பள்ளி மாணவர்களுக்கு ஆர்வத்தை ஏற்படுத்திய தமிழி கல்வெட்டு எழுத்துகள், தமிழி கல்வெட்டுப் பயிற்சியில் கல்வெட்டு எழுத்துகள் மாணவர்களுக்கு ஆர்வத்தை ஏற்படுத்தியது.

பானை ஓடுகளில் உள்ள தமிழி எழுத்துகள்:


ராமநாதபுரம் மாவட்டம், திருப்புல்லாணி, சுரேஷ் சுதா அழகன் நினைவு அரசு மேல்நிலைப்பள்ளி, தொன்மைப் பாதுகாப்பு மன்றம் சார்பில் நடைபெற்ற தமிழி கல்வெட்டுப் பயிற்சியில் கல்வெட்டு எழுத்துகள் மாணவர்களுக்கு ஆர்வத்தை ஏற்படுத்தின.

 

பயிற்சிக்கு  தலைமையாசிரியர் கோ.மகேந்திரன் கண்ணன் தலைமை தாங்கினார். மன்றச் செயலர் வே.ராஜகுரு,  சங்ககாலத்தில் தமிழ்நாட்டில் பயன்பாட்டில் இருந்த தமிழி கல்வெட்டு எழுத்துகளின் சிறப்புகள் பற்றிக்  கூறியதாவது, “பானை ஓடுகள், காசுகள், முத்திரைகள், நடுகற்கள், குகைக் கல்வெட்டுகளில் காணப்படும் தமிழி எழுத்துச் சான்றுகள், தமிழ் மொழியின் தொன்மைக்கு முதன்மைச் சான்றாகும். அசோகர் காலத்துக்கு முன்பே தமிழர் எழுத்தறிவு பெற்றிருந்ததற்கு தமிழ்நாட்டு அகழாய்வுகளில் கிடைக்கும் பானை ஓடுகளில் உள்ள தமிழி எழுத்துகள் ஆதாரமாகும். வணிகப் பெருவழிகளில் உள்ள முக்கிய நகரங்களின் குன்றுகளில் தமிழிக் கல்வெட்டுகள் காணப்படுகின்றன. இவற்றில் பெரும்பாலானவை மதுரையில் தான் உள்ளன” என்றார். 

 


 

புறநானூற்றுப் பாடல்களை தமிழி எழுத்தில் எழுத பயிற்சி:


பின்னர் நடந்த பயிற்சியில் திருப்பரங்குன்றம், திருமலை, ஜம்பை உள்ளிட்ட மலைக்குகைகளில் உள்ள தமிழி கல்வெட்டுகளின் படங்கள், அச்சுப்படிகள் மூலம் படிக்கவும் எழுதவும் கற்றுக் கொடுத்தார். ஆங்கிலம் உள்ளிட்ட மேற்கத்திய மொழிகளின் எழுத்துகள் தமிழி போல் உள்ளதைக் கண்டு வியந்த மாணவர்கள் ஆர்வத்துடன் கற்றுக் கொண்டனர்.

 

புறநானூற்றுப் பாடல்களை தமிழி எழுத்தில் எழுதி பயிற்சி பெற்றனர். கல்வெட்டு பயிற்சி பெற்ற 6-9-ம் வகுப்பு மாணவர்கள் 25 பேருக்கு சான்றிதழ்களை வழங்கி தலைமையாசிரியர் கோ.மகேந்திரன் கண்ணன் பாராட்டினார்.

தமிழி வாசிப்பது எளிமை தான் -  மாணவர்கள் மகிழ்ச்சி


இது குறித்து மாணவர்கள் சிலர் தெரிவிக்கையில்...,” தமிழி எழுத்துகள் குறித்து எங்களுக்கு விழிப்புணர்வும், ஆர்வமும் ஏற்பட்டுள்ளது. தமிழர்களின் தொன்மையான விடயங்களை அனைவரும் பாதுகாக்க வேண்டும். தமிழி எழுத்துகள் பார்க்கும் போது கடிமாக தெரிந்தது. அதனை வாசிக்க, வாசிக்க சற்று எளிமையானது தான், என தோன்றவைத்துவிட்டது. தொடர்ந்து பயிற்சியில் ஈடுபட்டால் எளிமையாக இதனை கற்றுக் கொள்ளலாம் என தோன்றுகிறது.

 

எங்கள் ஆசிரியர்களை தொந்தரவு செய்தாவது, தமிழி எழுத்துக்களை கற்றுக் கொள்வோம். மதுரை மாவட்டத்தில் உள்ள தமிழி எழுத்துக்கள் கொண்ட படங்களை பார்க்கும்போது ஆச்சரியத்தை ஏற்படுத்தியது. கண்டிப்பாக நேரில் சென்று பார்க்க வேண்டும் என தோன்றுகிறது. அச்சுப்படிகள் மூலம் படிக்கவும் எழுதவும் கற்றுக் கொண்டது, மகிழ்ச்சியை தருகிறது” எனவும் தெரிவித்தனர்.


 

இதைப் படிக்க மிஸ் பண்ணாதீங்க பாஸ் - ஐயப்ப பக்தர்களுக்கு கவலை வேண்டாம்! பிஎஸ்என்எல் கொடுத்த ஜாக்பாட்.. சபரிமலையில் 4ஜி

 

மேலும் செய்திகள் படிக்க இங்கே கிளிக் செய்யவும்  - Senthil Balaji ; போட்றா தம்பி பந்தை! வாலிபால் விளையாடிய அமைச்சர். கை தட்டி வரவேற்ற மாணவர்கள்