ABP கோயில் உலா: உலக நன்மை வேண்டி சீர்காழியில் சித்தர்கள் சன்னதியில் நடைபெற்ற மகா ருத்ர யாகம்!

சீர்காழி அருகே சித்தர்புரம் ஸ்ரீ சத்குரு ஒளிலாயம் சித்தர் பீடத்தில் உலக நன்மை வேண்டி நடைபெற்ற சிறப்பு மகா ருத்ர யாகத்தில் ஏராளமான பக்தர்கள் பங்கேற்று வழிபாடு செய்தனர்.

சீர்காழி அருகே சித்தர்புரம் ஸ்ரீ சத்குரு ஒளிலாயம் சித்தர் பீடத்தில் ஆடி மாத பிறப்பை அடுத்து உலக நன்மை வேண்டி நடைபெற்ற சிறப்பு மகா ருத்ர யாகத்தில் திரளான பக்தர்கள் கலந்துகொண்டு வழிபாடு மேற்கொண்டனர்.

18 சித்தர்கள் அருள்பாலிக்கும் சித்தர் பீடம் 

மயிலாடுதுறை மாவட்டம் சீர்காழி அடுத்த சித்ததர்புரத்தில் 18 சித்தர்கள் அருள்பாலிக்கும் மிக பிரசித்தி பெற்ற ஒளிலாயம் சித்தர்பீடம் அமைந்துள்ளது. இப்பகுதியை சேர்ந்த ராஜேந்திர சுவாமிகளால் இவ் சித்தர் பீடம் தோற்றுவிக்கப்பட்டது. இந்த ஒளிலாயம் சித்தர் பீடத்தில் 18 சித்தர்களும் தனி சந்நிதி கொண்டு அருள் பாலித்து வருகின்றனர். 18 படிகள் கொண்ட விநாயகர் சந்நிதியுடன் கூடிய மகா லிங்கமும் இங்கு அமைந்துள்ளது.

சிறப்பு மகா ருத்ர யாகம் 

இத்தகைய பல்வேறு சிறப்பு மிக்க சித்தர் பீடத்தில் பவுர்ணமி தோறும் சிறப்பு வழிபாடு நடைபெறும், அது போன்று பீடத்தின் நிறுவனர் ஸ்ரீ சத்குரு ராஜேந்திர சுவாமிகளின் ஆண்டு குருபூஜை விழா மிக விமரிசையாக நடைபெறும். இந்நிலையில் ஆடி மாத பிறப்பை முன்னிட்டு ஒளிலாயம் சித்தர் பீடத்தில் சிறப்பு பூஜைகள் செய்யப்பட்டன. ஆலயத்தில் உள்ள 18 சித்தர்களுக்கும் சிறப்பு அபிஷேக ஆராதனைகள் நடைபெற்றன. அதனைத் தொடர்ந்து பீடத்தின் வளாகத்தில் உலக நன்மை வேண்டி பிரமாண்டமாக 48 யாக குண்டங்கள் அமைக்கப்பட்டு மகா ருத்ர யாகம் நடைபெற்றது.

ஏராளமான பக்தர்கள் பங்கேற்பு 

பின்னர் மேளதாள மங்கள வாத்தியங்கள் முழங்க, சிவாச்சாரியார்கள் வேத மந்திரங்கள் ஓத பூர்ணாஹூதி மற்றும் மகா தீபாராதனை காண்பிக்கப்பட்டது. இந்த மகா யாகத்தில் மயிலாடுதுறை மற்றும் இன்றி தமிழகம், ஆந்திரா, கர்நாடகா, குஜராத் உள்ளிட்ட பல்வேறு மாநிலங்களில் இருந்து ஏராளமான பக்தர்கள் கலந்து கொண்டு தரிசனம் செய்து வழிபட்டனர்.