2021 ஐபிஎல் தொடர் லீக் போட்டிகள் இறுதிகட்டத்தை எட்டியுள்ளது. சென்னை சூப்பர் கிங்ஸ், டெல்லி கேப்பிடல்ஸ், ராயல் சாலஞ்சர்ஸ் பெங்களூரு அணிகள் ப்ளே ஆஃப் சுற்றுக்கு தகுதிப்பெற்றுள்ள நிலையில், முதல் அணியாக எலிமினேட்டானது சன்ரைசர்ஸ் ஹைதராபாத் அணி. கடைசி கட்டத்தில், நான்காவது இடத்திற்காக கொல்கத்தா, மும்பை, பஞ்சாப் அணிகளுக்கு இடையே கடும் போட்டி நிலவுகிறது.
இந்நிலையில், இன்றைய போட்டியில் பெங்களூரு அணியும், ஹைதராபாத் அணியும் மோதுகின்றன. புள்ளிப்பட்டியலில் மூன்றாவது இடத்தில் இருக்கும் பெங்களூரு அணி, இந்த போட்டியிலும், அடுத்து நடக்க இருக்கும் டெல்லி கேப்பிடல்ஸ் அணியுடனான போட்டியிலும் வெற்றி பெற்று புள்ளிப்பட்டியலில் டாப் இரண்டில் நிறைவு செய்யும் முனைப்பில் விளையாடும். ஹைதராபாத் அணியைப் பொருத்தவரை, இந்த சீசனில் 12 போட்டிகளில் 2 போட்டிகளில் மட்டுமே வெற்றியை ஈட்டியதுள்ளது. இதனால், பெங்களூரு, மும்பை என இரண்டு அணிகளுக்கு எதிரான லீக் போட்டிகளில் ஆறுதல் வெற்றியைப் பதிவு செய்ய போராடும் என தெரிகிறது.
இரு அணிகளும் நேருக்கு நேர்:
இதுவரை, ஐபிஎல் வரலாற்றில் 19 போட்டிகளில் இரு அணிகளும் நேருக்கு நேர் மோதியுள்ளன. இதில், ஹைதராபாத் 10 முறையும், பெங்களூரு 8 முறையும் வெற்றி பெற்றுள்ளது. ஒரு போட்டி டிராவில் முடிந்துள்ளது. இன்று போட்டி நடைபெற இருக்கும் ஷேக் சையத் மைதானத்தில் இரு அணிகளும் ஒரு முறை மோதியுள்ளன. இதில், ஹைதராபாத் அணியே வெற்றி பெற்றுள்ளது.
நடப்பு ஐபிஎல் சீசனில் இரு அணிகளும் மோதிய முதல் போட்டியில், பெங்களூரு அணி வெற்றி பெற்றுள்ளது. முதலில் பேட்டிங் செய்து ஹைதராபாத் அணி 7 முறையும், பெங்களூரு அணி 3 முறையும் வெற்றி பெற்றுள்ளன. சேஸிங் ரெக்கார்டைப் பொருத்துவரை, இரு அணிகளும் தலா 3 முறை வெற்றி பெற்றுள்ளன.
பெங்களூரு - ஹைதராபாத் மோதிக் கொண்ட போட்டிகளின் ரெக்கார்டைப் பார்த்தால், ஹைதராபாத் அணியே ஆதிக்கம் செலுத்துகிறது. எனினும், இந்த சீசனில் ஹைதராபாத் அணியின் மோசமான ஃபார்ம் முதல் பாதியை அடுத்து இரண்டாம் பாதியிலும் தொடர்வதால், இன்று நடைபெறும் போட்டியில் பெங்களூரு ஆதிக்கம் செலுத்துவதற்கான வாய்ப்புகளே அதிகம் இருக்கின்றது.
மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்
ABP நாடு செய்திகளை சமூக வலைத்தள பக்கங்களிலும் பின் தொடரலாம்