ஐபிஎல் 2025:
ஆஸ்திரேலிய அணி வீரர் ஸ்டீவ் ஸ்மித் கடந்த 2010-ஆம் ஆண்டு சர்வதேச கிரிக்கெட்டில் அறிமுகமானவர். இதுவரை 109 டெஸ்ட் போட்டிகள், 158 ஒருநாள் போட்டிகள் மற்றும் 67 டி20 போட்டிகளில் விளையாடியுள்ளார். அதேபோல் கடந்த 2021 ஆம் ஆண்டு வரை ஐபிஎல் தொடரிலும் விளையாடினார். ஆனால் இவருக்கு இந்த ஆண்டு நடைபெற்ற டி20 உலகக் கோப்பையில் ஆஸ்திரேலிய அணியில் இடம் கிடைக்கவில்லை. மாறாக இவருக்கு டி20 பார்மெட் செட் ஆகவில்லை என்று கூறப்பட்டது.
இந்நிலையில் தான், ஐபிஎல் சீசன் 18 அடுத்த ஆண்டு தொடங்க உள்ளது. இதில் ஆஸ்திரேலிய வீரர் ஸ்டீவ் ஸ்மித் விளையாடுவது குறித்து விருப்பம் தெரிவித்துள்ளார். இது தொடர்பாக அவர் பேசுகையில், "டி20 உலக கோப்பையில் நான் சேர்க்கப்படாத போது வருத்தம் அடைந்தேன். ஆனால் இது போன்ற விசயங்கள் வாழ்க்கையில் நடக்கும். டி20 அணியை பொறுத்தவரை அணியில் இடம் பெறும் அனைவருமே அதிரடியான ஆட்டத்தை வெளிப்படுத்த வேண்டும் என்று தேர்வுக்குழுவினர் விரும்புகின்றனர்.
ஐபிஎல் தொடரில் விளையாட ஆசைப்படுகிறேன்:
தற்போது நான் மீண்டும் ஐபிஎல் தொடரில் விளையாட ஆசைப்படுகிறேன். எதிர்வரும் 2025ஆம் ஆண்டிற்கான ஐபிஎல் மெகா ஏலத்தில் நிச்சயம் எனது பெயரை பதிவு செய்வேன். ஒருவேளை எந்த அணி என்னை வாங்கினாலும் நிச்சயம் அந்த அணிக்காக அதிரடியான ஆட்டத்தை வெளிப்படுத்தி வெற்றியை பெற்று தர வேண்டும் என்பதில் மட்டுமே கவனமாக இருக்கிறேன்.
நான் எந்த வரிசையில் பேட்டிங் செய்ய வேண்டும் என்பதை அணியின் கேப்டனும், பயிற்சியாளரும் தான் முடிவு செய்ய வேண்டும். நிர்வாகம் என்னை எந்த இடத்தில் களமிறங்க சொன்னாலும் அந்த இடத்தில் இறங்கி நான் பேட்டிங் செய்ய தயாராக இருக்கிறேன்" என்று கூறியுள்ளார்.