ZIM vs IND T20I: இந்தியா-ஜிம்பாப்வே அணிகளுக்கு இடையேயான முதல் டி20 போட்டி, இந்திய நேரப்படி மாலை 4.30 மணிக்கு தொடங்க உள்ளது.


இந்தியா - ஜிம்பாப்வே மோதல்:


அண்மையில் நடந்து முடிந்த ஐசிசி டி20 உலகக் கோப்பை போட்டியில், இந்திய அணி சாம்பியன் பட்டம் வென்று அசத்தியது. இந்நிலையில் மூத்த வீரர்கள் அனைவருக்கும் ஓய்வளிக்கப்பட்டு, சுப்மன் கில் தலைமையிலான இளம் இந்திய அணி, 5 டி20 போட்டிகளில் விளையாடுவதற்காக ஜிம்பாப்வேயில் சுற்றுப்பயணம் மேற்கொண்டுள்ளது. அந்த வகையில் முதல் டி20 போட்டி இன்று நடைபெற உள்ளது.


முதல் வெற்றியை பெறுமா இந்தியா அணி?


இரு அணிகளும் மோதும் போட்டி ஹராரே ஸ்போர்ட்ஸ் கிளப் மைதானத்தில், இந்திய நேரப்படி மாலை 4.30 மணிக்கு தொடங்குகிறது. போட்டியின் நேரலையை சோனி ஸ்போர்ட்ஸ் தொலைக்காட்சி அலைவரிசையிலும், ஒடிடியில் சோனி லைவ் செயலியிலும் ரசிகர்கள் கண்டுகளிக்கலாம். தொடரை வெற்றிகரமாக தொடங்க இரு அணிகளும் முனைப்பு காட்டுகின்றன. ஐபிஎல் தொடரில் சிறப்பாக செயல்பட்ட பல முன்னணி வீரர்கள், இந்திய அணிய்ல் இருப்பதால் வெற்றி சாத்தியமாகும் என எதிர்பார்க்கப்படுகிறது.


பலம், பலவீனங்கள்:


இந்திய அணியை பொறுத்தவரை ஐபிஎல் தொடர்களில் மட்டுமின்றி, சர்வதேச போட்டிகளில் விளையாடிய அனுபவம் கொண்ட வீரர்களும் இடம்பெற்றுள்ளனர். அதேநேரம், ஜிம்பாப்வே அணி பெரும்பாலான போட்டிகளை கத்துக்குட்டி அணியுடனே விளையாடியுள்ளது. இதனால், போதிய அனுபவம் இல்லாத ஜிம்பாப்வே அணி, வலுவான இந்திய அணியை வீழ்த்துவது என்பது சிரமமாகவே இருக்கும். 


நேருக்கு நேர்:


சர்வதேச டி20 போட்டிகளில் இதுவரை இரு அணிகளும் 8 முறை நேருக்கு நேர் மோதியுள்ளன. அதில் இந்திய அணி 6 முறையும், ஜிம்பாப்வே அணி 2 முறையும் வெற்றி பெற்றுள்ளது.


மைதானம் எப்படி?


போட்டி நடைபெறும் ஹராரே மைதானம் பேட்டிங்கிற்கு மிகவும் சாதகமாக இருக்கும். இதனால், இன்றைய போட்டியில் அதிகபட்ச ரன்கள் குவிக்கப்பட வாய்ப்பு உள்ளது. டாஸ் வெல்லும் அணி முதலில் பந்துவீச்சை தேர்வு செய்வது நல்லது. 180-க்கும் அதிகமான ரன்களை சேர்த்தால், முதலில் பேட்டிங் செய்யும் அணி வெற்றிக்காக போராடலாம்.


உத்தேச பிளேயிங் லெவன்:


இந்தியா: சுப்மன் கில், அபிஷேக் சர்மா, ருதுராஜ் கெய்க்வாட், ரியான் பராக், துருவ் ஜூரல், ரிங்கு சிங், வாஷிங்டன் சுந்தர், அவேஷ் கான், முகேஷ் குமார், கலீல் அகமது, ரவி பிஷ்னோய்


ஜிம்பாப்வே: பிரையன் பென்னட், தடிவான்ஷே மருமணி, சிக்கந்தர் ராஜா, ஜொனாதன் காம்ப்பெல், கிளைவ் மடாண்டே, இன்னசென்ட் கையா, வெஸ்லி மாதேவெரே, லூக் ஜாங்வே, வெலிங்டன் மசகட்சா, பிளஸ்ஸிங் முசரபானி, ரிச்சர்ட் நக்ராவா