Apple Glowtime Event: ஆப்பிள் நிறுவனத்தின் க்ளோடைம் நிகழ்ச்சியில், ஐபோன் 16 சீரிஸ் மற்றும் வாட்ச் சீரிஸ் 10 ஆகியவை அறிமுகப்படுத்தப்படலாம்.


ஆப்பிள் ”க்ளோடைம்” நிகழ்ச்சி:


ஆப்பிள் நிறுவனத்தின் ஐபோன் அறிமுக நிகழ்ச்சி இன்று நடைபெற உள்ளது.  அந்த நிகழ்வின் போது, ஐபோன் 16 சீரிஸை அறிமுகப்படுத்தும் மற்றும் iOS 18 இன் பொது வெளியீடு பற்றிய கூடுதல் விவரங்களைப் பகிர்ந்து கொள்ளும் என்று எதிர்பார்க்கப்படுகிறது.,குறிப்பாக, ஆப்பிள் நுண்ணறிவு ஆதிக்கம் பற்றி பல்வேறு அப்டேட்கள் வெளியாகக் கூடும். நிறுவனத்தின் நிகழ்ச்சி அழைப்பிதழில்,  ஆப்பிள் லோகோவை சுற்றிலும் வெவ்வேறு வண்ணங்கள் ஒன்றுடன் ஒன்று kஅலந்து சூழ்ந்து இருப்பதை போல சித்தரிக்கப்பட்டுள்ளது. அதன் கீழே "இட்ஸ் க்ளோடைம்" என்றும் எழுதப்பட்டுள்ளது. ஜூன் மாத உலகளாவிய டெவலப்பர்கள் மாநாட்டின் முக்கிய உரைக்கு அனுப்பப்பட்ட இந்த வடிவமைப்பை தற்போது மீண்டும் பயன்படுத்தப்பட்டுள்ளது. இது நிறுவனத்தின் AI அம்சங்களின் தொகுப்பான Apple Intelligence க்கு உலகை அறிமுகப்படுத்தியது. இந்நிலையில், ஆப்பிள் க்ளோடைம் நிகழ்ச்சிய நேரலையில் பார்ப்பது எப்படி என்ற விவரங்களை இங்கே அறியலாம். 


ஐபோன் 16 நிகழ்ச்சி: நேரலையில் பார்ப்பது எப்படி?


ஆப்பிளின் இந்த முக்கிய நிகழ்ச்சி இந்திய நேரப்படி இன்று இரவு 10:30 மணிக்கு திட்டமிடப்பட்டுள்ளது. ஆப்பிளின் இணையதளம், யூடியூப் அல்லது ஆப்பிள் டிவி ஆப்ஸ் மூலம் நிகழ்வை நேரலையில் பார்க்கலாம். 



ஆப்பிளின் ஐபோன் 16 நிகழ்ச்சி: எதிர்பார்ப்புகள் என்ன?


ஐபோன் 16, ஐபோன் 16 பிளஸ், ஐபோன் 16 ப்ரோ மற்றும் ஐபோன் 16 ப்ரோ மேக்ஸ் ஆகியவற்றை உள்ளடக்கிய, ஐபோன் 16 சீரிஸ் ஃபோன்களை ஆப்பிள் அறிமுகப்படுத்தும் என்று எதிர்பார்க்கப்படுகிறது. ஐபோன் 16 சீரிஸ் மட்டுமின்றி, ஆப்பிள் அதன் ஸ்மார்ட்வாட்ச் சீரிஸின் சமீபத்திய மாடலையும் அறிமுகப்படுத்தக்கூடும்.  அதாவது தொழில்நுட்ப நிறுவனமான ஆப்பிள் வாட்ச் சீரிஸ் 10 ஐ,  ஐபோன் 16 சீரிஸ் உடன் அறிமுகப்படுத்தும் என்று எதிர்பார்க்கப்படுகிறது.


ஆப்பிள் ஐபோன் 16 விலை?


ஐபோன் 16 இன் விலை சுமார் $799 (தோராயமாக ரூ. 66,300) இருக்கலாம் என்றும், ஐபோன் 16 பிளஸ் $899 (சுமார் ரூ. 74,600) இல் தொடங்கலாம் என்றும் தகவல்கள் தெரிவிக்கின்றன. ப்ரோ மாடல்களுக்கு, ஐபோன் 16 ப்ரோ $1,099 (தோராயமாக ரூ. 91,200) இல் தொடங்கும் என்று எதிர்பார்க்கப்படுகிறது. iPhone 16 Pro Max இன் ஆரம்ப விலை $1,199 (சுமார் ரூ. 99,500) ஆக இருக்கலாம் என கருதப்படுகிறது. இந்த மதிப்பிடப்பட்ட விலைகள் துல்லியமாக இருந்தால், ஐபோன் 16 சீரிஸ் முந்தைய ஐபோன் 15 தொடரின் விலையைப் போலவே இருக்கும் என்பது குறிப்பிடத்தக்கது.


Apple வாட்ச் சீரிஸ் 10 விலை?


அதிகாரப்பூர்வ விலை இன்னும் உறுதிப்படுத்தப்படவில்லை என்றாலும், முந்தைய எடிஷன்களுடன் ஒத்துப்போகும் அடிப்படை மாடலுக்கு, சீரிஸ் 10 தோராயமாக $399 (ரூ.33,500)இல் தொடங்கும் என்று எதிர்பார்க்கப்படுகிறது. இன்றைய நிகழ்ச்சிக்கும் பிறகு விரைவில் முன்பதிவு திறக்கப்படும்.  டெலிவரிகள் மாதத்தின் பிற்பகுதியில் தொடங்கும் என்று எதிர்பார்க்கப்படுகிறது.