Google Pay Recharge: கூகுள் பே மூலம் ரீசார்ஜ் செய்யும்போது கூடுதல் கட்டணம் (Convenience Fee) வசூலிக்கப்படுவதாக தகவல் வெளியாகி உள்ளது.
ஆன்லைன் பணப் பரிவர்த்தனைகள்:
பல வங்கி கணக்குகளையும் ஒரே மொபைல் செயலி மூலம் எளிதாக கையாளக்கூடிய வசதிதான் UPI (Unified Payments Interface). கடந்த 2016-ஆம் ஆண்டு என்.சி.பி.ஐ. 21 வங்கிகளுடன் UPI முறையைத் தொடங்கியது. தற்போது அசுர வளர்ச்சி அடைந்து, Gpay, Paytm, PhonePe போன்ற பல்வேறு செயலிகள் மூலம், டீக்கடை தொடங்கி நகைக்கடை வரையிலும் யுபிஐ பயன்பாடு அதிகரித்துள்ளது.
இதனால் ரூபாய் நோட்டுகள் பயன்பாடு குறைந்து வருகிறது. ஏடிஎம் வாசலில் கூட மக்கள் நிற்பது, முன்பை விட குறைந்து விட்டது. தற்போதெல்லாம் பேடிஎம், கூகுள் பே, போன் பே உள்ளிட்ட பணப் பரிவர்த்தனை செயலிகளை கிராமங்கள் உட்பட பல இடங்களில் பயன்படுத்தப்பட்டு வருகிறது.
மின்கட்டண செலுத்துவது முதல் மொபைல் ரீசார்ஜ் வரை அனைத்துமே யுபிஐயில் பயன்படுத்த முடிகிறது. பயனாளர்களின் வசதிகளை மேற்படுத்துவதற்காக யு.பி.ஐ தொழில்நுட்பத்தில் பல்வேறு மாற்றங்கள், மேம்பாடுகள் ஆகியவற்றிற்காக மத்திய அரசு நடவடிக்கைகளை மேற்கொண்டு வருவதாக தெரிவித்துள்ளது. டிஜிட்டல் பரிவர்த்தனையை அடுத்த கட்டத்திற்கு எடுத்துச் செல்லவும் பயனாளர்களுக்கு மேம்படுத்தப்பட்ட அனுபவத்தை வழங்கவும் பல்வேறு புதிய வசதிகள் அறிமுகம் செய்யப்பட்டு வருகிறது.
ரீச்சார்ஜ் செய்வதற்கு கட்டணம்:
இந்நிலையில், கூகுள் பே மூலம் ரீசார்ஜ் செய்யும்போது கட்டணம் (Convenience Fee) வசூலிக்கப்படுவதாக தகவல் வெளியாகி உள்ளது. அதாவது, கூகுள் பே மூலம் ரீசார்ஜ் செய்யும்போது ஒரு சதவீதம் முதல் 3 சதவீதம் வரை Convenience Fee எனும் கட்டணம் வசூலிக்கப்படுவதாக தகவல் வெளியாகி உள்ளது. அதன்படி, 100 ரூபாய்க்கு எந்த ஒரு கூடுதல் கட்டணமும் வசூலிக்கப்படவில்லை. ஆனால், 100 ரூபாய் மூதல் 200 ரூபாய் வரை ரீசார்ஜ் செய்தல் ரூ.1 கட்டணமும், 201 ரூபாய் முதல் 300 ரூபாய் வரை ரூ.2 கட்டணமும் வசூலிக்கப்படுகிறது.
மேலும் 301 ரூபாய்க்கு மேல் ரீசார்ஜ் செய்தால் ரூ.3 கட்டணம் வசூலிக்கப்படுவதாக தெரிவிக்கப்பட்டுள்ளது. இந்த Convenience Fee கட்டணத்தை மொபைல் ரீ சார்ஜ்க்கு மட்டுமே வசூலிக்கப்படுவதாக தெரிகிறது. மற்ற எந்த ஒரு பரிவர்த்தனைகளுக்கும் இந்த கட்டணம் வசூலிக்கப்படவில்லை. அதேபோல, போன்பே, பேடிஎம் பேன்றவைகளிலும் Convenience Fee எனும் பெயரில் கூடுதல் கட்டணம் வசூலிக்கப்பட்டு வருகிறது என்பது குறிப்பிடத்தக்கது.
மேலும் படிக்க
NEET-UG: பயாலஜி படிக்காமலேயே மருத்துவர் ஆகலாம்; தேசிய மருத்துவ ஆணையம் அதிரடி- முழு விவரம்