் நயனும் விக்னேஷூம் புகைப்படம் எடுத்துக்கொண்டுள்ளனர். இந்தப்புகைப்படம் தற்போது சமூகவலைதளங்களில் வைரலாகி வருகிறது. அண்மையில் புதுகார் வாங்கிய இந்த ஜோடி, சென்னை பாடிகாட் முனீஸ்வரர் கோயிலுக்கு சென்றது தொடர்பான புகைப்படமும் சமூகவலைதளங்களில் வைரலானது குறிப்பிடத்தக்கது.
நடிகை நயன்தாரா தற்போது விக்னேஷ் சிவன் இயக்கத்தில் உருவாகிவரும் ‘காத்து வாக்குல இரண்டு காதல்’ படத்தில் நடித்து வருகிறார். இந்தப்படத்தில் இவருடன் நடிகை சமந்தாவும் நடிக்கிறார். அனிருத் இசையமைக்கும் இந்தப்படத்தின் போஸ்டர்கள், டீசர், பாடல்கள் சமூகவலைதளங்களில் வரவேற்பை பெற்றுள்ளது.