நேற்றை ஆட்டத்தில் எப்படி இந்திய அணியின் பந்து வீச்சாளர் வாசிங்டன் சுந்தர் 7 விக்கெட்டுகளை வீழ்த்தி அசத்தினாரோ அதை போல் இன்றைய போட்டியில் நியூசிலாந்து அணியின் பந்து வீச்சாளர் மிட்செல் சான்ட்னர் 7 விக்கெட்டுகளை வீழ்த்தி அசத்தியுள்ளார்.


இந்தியா - நியூசிலாந்து டெஸ்ட்:


நியூசிலாந்து கிரிக்கெட் அணி இந்தியாவில் சுற்றுப்பயணம் மேற்கொண்டுள்ளது. அதன்படி மூன்று டெஸ்ட் போட்டிகள் கொண்ட தொடரில் இந்திய அணியை நியூசிலாந்து அணி எதிர்கொள்கிறது. இதில் கடந்த அக்டோபர் 16 ஆம் தேதி பெங்களூருவில் உள்ள சின்னசாமி மைதானத்தில் நடைபெற்ற முதல் டெஸ்ட் போட்டியில் இந்திய அணியை நியூசிலாந்து அணி வீழ்த்தியது. இதனை தொடர்ந்து நேற்று (அக்டோபர் 24) புனேவில் உள்ள மகாராஷ்ட்ரா சர்வதேச கிரிக்கெட் மைதானத்தில் இரண்டாவது டெஸ்ட் போட்டி தொடங்கியது.


இதில் டாஸ் வென்ற நியூசிலாந்து அணியின் கேப்டன் டாம் லாதன் முதலில் பேட்டிங்கை தேர்வு செய்தார். அதன்படி முதலில் பேட்டிங் செய்த நியூசிலாந்து அணி 79.1 ஓவர்கள் முடிவில் அனைத்து விக்கெட்டுகளையும் இழந்து 259 ரன்கள் மட்டுமே எடுத்தது. இதில், இந்திய அணியின் பந்து வீச்சாளர் வாஷிங்டன் சுந்தர் 7 விக்கெட்டுகளை வீழ்த்தி அனைவரின் பார்வையையும் தன் பக்கம் திருப்பினார். அதே போல், மற்றொரு வீரரான ரவிச்சந்திரன் அஸ்வின் 3 விக்கெட்டுகளை கைப்பற்றினார்.


இந்த நிலையில் முதல் இன்னிங்ஸை தொடங்கிய இந்திய அணி 39.5ஓவர்கள் முடிவில் அனைத்து விக்கெட்டுகளை இழந்து 156 ரன்கள் மட்டுமே எடுத்தது. நேற்றை ஆட்டத்தில் எப்படி இந்திய அணியின் பந்து வீச்சாளர் வாசிங்டன் சுந்தர் 7 விக்கெட்டுகளை வீழ்த்தி அசத்தினாரோ அதை போல் இன்றைய போட்டியில் நியூசிலாந்து அணியின் பந்து வீச்சாளர் மிட்செல் சான்ட்னர் 7 விக்கெட்டுகளை வீழ்த்தி அசத்தியுள்ளார்.


மிரட்டிய மிட்செல் சான்ட்னரின் சுழல்:






இன்றைய போட்டியில் நியூசிலாந்து அணியின் சுழற்பந்து வீச்சாளர் இந்திய அணியை மிரட்டினார் என்றே சொல்ல வேண்டும். அந்த அளவிற்கு சிறப்பாக இருந்தது அவரது பந்து வீச்சு. அதாவது மிட்செல் சான்ட்னரின் சுழலில் இந்திய அணியின் இளம் வீரர் சுப்மன் கில்,நட்சத்திர ஆட்டக்காரர் விராட் கோலி,முதல் டெஸ்ட் போட்டியில் சதம் விளாசிய சர்பராஸ்கான், ரவீந்திர ஜடேஜா, ரவிச்சந்திரன் அஸ்வின்,ஆகாஷ் தீப் மற்றும் ஜஸ்ப்ரித் பும்ரா ஆகியோர் விக்கெட்டுகளை கைப்பற்றினார்.  


அந்தவகையில் மொத்தம் 19.3 ஓவர்கள் வீசிய சான்ட்னர் 53 ரன்களை விட்டுக்கொடுத்து 7 விக்கெட்டுகளை கைப்பற்றினார்.அது மட்டுமின்றி சர்வதேச டெஸ்ட் கிரிக்கெட்டில் கடந்த ஓர் ஆண்டாக சிறப்பான பந்து வீச்சை வெளிப்படுத்தி வருகிறார். கடந்த 2023 ஆம் ஆண்டு தென்னாப்பிரிக்க அணிக்கு எதிராக நடைபெற்ற டெஸ்ட் போட்டியில் 34 ரன்கள் விட்டுக்கொடுத்து 3 விக்கெட்டுகள், வங்கதேச அணிக்கு எதிராக நடைபெற்ற போட்டியில் 51 ரன்களை விட்டுக்கொடுத்து 3 விக்கெட், இங்கிலாந்து அணிக்கு எதிராக நடைபெற்ற போட்டியில் 53 ரன்களை விட்டுக்கொடுத்து 3 விக்கெட் என்று தொடர்ந்து சிறப்பாக பந்து வீசி வருகிறார்.