உலகக் கோப்பை கிரிக்கெட் 2023: இந்தியா - ஆப்கானிஸ்தான் அணிகள் இன்று பலப்பரீட்சை நடத்துகின்றன. இந்த போட்டியானது மதியம் 2 மணிக்கு டெல்லியில் உள்ள அருண் ஜெட்லி கிரிக்கெட் ஸ்டேடியத்தில் நடைபெறுகிறது.
விராட் கோலி மற்றும் கே.எல்.ராகுல் ஜோடி சிறப்பாக பேட்டிங் செய்ததால் இந்தியா தனது முதல் போட்டியில் ஆஸ்திரேலியாவுக்கு எதிரான வலுவான வெற்றிபெற்றது. குல்தீப் யாதவ் மற்றும் ரவீந்திர ஜடேஜா ஆகியோர் சிறப்பாக பந்துவீசி 2 மற்றும் 3 விக்கெட்களை வீழ்த்தியதாக, வலுவான ஆஸ்திரேலியா அணி 199 ரன்களுக்கு ஆல் அவுட் ஆனது.
ரோகித் சர்மா, இஷான் கிஷன் மற்றும் ஷ்ரேயாஸ் ஐயர் ஆகியோர் ரன் அவுட் ஆகி வெளியே சென்றாலும், விராட் மற்றும் ராகுல் 165 ரன்கள் பார்ட்னர்ஷிப் அமைத்து இந்திய அணியை 6 விக்கெட் வித்தியாசத்தில் வெற்றிபெற செய்தனர்.
மறுபுறம், ஆப்கானிஸ்தான் தனது ஆட்டத்தில் 6 விக்கெட் வித்தியாசத்தில் வங்கதேசத்திடம் தோல்வியை சந்தித்தது. எனவே, இந்த போட்டியில் எப்படியாவது வெற்றிபெற வேண்டும் என முயற்சிக்கும்.
இந்திய அணியில் மாற்றம் இருக்குமா..?
ரவிசந்திரன் அஸ்வினை பெஞ்சில் வைத்திருப்பதன் மூலம் ஷர்துல் தாக்கூருக்கு இந்திய அணி வாய்ப்பளிக்கலாம். ஏனென்றால், இன்றைய போட்டி டெல்லி அருண் ஜெட்லி மைதானத்தில் நடைபெற உள்ளதால், இங்குள்ள ஆடுகளம் இந்தியாவின் முந்தைய ஆட்டத்தின் (சேப்பாக்கம்) ஆடுகளத்திலிருந்து முற்றிலும் மாறுபட்டது.
சேப்பாக்கத்தில் நடைபெற்ற இந்தியா-ஆஸ்திரேலியா இடையேயான ஆட்டத்தில் இந்திய அணி மூன்று சுழற்பந்து வீச்சாளர்களுடன் களம் இறங்கியது. சுழற்பந்து வீச்சுக்கு உகந்த விக்கெட் காரணமாக இந்தியா இந்த உத்தியைக் கடைப்பிடித்தது. இப்போது டெல்லி ஆடுகளம் சேப்பாக்கத்தைப் போல சுழற்பந்து வீச்சுக்கு உகந்ததாக இல்லாததால், ஸ்பின் ஆல்ரவுண்டருக்குப் பதிலாக இந்திய அணி வேகப்பந்து வீச்சு ஆல்-ரவுண்டரை முயற்சி செய்யலாம். அல்லது அஸ்வினுக்கு பதிலாக முகமது ஷமியும் விளையாட வைக்கலாம்.
இரு அணிகளுக்கு இதுவரை நேருக்கு நேர்:
ஒருநாள் கிரிக்கெட் வரலாற்றில் இரு அணிகளும் இதுவரை 3 போட்டிகளில் மட்டுமே நேருக்கு நேர் சந்தித்துள்ளது. அதிலும், 2 போட்டிகளில் இந்திய அணி வெற்றிபெற்றுள்ளது. ஒரு போட்டியில் முடிவில்லாமல் போனது. 2014 ஆம் ஆண்டு மிர்பூரில் இரு அணிகளும் முதல்முறையாக சந்தித்தது. இதில், இந்திய அணி எட்டு விக்கெட் வித்தியாசத்தில் வெற்றி பெற்றது. இந்தியா மற்றும் ஆப்கானிஸ்தான் அணிகள் 2019-ம் ஆண்டு நடைபெற்ற ஒருநாள் உலகக் கோப்பையில் ஒரே ஒரு முறை மட்டுமே சந்தித்துள்ளன. அதிலும், இந்திய அணி 11 ரன்கள் வித்தியாசத்தில் வெற்றிபெற்றது.
போட்டிகளின் சுருக்கம் இங்கே:
- IND (224/8) AFG (213) அணியை 11 ரன்கள் வித்தியாசத்தில் வென்றது, ஜூன் 22, 2019
- AFG (252/8) IND (252) முடிவில்லாமல் போனது. செப் 25, 2018
- IND (160/2) AFG (159) அணியை 8 விக்கெட் வித்தியாசத்தில் வென்றது, மார்ச் 05, 2014
கணிக்கப்பட்ட இந்திய அணி:
ரோஹித் சர்மா (கேப்டன்), இஷான் கிஷன், விராட் கோலி, ஷ்ரேயாஸ் ஐயர், கே.எல்.ராகுல், ஹர்திக் பாண்டியா, ரவீந்திர ஜடேஜா, ஷர்துல் தாக்கூர்/ஆர்.அஷ்வின், ஜஸ்பிரித் பும்ரா, குல்தீப் யாதவ், முகமது சிராஜ்.
கணிக்கப்பட்ட ஆப்கானிஸ்தான் அணி:
ரஹ்மானுல்லா குர்பாஸ் (விக்கெட் கீப்பர்), இப்ராஹிம் சத்ரான், ரஹ்மத் ஷா, ஹஷ்மத்துல்லா ஷாஹிதி (கேப்டன்), முகமது நபி, நஜிபுல்லா ஜத்ரான், அஸ்மதுல்லா உமர்சாய், ரஷித் கான், நவீன் உல்-ஹக், முஜீப் உர் ரஹ்மான், ஃபசல்ஹாக் ஃபரூக்.