ஐபிஎல் தொடரில் குஜராத் அணியை வீழ்த்தியதன் மூலம் கொல்கத்தா அணி, புள்ளிப்பட்டியலில் இரண்டாவது இடத்திற்கு முன்னேறியுள்ளது.

ஐபிஎல் சீசன்:

16வது ஐபிஎல் சீசன் கடந்த மாதம் 31ம் தேதி தொடங்கி கோலாகலமாக நடைபெற்று வருகிறது. 3 ஆண்டுகளுக்குப் பிறகு ஐபிஎல் அணிகள் தங்களது சொந்த மண்ணில் உள்ளூர் ரசிகர்களுக்கு முன்னிலையில் விளையாடி வருகின்றன. இதனால் போட்டிகளை காண மைதானங்களில் ரசிகர்கள் குவிந்து வருகின்றனர். அதோடு, ஸ்டார் ஸ்போர்ட்ஸ் தொலைக்கட்சியிலும், ஜியோ சினிமா செயலியிலும் போட்டி நேரடியாக ஒளிபரப்பப்பட்டு வருகிறது. இதுவரை 14 லீக் போட்டிகள் நடந்து முடிந்துள்ளன.

நேற்றைய போட்டிகள்:

குஜராத் அணிக்கு எதிராக 205 ரன்கள் என்ற இமாலய நோக்கி களமிறங்கிய கொல்கத்தா அணி, ரிங்கு சிங்கின் அதிரடி ஆட்டத்தால் கடைசி பந்தில் த்ரில் வெற்றி பெற்றது. இது நடப்பு தொடரில் அந்த அணி பெறும் இரண்டாவது வெற்றி ஆகும். நேற்று நடைபெற்ற இரண்டாவது போட்டியில் அடுத்தடுத்து தோல்விகளை சந்தித்து வந்த ஐதராபாத் அணி, பஞ்சாப் அணியின் ஹாட்ரிக் வெற்றி பெறும் எண்ணத்தை தவிடுபொடியாக்கியது. இதனால், புள்ளிப்பட்டியலில் எந்தெந்த அணிகள் எந்தெந்த இடங்களில் உள்ளன என்பதை தற்போது அறியலாம்.

புள்ளிப்பட்டியல்:

அணிகள் போட்டிகள் வெற்றி தோல்வி புள்ளிகள்
ராஜஸ்தான் 3 2 1 4
கொல்கத்தா 3 2 1 4
லக்னோ 3 2 1 4
குஜராத் 3 2 1 4
சென்னை  3 2 1 4
பஞ்சாப் 3 2 1 4
பெங்களூரு  2 1 1 2
ஐதராபாத் 3 1 2 2
மும்பை 2 0 2 0
டெல்லி 3 0 3 0

முதல் நான்கு இடங்களில் யார்?

ராஜஸ்தான், கொல்கத்தா, லக்னோ மற்றும் குஜராத் ஆகிய அணிகள் தலா 3 போட்டிகளில் விளையாடி, தலா 2 போட்டிகளில் வெற்றி பெற்றுள்ளன. இதன் மூலம் குறிப்பிட்ட அணிகள் தலா 4 புள்ளிகளை பெற்று இருந்தாலும், ரன் ரேட் அடிப்படையில் முதல் நான்கு இடங்களை பிடித்துள்ளன. சென்னை மற்றும் பஞ்சாப் அணிகளும் தலா மூன்று போட்டிகளில் விளையாடி இரண்டில் வெற்றி பெற்று இருந்தாலும், ரன் ரேட் அடிப்படையில் புள்ளிப்பட்டியலில் 5 மற்றும் 6வது இடங்களில் உள்ளன. பெங்களூரு அணி விளையாடிய 2 போட்டிகளில் ஒரு வெற்றி ஒரு தோல்வியையும், ஐதராபாத் அணி விளையாடிய 3 போட்டிகளில் 2 தோல்வி மற்றும் ஒரு வெற்றியையும் பெற்று 7 மற்றும் 8வது இடங்களை ஆக்கிரமித்துள்ளன. மும்பை அணி விளையாடிய இரண்டு போட்டிகளிலும், டெல்லி அணி விளையாடிய 3 போட்டிகளிலும் தோல்வியை கண்டு, முறையே கடைசி இரண்டு இடங்களை   பிடித்துள்ளன. 

இன்றைய போட்டி:

பெங்களூருவில் இன்று நடைபெறும் போட்டியில் டூப்ளெசிஸ் தலைமையிலான பெங்களூரு அணியை, கே.எல்.ராகுல் தலைமையிலான லக்னோ அணி எதிர்கொள்கிறது. இந்த போட்டியில் ஒருவேளை லக்னோ அணி வெற்றி பெற்றால் புள்ளிப்பட்டியலில் முதல் இடத்திற்கு முன்னேறும். அதேநேரம், பெங்களூரு அணி அபார வெற்றி பெற்றால் மட்டுமே புள்ளிப்பட்டியலில் முன்னேற்றம் காண முடியும்.