ஆசிய கோப்பை கிரிக்கெட் தொடரில் நேற்று நடைபெற்ற போட்டியில் இந்தியா-பாகிஸ்தான் அணிகள் மோதின. இந்தப் போட்டியில் டாஸ் வென்ற இந்திய அணி பந்துவீச்சை தேர்வு செய்தது. இதைத் தொடர்ந்து களமிறங்கிய பாகிஸ்தான் அணி புவனேஸ்வர் குமார் மற்றும் ஹர்திக் பாண்ட்யா ஆகியோர் சிறப்பான பந்துவீச்சை எதிர்கொள்ள முடியாமல் 147 ரன்களுக்கு ஆட்டமிழந்தது. இதையடுத்து களமிறங்கிய இந்திய அணியில் விராட் கோலி(35),ஜடேஜா(35)மற்றும் ஹர்திக் பாண்ட்யா(33*) ஆகியோர் சிறப்பான ஆட்டத்தை வெளிப்படுத்தினர். இதன்காரணமாக இந்திய அணி 5 விக்கெட் வித்தியாசத்தில் பாகிஸ்தான் அணியை வீழ்த்தியது. 


இந்நிலையில் நேற்றைய போட்டியில் வெற்றி பெற்றதன் மூலம் டி20 போட்டிகளில் இந்திய கேப்டனாக அதிக வெற்றி பெற்ற பட்டியலில் ரோகித் இரண்டாம் இடம் பிடித்துள்ளார். அத்துடன் இவர் விராட் கோலியின் சாதனையை சமன் செய்துள்ளார். அதாவது இந்திய அணியின் டி20 கேப்டனாக ரோகித் சர்மா தற்போது வரை 36 போட்டிகளில் செயல்பட்டுள்ளார். அவற்றில் ரோகித் சர்மா 30 போட்டிகளில் வெற்றியும், 6 போட்டிகளில் தோல்வியையும் அடைந்துள்ளார். 






டி20 கேப்டனாக அதிக வெற்றி பெற்ற வீரர்கள்:


மோர்கன் 42 வெற்றி


அஷ்கர் ஸ்டனிகசை-42 வெற்றி


தோனி 41 வெற்றி


ஃபின்ச்-35 வெற்றி


விராட் கோலி-30 வெற்றி


ரோகித் சர்மா-30 வெற்றி


கேன் வில்லியம்சன்-30 வெற்றி


சர்பராஸ் அகமது-29 வெற்றி


டேரன் சமி- 27 வெற்றி


பாபர் அசாம்-26 வெற்றி


இதன்மூலம் இந்திய கேப்டனாக விராட் கோலி பெற்ற 30 வெற்றியை ரோகித் சர்மா சமன் செய்துள்ளார். இந்திய கேப்டனாக விராட் கோலி 50 டி20 போட்டிகளில் கேப்டனாக செயல்பட்டு அவற்றில் 30 வெற்றியும், 16 தோல்வி, 2 டை மற்றும் 2 முடிவில்லை. இவருடைய சாதனையை ரோகித் சர்மா சமன் செய்துள்ளார். ஹாங்காங் அணிக்கு எதிரான அடுத்த போட்டியை ரோகித் சர்மா வெல்லும் பட்சத்தில் கோலியின் சாதனையை முறியடித்துவிடுவார். 


முன்னதாக நேற்றைய போட்டியில் இந்தியா பேட்டிங்கின் போது ஆட்டத்தின் 20 ஓவரை பாகிஸ்தான் வீரர் நவாஸ் வீசினார். அந்த ஓவரில் முதல் பந்தில் ஜடேஜா ஆட்டமிழந்தார். அதற்கு அடுத்த பந்தில் தினேஷ் கார்த்திக் ஒரு ரன் அடித்தார். மூன்றாவது பந்தை ஹர்திக் பாண்ட்யா ரன் எதுவும் எடுக்கவில்லை. இதனால் இந்திய வெற்றிக்கு 3 பந்துகளில் 6 ரன்கள் தேவைப்பட்டது. அப்போது பாண்ட்யா தினேஷ் கார்த்திக்கை பார்த்து நான் பார்த்து கொள்கிறேன் என்பது போல் ஒரு சைகையை காட்டினார். அதற்கு அடுத்த பந்தில் ஹர்திக் பாண்ட்யா அசத்தலாக சிக்சர் விளாசி இந்திய அணியை வெற்றி பாதைக்கு அழைத்து சென்றார். 






அதன்பின்னர் ஹர்திக் பாண்ட்யாவை பார்த்து தினேஷ் கார்த்திக் தலை வணங்கினார். இந்தப் படம் தற்போது ட்விட்டர் தளத்தில் வேகமாக வைரலாகி வருகிறது. இந்தப் படத்த ரசிகர்கள் பலரும் தங்களுடைய ட்விட்டர் பக்கத்தில் பகிர்ந்து வருகின்றனர்.