குழுவிலிருந்து யாருக்கும் தெரியாமல் வெளியேறுவது, குழு உறுப்பினர்களின் எண்ணிக்கையை அதிகரிக்கும் வசதிகளை வாட்ஸ் அப்(WhatsApp) நிறுவனம் அறிமுகப் படுத்த இருப்பதாகத் தகவல்கள் வெளியாகியுள்ளது.
WABetaInfoவின் தகவலின் படி இந்த வசதிகள் தற்போது உருவாக்கத்தில் இருப்பதாகவும் விரைவில் இவைகள் பீட்டா டெஸ்டர்களின் சோதனைக்காக வெளியாகும் என்று தெரியவந்துள்ளது. தற்போதைய நிலையில் குழுவில் இருக்கும் நபர், அந்த குழுவில் இருந்து வெளியேறினால் அவர் குழுவில் இருந்து வெளியேறியது குறித்த தகவல், குழுவில் உள்ள அனைவருக்கும் தெரியும் படி இருக்கும். தற்போது வெளியாக இருக்கும் வாட்சப்பின் புதிய அப்டேட் படி, குழுவில் இருக்கும் நபர் அந்த குழுவில் இருந்து வெளியேறினால், குழுவின் அட்மினைத் தவிர வேறு யாருக்கும் அந்த நபர் குழுவில் இருந்து வெளியேறியது தெரிய வராது.
WABetaInfo வெளியிட்டிருக்கும் ஸ்க்ரீன்ஷாட் படி குழுவில் இருந்து வெளியேற முடிவு செய்துவிட்டால் “only you and group admins will be notified that you left the group” என்ற வாசகத்துடன் கூடிய பாப் அப் தோன்றும். அதில் எக்ஸிட் க்ரூப் என்பதை கொடுத்தவுடன், யாருக்கும் தெரியாமல் அந்த குழுவில் இருந்து வெளியேறிவிடலாம். இந்த வசதியானது இப்போதைக்கு வாட்ஸ் அப் டெஸ்க்டாப்பிற்கு உருவாக்கும் பணிகள் நடைபெற்றாலும், விரைவில் ஆண்ட்ராய்ட் மற்றும் ஐஓஎஸ்க்கு கொண்டுவரப்படும். குழுவில் தற்போது அதிகபட்சமாக 256 பேரை மட்டுமே சேர்க்க முடியும் என்ற கட்டுப்பாடுகள் உள்ள நிலையில், அதை 512 ஆக அதிகரிக்கும் வசதியை உருவாக்கிக்கொண்டிருப்பதாக சமீபத்தில் தான் செய்திகள் வெளியாகியிருந்தது.
இந்த வசதி மட்டுமல்லாது கம்யூனிட்டி வசதியையும் வாட்சப் நிறுவனம் கொண்டுவரும் முயற்சியில் இருக்கிறது. இரண்டு வேறு குழுக்களை ஒரே குடையின் கீழ் கொண்டுவரலாம். இதன் மூலம் சிறு உரையாடல்களை செய்யலாம். இந்த கம்யூனிட்டி வசதியில் அறிவிப்பு வசதியும், எந்த குழுக்களை இணைக்கலாம் என்பதை அட்மின்கள் முடிவு செய்யும் வகையிலான பிரத்யேக வசதிகளும் இதில் இடம்பெறும்.
அதோடு, வாட்ஸ் அப் ஸ்டேட்டஸ்களில் பகிரப்படும் லிங்குகளின் ப்ரிவியூவை மாற்றும் வேலைகளிலும் இருக்கிறது வாட்ஸ் அப். தற்போதைய நிலையில் லிங்க்கை லாங் ப்ரஸ் செய்தால் தான் என்ன லிங்க் என்ன என்பது தெரிய வரும். ஆனால் தற்போதைய உருவாக்கத்தின் படி, லிங்க்கை ஸ்டேடஸில் வைத்து சிறிது நேரம் வைத்திருந்தால், அந்த லிங்கிற்கான ப்ரிவியூ உருவாகிவிடும். பின்னர் ஷேர் செய்யலாம். அதனால், அது என்ன லிங்க் என்பது, மற்றவர்களுக்கு அதை க்ளிக் செய்யாமலேயே தெரியும் என்பது குறிப்பிடத்தக்கது.
ஃபேஸ்புக் மெசஞ்சர், இன்ஸ்டாகிராம் உள்ளிட்டவைகளில் மெசேஜ்களுக்கு எமோஜிகள் மூலம் ரியாக்ட் செய்யும் வசதிகள் இருப்பது போன்றே ,வாட்ஸ் அப் மெசேஜ்களுக்கும் ரியாக்ட் செய்யும் வசதியை சமீபத்தில் தான் வாட்ஸ் அப் நிறுவனம் அறிமுகப்படுத்தியிருந்தது குறிப்பிடத்தக்கது.